Jeremia 36 - MUKANDA USANDU WA ZAMBI 1975

¹ Ha mwaka wamuchiwana wa Jehoakime mwana Josia mwanangana wa Yu nda liji lino liejile kuli Jeremia lia kuli Yehova ngwenyi,

² Anda mukanda wa chivungo ukasonekemo maliji eswe hinamba kuli yena a kulimika ni Izalele ni Yunda ni mavungu eswe chize ku tangwa litangu nahanjikile ha matangwa a Josia ndo musono.

³ Hanji munyachi wa Yunda mevwa yuma yikalu yeswe yize ngunambe kulinga kuli ayo hanga mutu mweswe akatuke ku ndako jenyi jipi ngukaakonekene uhenge wo ni shili yo.

⁴ Mba Jeremia yasanyika Baruke mwana Neria, ni Baruke yasoneka ha mukanda wa chivungo maliji eswe a Yehova kuli Jeremia shimbu Jeremia mamusonekesa.

⁵ Jeremia yatuma Baruke ngwenyi, Yami hanangukanjisa kunjila mu zuwo lia Yehova,

⁶ kashika yena muoya, mba ha tangwa limwe lia kulitwamina kulia, mutanga mu matwi ja atu eswe mu zuwo lia Yehova maliji a Yehova, wasoneka mu mukanda shimbu nakusonekesene. Muatanga nawa mu matwi ja malunga eswe ja A-Yunda waze makatuka ku yihunda yo.

⁷ Hanji kulemba cho muchikaheta kumeso ja Yehova, mba mutu mweswe makatuka ku ndako jenyi jipi, mumu utenu ni ufwatulo Yehova hanavuluka kulimika ni wano atu, unene.

⁸ Baruke mwana Neria yalinga yize yeswe profeta Jeremia hamutumina, ha kutwala ku kutanga ku mukanda, maliji a Yehova mu zuwo lia Yehova.

⁹ Ha mwaka wamuchitano wa Jehoakime mwana Josia mwanangana wa Yunda, ha kakweji wamuchilivwa atu eswe mu Yerusaleme ni atu eswe waze akatukile ku yihunda ya Yunda nikwiza ku Yerusaleme, yatongola shimbu lia kulitwamina kulia kumeso ja Yehova.

¹⁰ Henaho, mu matwi ja atu eswe Baruke yatanga maliji a Jeremia ku mukanda mu zuwo lia Yehova mu chipatulo cha Gemaria mwana Shafane mukwa kusonyeka, te chili mu yize ya ku tunda, ku unjililo wa Chikolo Chaha cha zuwo lia Yehova.

¹¹ Muze Mikaia mwana Gemaria mwana Shafane, wevwile maliji eswe a Yehova ku mukanda,

¹² yaya ku zuwo lia mwanangana, mwe mu chipatulo cha mukwa kusonyeka. Alemu eswe te kokwene kwali; Elisama mwe mukwa kusonyeka, ni Ndelaia mwana Shemaia, ni Elenatane mwana Akopore, ni Gemaria mwana Shafane, ni Zedekia mwana Hanania ni alemu eswe.

¹³ Mikaia yaalweza maliji eswe hanevu muze Baruke yatanga mukanda mu matwi ja e atu.

¹⁴ Mba alemu eswe yatuma Yehudi mwana Netania mwana Shelemia mwana Kushi akambe kuli Baruke ngwenyi, Anda mu kwoko lie mukanda uze watanganga mu matwi ja atu, wize kuno. Chocho Baruke mwana Neria yakwata mukanda yeza kuli ayo.

¹⁵ O yamba kuli iye ngwo, Twama uutange. Chocho Baruke yaatangilawo.

¹⁶ Ha kwivwa maliji eswe yatala umwe kuli mukwo ni woma; yamba kuli Baruke ngwo, Chatutamba kwambulula maliji wano eswe kuli mwanangana.

¹⁷ Yahula Baruke ngwo, Utulweze chize wasonekene maliji wano eswe. Iya wakusonekeso?

¹⁸ Baruke ngwenyi, Iye wangusonekesene maliji wano eswe shimbu mungusoneka ni tinta ha mukanda.

¹⁹ Alemu yamba kuli Baruke ngwo, Yako ukaswame, ni yena ni Jeremia. Kanda nulweza niumwe kuze nuli.

²⁰ Mba o yaya ku yize ya mwanangana, muze hasa mukanda mu chipatulo cha mukwa kusonyeka Elisama. Yambulwila mwanangana e maliji eswe.

²¹ Mwanangana aye yatuma Yehudi akande mukanda; yauchiza mu chipatulo cha mukwa kusonyeka Elisama mba Yehudi yautanga kuli mwanangana ni kuli alemu aze eswe amanyine kwa kujingilika mwanangana.

²² Chapwile te ha kakweji wamuchilivwa, ni mwanangana kanatwama mu zuwo lienyi lia chishika. Kwapwile kahia mu jiko kumeso jenyi.

²³ Muze te Yehudi matanga yipinji yitatu hanji yiwana, mwanangana aye mayiteta ni kapoko akayimbile mu kahia kali mu jiko ndo mukanda weswe hiwahwa mu kahia ka mu jiko.

²⁴ Chipwe mwanangana, chipwe umwe wa tuvumbi twenyi waze evwile maliji wano eswe kevwile woma, chipwe kupula mazalo jo, ka.

²⁵ Chipwe Elenatane, ni Ndelaia, ni Gemaria alembelele kuli mwanangana kanda ocha mukanda, kaapanjikile.

²⁶ Mba mwanangana yatuma Jeramila mwana wa mwanangana, ni Seraia mwana Azriele, ni Shelemia mwana Abadiele akakwate mukwa kusonyeka Baruke ni profeta Jeremia, alioze Yehova waaswekele.

²⁷ Muze mwanangana hanocho mukanda uli ni maliji aze Baruke wasonekene shimbu Jeremia mamusonekesa, liji lia Yehova liejile kuli Jeremia ngwenyi,

²⁸ Anda mukanda ukwo wa chivungo ukasonekemo maliji atangu aze eswe apwile ha mukanda utangu uze Jehoakime mwanangana wa Yunda hanocho.

²⁹ Ha kutwala kuli Jehoakime mwanangana wa Yunda muwamba ngwe, Yehova kanambe ngwenyi, Hiunocho mukanda uno nikwamba ngwe, Kuchi te hiwasonekamo ngwe mwanangana wa Babilonia meza pundu ni kwonwona chifuchi chino, ni kutetamo mutu ni chimuna?

³⁰ Kashika ha kutwala kuli Jehoakime mwanangana wa Yunda Yehova kanambe ngwenyi, Kechi kupwa ni mutu kutwama ha ngunja ya David; chikwo nawa mujimba wenyi wa kufwa makaumbila ha chivukuminya cha mwalwa ni chishika cha ufuku.

³¹ Mungumwaha kastigu, iye ni waze masemuka kuli iye ni tuvumbi twenyi mumu ha uhenge wo. Mungukokela hali ayo, ni hali akwa Yerusaleme, ni hali malunga ja Yunda, yikalu yize yeswe hinatongola hali ayo alioze kapanjikile.

³² Henaho Jeremia yatambula mukanda Ukwo wa chivungo yauhana kuli mukwa kusonyeka Baruke mwana Neria, aye yasonekamo maliji aze eswe amusonekesene Jeremia ha mukanda uze Jehoakime mwanangana wa Yunda wochele mu jiko, alioze awezele maliji anji akwo a kulifwa no.