Jeremia 37 - MUKANDA USANDU WA ZAMBI 1975

¹ Zedekia mwana wa Josia yoze Nabukanezore mwanangana wa Babilonia wapwishile mwanangana mu chifuchi cha Yunda, aye wasalakanyine Konia mwana Jehoakime.

² Alioze chipwe iye, chipwe tuvumbi twenyi, chipwe e atu a mu chifuchi kapanjikile ku maliji a Yehova aze ahanjikilile kuli profeta Jeremia.

³ Mwanangana Zedekia yatuma Jukale mwana Shelemia, ni sasendote Zefania mwana Maseia kuli profeta Jeremia ngwenyi, Utulembele kuli Yehova Zambi yetu.

⁴ Jeremia te achili nikunjilanjila ni kutuhwoka hakachi ka atu. Kanda achimusa mu zuwo lia ususu.

⁵ Tujita twa Falau te hakatuka ku Engitu, mba muze A-Kaletea waze anaseleka Yerusaleme hevwa lufuma wacho, o yakatuka ku Yerusaleme.

⁶ Henaho liji lia Yehova yiliza kuli profeta Jeremia ngwenyi,

⁷ Yehova Zambi ya Izalele kanambe ngwenyi, Kuli mwanangana wa Yunda yoze wanutumanga kuli yami kunguhula munwamba ngwenu, Tujita twa Falau waze ejile kukukwasa kanambe kuhiluka ku chifuchi cho cha Engitu.

⁸ A-Kaletea kumahiluka nikwasa jita ni chihunda chino. Kumachikumba ni kuchocha ni kahia.

⁹ Yehova kanambe ngwenyi, Kanda nulionga ngwenu, A-Kaletea kechi katuhilukila mumu kumakeza.

¹⁰ Mumu chipwe munukumba tujita eswe ja A-Kaletea wano anase jita ni yenu, ndo mukusala waze halemana wika, mutu mweswe mu mbalaka yenyi, hindu kumakahinduka nikwocha chihunda chino ni kahia.

¹¹ Muze tujita twa A-Kaletea hakatuka ku Yerusaleme ha kukundama cha tujita twa Falau,

¹² Jeremia yakatuka ku Yerusaleme, akaye ku chifuchi cha Mbenjamine akatambule chihinga chenyi hakachi ka e atu.

¹³ Muze te haheta ku chikolo cha Mbenjamine, umwe kalayi jina lienyi Ilija mwana Shelemia, mwana Hanania yakwata profeta Jeremia ngwenyi, Unayi kuli A-Kaletea!

¹⁴ Jeremia yamba ngwenyi, Mahuza. Chayile kuli A-Kaletea. Alioze Ilija kasolo kupanjika; yakwata Jeremia, yamuneha kuli alemu.

¹⁵ Alemu yatenuka chinji ni Jeremia. Yamulamba ni kumuyikila mu zuwo lia mukwa kusonyeka Jonatas, mumu te halialumuna zuwo lia ususu.

¹⁶ Muze heza mu wina wa mbonge, hatwamamo matangwa anji,

¹⁷ mwanangana Zedekia yamusanyika, yamwivwa. Mwanangana yamuhulahula ku lumbu ukawo mu zuwo lienyi ngwenyi, Liji limwe liliko lia kuli Yehova? Jeremia ngwenyi, Kulili. Mba yaweza ngwenyi, Kumanukunjika ku moko ja mwanangana wa Babilonia.

¹⁸ Jeremia yamba nawa kuli mwanangana Zedekia ngwenyi, Chipi chika nalinga kuli yenu, hanji tuvumbi twenu, hanji akwa vungu lino, nukanguse mu zuwo lia ususu?

¹⁹ Aprofeta jenu aze aprofetezele kuli yenu ngwo, Mwanangana wa Babilonia kechi kwiza kulimika ni yenu hanji kulimika ni chifuchi chino, kulihi ali haliapwila?

²⁰ Kashika panjikenu kama, mwene wami mwanangana. Kuliumba chami cha vumbi chikahete kumeso jenu, kanda nunguhilwisa nawa ku zuwo lia mukwa kusonyeka Jonatas kuchina mungufwilako.

²¹ Kashika mwanangana Zedekia yatuma, mba yatwala Jeremia ku yize ya tulayi. Yamwaha nawa mbolo yimuwika tangwa ha tangwa ya ku tapalo lia akwa mbolo, ndo mbolo yeswe ya mu chihunda hiyahwa. Chocho Jeremia yatwama ku yize ya tulayi.