Jeremia 40 - MUKANDA USANDU WA ZAMBI 1975

¹ Liji lia Yehova liejile kuli Jeremia muze te Nabuzaradane kapitau ka tulayi hamwecha ku Rama muze hamutwala wa kukasa ni malenge hamuwika ni funge eswe a ku Yerusaleme ni Yunda waze te maatwala njize ku Babilonia.

² Kapitau ka tulayi yatambula Jeremia yamba kuli iye ngwenyi, Yehova Zambi yenu hatongola yuma yino yikalu ha chifuchi chino.

³ Yehova hachilinga, halinga chize wambile, Chino chuma chanuwana mumu nwavulumuna Yehova, kunwononokene ku liji lienyi.

⁴ Musono ngunakutusula ku malenge a ha moko je. Nyi chinakupemena kwiza ni yami ku Babilonia, tweya mba yami mungukufunga kanawa. Alioze nyi chakupihila kwiza ni yami ku Babilonia, kanda wiza. Tala, chifuchi cheswe chili kumeso je, yako kweswako kunakuwahila ni kuze kunakupemena.

⁵ Nyi unazange kusala, hihiluka kuli Gedalia mwana Ahikame mwana Shafane yoze mwanangana wa Babilonia hatongola akapwe mukwa kuyula yihunda ya Yunda, Utwame hamwe nenyi hakachi ka e atu ukaye kweswako unamono ngwe kunakupemena kuya. Chocho kapitau ka tulayi yamwaha kulia cha tangwa ha tangwa ni chawana nawa, yamutusula.

⁶ Henaho Jeremia yaya kuli Gedalia mwana Ahikame ku Mizepa; yatwama hamwe nenyi hakachi ka atu aze asalile mu chifuchi.

⁷ Tusongo eswe a maswalale aze apwile mu chifuchi haze lia yihunda hamwe ni atu jo muze hevwa ngwo, Mwanangana wa Babilonia hasa Gedalia mwana Ahikame mukwa kuyula chifuchi ni kumwaha malunga, ni mapwo, ni ana, e yiswale lume a mu chifuchi waze kaatwalile ku unjize mu Babilonia,

⁸ o yaya kuli Gedalia ku Mizepa—Ishemali mwana Netania, Johanane ni Jonatas ana ja Karea, ni Seraia mwana Tanumete, ni ana ja Efaia Ka-Netofate, ni Jezania mwana wa mwe mukwa Maka—o ni atu jo.

⁹ Gedalia mwana Ahikame mwana Shafane yalishinga kuli ayo ni kuli atu jo ngwenyi, Kanda nwivwa woma kulingila A-Kaletea. Twamenu mu chifuchi chenu, nukalingile mwanangana wa Babilonia, mba munutwama kanawa.

¹⁰ Nyi yami, mungutwama mu Mizepa ngukanuhanjikile kuli A-Kaletea waze meza kuli yetu, alioze yenu kungululenu vinyu, ni mihuko ya lwiza, ni maji, nukayitulikile mu yikwachilo yenu, nukatwame mu yihunda yenu yize hinwatambula.

¹¹ Chocho muze A-Yunda aze eswe atwamine mu Moape, ni hakachi ka A-Amone ni A-Endome ni mu yifuchi yikwo evwile ngwo, Mwanangana wa Babilonia hahichika amwe masalila mu Yunda ni chikwo nawa hasa Gedalia mwana Ahikame mwana Shefane akapwe mukwa kwayula,

¹² mba ha kwivwa chocho A-Yunda eswe yakatuka ku yifuchi yeswe kuze haahumina, yeza ku chifuchi cha Yunda kuli Gedalia ku Mizepa. Yakungulula vinyu ni mihuko ya lwiza ya kulumbama.

¹³ Johanane mwana Karea ni tusongo eswe a maswalale a mu chifuchi haze lia yihunda yeza kuli Gedalia ku Mizepa,

¹⁴ yamba kuli iye ngwo, Unanyingika Balisi mwanangana wa A-Amone hatuma Ishemali mwana Netania akakushihe? Alioze Gedalia mwana Ahikame kasolo kwafuliela.

¹⁵ Mba Johanane mwana Karea yamba kuli Gedalia ku lumbu ukawo mu Mizepa ngwenyi, Ngutayize, nguye ngukashihe Ishemali mwana Netania mba niumwe machinyingika. Kuchi te makushiha? Nyi chocho malinga, A-Yunda eswe wano eswe anakungulukila kuli yena makamwanangana, mba masalila ja A-Yunda makakuwa.

¹⁶ Alioze Gedalia mwana Ahikame yamba kuli Johanane mwana Karea ngwenyi, Kuchi kulinga chuma chino mumu Ishemali unamulamikiza.