Jeremia 39 - MUKANDA USANDU WA ZAMBI 1975

¹ Ha mwaka wamuchilivwa wa Zedekia mwanangana wa Yunda ni kakweji wamuchikumi, Nabukanezore mwanangana wa Babilonia ni tujita twenyi eswe ejile kulimika ni Yerusaleme. Yayiseleka.

² Ha mwaka kumi ni kashi wa Zedekia ni kakweji wamuchiwana ni tangwa liamuchilivwa lia kakweji, chihunda yachilokola.

³ Ha kutambula Yerusaleme, alemu eswe a mwanangana wa Babilonia yeza, yatwama mu chikolo cha hakachi; Negale-Shareze, ni Samagare-Nebo, Sareshekime mwe kaliamanga wa lutwe, Negale-Shareze mwe chilolo wa lutwe ni akwa chiyulo eswe a mwanangana wa Babilonia.

⁴ Muze Zedekia mwanangana wa Yunda ni maswalale eswe aamwene, yachina, nikukatuka ku chihunda ha ufuku ku munda wa mwanangana, ku chikolo hakachi ka yipanga yiali ya mawe. Yatalikisa ku Arapa.

⁵ Alioze maswalale ja A-Kaletea yaahanga, yaliheta ni Zedekia mu yana ya Yeriku, mba muze hamukwata yamuneha kuli Nabukanezore mwanangana wa Babilonia ku Ribila, mu chifuchi cha Hamate. Kwenako yamupatwila.

⁶ Mwanangana wa Babilonia yashiha ana ja Zedekia a malunga kumeso jenyi ku Ribila, hamwe ni alemu eswe ja Yunda.

⁷ Yalokola meso ja Zedekia; yamukasa ni malenge amutwale ku Babilonia.

⁸ A-Kaletea yocha zuwo lia mwanangana ni zuwo lia atu, ni kupuzula yipanga-ya-mawe ya Yerusaleme.

⁹ Mba Nabuzaradane kapitau ka tulayi, yatwala ku unjize mu Babilonia atu aze asalile mu chihunda, ni waze hachinyina kuli iye, ni atu akwo.

¹⁰ Nabuzaradane kapitau ka tulayi yahichika mu chifuchi cha Yunda amwe atu yiswale keshi upite, yaaha minda ya uva ni mande hamuwika.

¹¹ Nabukanezore mwanangana wa Babilonia yahana chiyulo kuli Nabuzaradane kapitau ka tulayi ha kutwala kuli Jeremia ngwenyi,

¹² Mutambule umufunge kanawa. Kanda umulinga chipi alioze ulinge nenyi chizechene ngwe mwene mamba.

¹³ Chocho Nabuzaradane kapitau ka tulayi, ni Nabushazabane kaliamanga wa lutwe, ni Negale-Shareze chilolo wa lutwe ni akwa chiyulo eswe ja mwanangana wa Babilonia

¹⁴ yatuma kuchiza Jeremia ku yize ya tulayi. Yamukunjika kuli Gedalia mwana Ahikame mwana Shafane, akamutwale ku zuwo lienyi. Chocho yatwama hakachi ka e atu.

¹⁵ Liji lia Yehova liejile kuli Jeremia shimbu te achili mu yize ya tulayi ngwenyi,

¹⁶ Yako ukambe kuli Ka-Etiopia Ebedemeleke ngwe, Yehova-wa-Tujita, Zambi ya Izalele kanambe ngwenyi, Mungumanununa maliji jami a kutwala ku chihunda chino ha yuma yikalu, hi yuma yipema ko, mba kumakamanunuka kumeso je ha tangwa liacho.

¹⁷ Alioze Yehova kanambe ngwenyi, Mungukupulula ha tangwa lize; kechi kakukunjika kuli malunga waze wakwavwila woma.

¹⁸ Mumu pundu mungukulamwina; kuchi kufwa ni katana alioze muzuka mwono we ngwe upite wa jita mumu hiunangufuliela. Chocho kanambe Yehova.