Jeremia 4 - MUKANDA USANDU WA ZAMBI 1975

¹ Yehova kanambe ngwenyi, Ena Izalele, nyi muhiluka chatamba kuhiluka kuli yami. Nyi muchiza yizelwokeso ye kumeso jami nikukakashana ka;

² nyi munulishinga ngwenu, Ni mwono wa Yehova ni umwenemwene, ni kulita, ni ululi mba mavungu maliwahisa muli iye, ni muli iye nawa malisamba.

³ Mumu Yehova kanambe kuli malunga ja Yunda ni akwa Yerusaleme ngwenyi, Chipula mavu aze kunwalimine, kanda nukuwa mbuto hakachi ka mbimbo.

⁴ Lipwisenu ngalami kuli Yehova; Chizenu misosha ya mbunge jenu, enu malunga a Yunda ni akwa Yerusaleme; kuchina ufwatulo wami muuvunduka ngwe kahia, nikulekwoka ni yoze makajima wakuhi, mumu ha upi wa yilinga yenu.

⁵ Ambenu mu Yunda; tambikenu mu Yerusaleme ngwenu, Humunenu chitavwi ndusu mu chifuchi, tambikenu ngwenu, Kungulukenu tukaye tukanjile mu yihunda ya kukolesa.

⁶ Zundulenu mbandeira kutalikisa ku Zaione; chinenu ha ulamwino, kanda nulaluka, mumu ngunaneha chipi cha ku Norte, kwonwona chinene.

⁷ Umwe ndumba hakatuka ku usaki wenyi; mukwa kwonwona mavungu haputuka, hakatuka kuma kwenyi akenyeke chifuchi chenu, akapuzule yihunda yenu, ni kuyihichika kuyishi atu.

⁸ Ha chikuma chino lijikenu ni chikeleyi. Lishimwokenu ni kulila mbimbi mumu utenu usasu wa Yehova kuwatukatukile.

⁹ Yehova kanambe ngwenyi, Ha tangwa lize hamu mulikahona kuli mwanangana ni kuli alemu. Asasendote mevwa mwongo, ni aprofeta makomoka.

¹⁰ Ami yingwamba ngwami, Mwene Yehova, hiwonga liakulu wano atu ni A-Yerusaleme ngwe, Muchipwa chipema ni yenu, alioze katana hanahete kwe ku mwono wo.

¹¹ Ha mwaka uze makamba kuli wano atu ni kuli A-Yerusaleme ngwo, Fuji yimwe ya kahia muyikatuka ku milundu yize kuyishi mitondo mu puya ni kutalikisa kuli mwana wa pwo atu jami; hi kufuza ko hanji kupemesa.

¹² Fuji yinakatuka kuli yami yapwa ni tachi naye ha milimo yino. Yami ngunahanjika no haliapwila ni upatwilo.

¹³ Talenu, kaneza ngwe malelwa, ni matemba jenyi ngwe chijimbi, tuvwalu twenyi kali ni tambu kuhiana pupa— lamba lietu, hitwanonga!

¹⁴ Yerusaleme, sanenu ku mbunge ungulungulu ukatuke, akanulamwine. Ndo mwiji muka manyonga jenu api matwama muli yenu?

¹⁵ Mumu liji limwe linakololoka ku Ndane nikutambika chipi ku mulundu wa Eframe.

¹⁶ Towezenu mavungu, kaneza; lumbununenu kuli A-Yerusaleme ngwenu, Akwa kuseleka kanakatuka ku chifuchi kusuku kanakalumioka kulimika ni yihunda ya Yunda.

¹⁷ Ngwe tulayi a kufunga munda hanaseleka kweswe kwa kujingilika, mumu hanangukolema. Chocho kanambe Yehova.

¹⁸ Ndako jenu ni yitanga yenu hiyanukokela chuma chino. Chino upatwilo wenu usasu chikolo; mba hiwanuheta ndo ku mbunge.

¹⁹ Mbunge yamie—mbunge yamie— ngunalifwichi ni yikola. Mama yami—mbungeie— Mbunge yami yinalipupula; Chahashile kuhwima mumu ngunevu liji lia chitavwi, we mutambi wa jita.

²⁰ Kuji-ni-tomo linalihange ni kuji-ni-tomo; chifuchi cheswe chapwa cha kwenyeka. Susumuku honwona mbalaka jami, ni kurtina jami ni shimbu liakuhi.

²¹ Ndo mwiji muka mungumona mbandeira ni kwivwa liji lia chitavwi?

²² Mumu atu jami kanahepuka, kangunyingikine, yelo ja ana keshi yinyingi. Mana a kulinga yipi kali no, alioze kanyingikine kulinga yipema.

²³ Natalile hashi, kumanyi hapwa hamokomoko ha hululu; natalile kwilu kumanyi kukushi pangu.

²⁴ Natalile ku milundu, yinachikima, mindundena yeswe yinalihiji.

²⁵ Natalile alioze kukwapwile mutu, ni tujila eswe a mu tetela hachina.

²⁶ Natalile, kumanyi chifuchi cha mihuko hichalumuka puya, yihunda yacho yeswe hanayipuzula, kumeso ja Yehova ni ufwatulo wenyi usasu.

²⁷ Mumu Yehova kanambe ngwenyi, Chifuchi cheswe muchipwa cha kwonwona, hindu chichi kamanununa lu.

²⁸ Ha chikuma chino hashi muhalishimwoka ni malilu malá pwi; mumu hinamba, hinapala, chalikonyekene, chichi kahiluka kunyima.

²⁹ Ha Chizungozungo cha akwa tuvwalu ni ngashi yihunda yeswe yinachina. Kanaswame mu usaki; kananyina ku mawe; yihunda yeswe hanayichina, niumwe katwaminemo.

³⁰ Ni yena hakwenyeka kulu, kuchi chinalumbunuka unazala ngengu, ni kuliwahisa ni yuma ya oru, ni kutohesa meso je ni ulombo? Unaliwahisa mokomoko, mumu masepa je kanakulelesa, kanafupu kukushiha.

³¹ Mumu ngunevu muteto ngwe wa pwo kanafumbajala, kulifwita ngwe umwe ha kusema mwana mutangu. Muteto wa mwana-pwo Zaione nikuhuza; kanazozo moko jenyi ngwenyi, Lamba liami, ngunalezumuka kumeso ja yingalwe.