Jeremia 38 - MUKANDA USANDU WA ZAMBI 1975

¹ Shefatia mwana Matane, ni Gedalia mwana Pashure, ni Jukale mwana Shelemia, ni Pashure mwana Malekia evwile maliji a Jeremia kuli e atu eswe, ngwenyi,

² Yehova kanambe ngwenyi, Mweswe matwama mu chihunda chino kumafwa ku katana, ni kapunga, ni chilungo. Alioze mweswe maya haze kuli A-Kaletea matwama ni mwono. Kumamwaha mwono wenyi ngwe upite wa jita; kumatwama ni mwono.

³ Yehova kanambe ngwenyi, Chihunda chino kumakachikunjika kuli tujita twa mwanangana wa Babilonia. O kumakachitambula.

⁴ Mba e alemu yamba kuli mwanangana ngwo, Yono lunga chatamba kumushiha mumu kanachiza tachi kuli maswalale waze asala mu chihunda chino, ni kuli atu eswe, ha kuhanjika maliji wano kuli ayo. Yono lunga kafupile kuwahisa akwa vungu lino; kanafupu kwalambula.

⁵ Mwanangana Zedekia yamba ngwenyi, Mu moko jenu ali, mumu mwanangana kahashile kulinga nichimwe cha kulimika ni yenu.

⁶ Chocho yanda Jeremia, yamusa mu wina wa Malekia mwana wa mwanangana wa kuswekelamo meya, uze uli mu yize ya tulayi. Yasoselamo Jeremia ni mihipu. Kumwapwile meya mu wina, shina malowa wika, mba Jeremia yatwema mu malowa.

⁷ Umwe Ebede-meleke, unuku wa ku Etiopia, mukwa zuwo lia mwanangana muze hevwa chize hasa Jeremia mu wina—mwanangana te kanatwama mu chikolo cha Mbenjamine—

⁸ Ebede-meleke yakatuka ku zuwo lia mwanangana, yamba kuli mwanangana ngwenyi,

⁹ Mwene wami mwanangana, wano malunga halinga chipi mu yino yeswe halinga kuli Jeremia ha kumumbila mu wina. Kumafwilamo ni zala mumu mbolo kuyishimo mu chihunda.

¹⁰ Mba mwanangana yatuma Ka-Etiopia Ebede-meleke ngwenyi, Tambula kuno makumi atatu a malunga nukachize Jeremia mu wina shimbu kandafwa.

¹¹ Chocho Ebede-meleke yaya ni e malunga; yaya ku zuwo lia mwanangana ku chisweko chimwe cha mazalo mu zuwo lia kutulikila. Yachizamo yipuzu yikulu ni mazalo amwe apapujoka; yayisosela kuli Jeremia mu wina ni mihipu.

¹² Ka-Etiopia Ebede-meleke yamba kuli Jeremia ngwenyi, Sako yipuzu ni mahina ha mihipu mu makahwa. Jeremia yalinga chocho.

¹³ Mba yasosa Jeremia mu wina ni mihipu. Jeremia watwamine mu yize ya tulayi.

¹⁴ Mwanangana Zedekia yasaka profeta Jeremia yahanjika nenyi ku unjililo wamuchitatu wa zuwo lia Yehova. Mwanangana yamba kuli Jeremia ngwenyi, Mungukuhula chuma, kanda unguswekela nichimwe.

¹⁵ Jeremia yamba kuli Zedekia ngwenyi, Nyi mungunulweza te kunuchi kungushiha lume? Nyi mungunwaha mana, kunuchi kungupanjika.

¹⁶ Mba mwanangana Zedekia yalishinga kuli Jeremia ukawo ku lumbu ngwenyi, Ni mwono wa Yehova yoze watangile alma jetu, chichi kukushiha chipwe kukukunjika kuli wano malunga anafupu kukushiha.

¹⁷ Mba Jeremia yamba kuli Zedekia ngwenyi, Yehova, Zambi-ya-Tujita, Zambi ya Izalele kanambe ngwenyi, Nyi munuzeya kuli alemu ja mwanangana wa Babilonia kechi kunushiha, ni chihunda chino kechi kuchocha ni kahia, ni yenu ni munyachi wenu, munukatwama ni mwono.

¹⁸ Alioze nyi kunwazeyele kuli alemu ja mwanangana wa Babilonia chihunda chino machikunjika kuli A-Kaletea; machocha ni kahia ni yenu kunuchi kuputuka kuli ayo.

¹⁹ Mwanangana Zedekia yamba kuli Jeremia ngwenyi, Woma ngunevu wa A-Yunda aze hachinyina kuli A-Kaletea kuchina akangukunjike kuli ayo angupinjise.

²⁰ Jeremia yamba ngwenyi, Kechi kunukunjika kuli ayo. Ononokenu haliapwila ku liji lia Yehova ha chuma chino ngunambe kuli yenu mba muchiwaha ni yenu, ni kechi kunushiha.

²¹ Alioze nyi kunusolo kuzeya, usolwelo Yehova hangwaha uno,

²² mapwo eswe waze asala mu zuwo lia mwanangana wa Yunda te maatwala kuli alemu ja mwanangana wa Babilonia nikwamba ngwo, Masepa je aze waafulielele hanakwongo, hanakukumbu. Haliapwila muze molu je anashimbama mu malowa kanakutewulula meso jo.

²³ Mapwo jenu eswe ni ana jenu eswe a malunga makaatwala kuli A-Kaletea ni yenu mwene kunuchi kapuluka kuli ayo. Mwanangana wa Babilonia kumakanukwata ni chihunda chino makachocha ni kahia.

²⁴ Mba Zedekia yamba kuli Jeremia ngwenyi, Kanda ulweza niumwe maliji wano mba kuchi kufwa.

²⁵ Nyi alemu mevwa ngwe hinahanjika ni yena mba meza nikukuhula ngwo, Utulweze chize wambanga kuli mwanangana ni chize mwanangana wambanga kuli yenu; kanda utuswekela mba kutuchi kukushiha,

²⁶ nyi chocho mba yena muwamba kuli ayo ngwe, Nalembelelanga ni vumbi kuli mwanangana kanda anguhilwisa ku zuwo lia Jonatas ngukafwileko.

²⁷ Chocho alemu eswe yeza kuli Jeremia ni kumuhula. Aye yakumbulula chizechene ngwe mwanangana hamulongesa. Chocho yalitwamina kumuhula mumu pande jo kajivwile kuli niumwe.

²⁸ Jeremia aye yatwama mu yize ya tulayi ndo tangwa lize atambwile Yerusaleme.