Jeremia 35 - MUKANDA USANDU WA ZAMBI 1975

¹ Liji lia Yehova liejile kuli Jeremia ha matangwa a Jehoakime mwana Josia mwanangana wa Yunda ngwenyi,

² Yako ku munyachi wa A-Rekabe uhanjike no, ukaanehe ku zuwo lia Yehova, muchima lia chipatulo chimwe, ukaahemo vinyu akanwe.

³ Chocho yingusaka Jazania mwana Jeremia, mwana Habazinia, ni ayayo, ni ana-akwo, ni ana jenyi a malunga eswe, we munyachi weswe wa A-Rekabe.

⁴ Yingwaneha mu zuwo lia Yehova, mu chipatulo cha ana ja Hanane mwana Igadalia, mutu wa Zambi, te chili hakamwihi ni chipatulo cha alemu helu lia chipatulo cha Maseia, mwana Shalume, mukwa kufunga chikolo.

⁵ Yingusa kumeso ja A-Rekabe milondo ya vinyu ni misenge. Yingwamba kuli ayo ngwami, Nwenu vinyu.

⁶ Alioze o yakumbulula ngwo, Kutuchi kunwa vinyu niyimwe mumu Jonadabe mwana Rekabe kalamba ketu yatwaha shimbi ngwenyi, Kunuchi kunwa vinyu chipwe yenu chipwe ana jenu ndo ku miaka.

⁷ Kunuchi katunga zuwo; kunuchi kalima mbuto; kunuchi katumba munda wa uva chipwe kuupita, alioze munukatwama mu mbalaka matangwa jenu eswe hanga matangwa jenu oke mu chifuchi kuze nwatwama.

⁸ Hitwononoka ku liji lia Jonadabe mwana Rekabe, kalamba ketu, mu yuma yeswe atwambile, kutushi kunwa vinyu matangwa jetu eswe, yetu ni mapwo jetu, ni ana jetu a malunga ni a mapwo.

⁹ Kutushi kutunga mazuwo a kutwamamo. Kutushi munda wa uva, chipwe wande, chipwe mbuto.

¹⁰ Hitwatwama mu mbalaka nikwononoka ni kulinga yize yeswe Jonadabe kalamba ketu watutumine.

¹¹ Alioze muze Nabukanezore mwanangana wa Babilonia wejile kwasa jita ni chifuchi chino twambile ngwetu, Tuyenu, tukandukenu ku Yerusaleme mumu ha woma wa tujita twa A-Kaletea ni tujita twa A-Seria. Kashika twatwama mu Yerusaleme.

¹² Henaho liji lia Yehova liejile kuli Jeremia:

¹³ Yehova-wa-Tujita, Zambi ya Izalele kanambe ngwenyi, Yako ukambe kuli malunga ja Yunda ni akwa Yerusaleme ngwe, Yehova kanambe ngwenyi, Kunuchi katambula longeso nukevwe maliji jami?

¹⁴ Shimbi yize Jonadabe mwana Rekabe hahana kuli ana jenyi kanda akanwa vinyu, hanayifungu kayinwine ndo musono, mumu hononoka ku shimbi ya kalamba ko. Ni yami hinahanjeka kuli yenu alioze kunwangupanjikile.

¹⁵ Hinatuma tuvumbi twami aprofeta eswe ni kulitwamina ka, ngwami, Alumukenu yenu eswe nukahichike mutu mweswe ndako jenyi jipi. Pemesenu yitanga yenu; kanda nukaula mazambi akwo nukaalingile, hanga nukatwame mu chifuchi chino nahanyine kuli yenu ni kuli tulamba twenu. Alioze kunwatelele matwi jenu, chipwe kungwivwa.

¹⁶ Ana ja Jonadabe mwana Rekabe hafunga shimbi yize kalamba ko waahele, alioze vungu lino kuliangwononokenene.

¹⁷ Kashika Yehova, Zambi-ya-Tujita, Zambi ya Izalele kanambe ngwenyi, Ngunaneha hali A-Yunda ni akwa Yerusaleme eswe yuma yize yikalu hinatongola kuli ayo. Mumu hingunahanjika kuli ayo hindu kevwile; hingunaasanyika hindu katayile.

¹⁸ Alioze kuli akwa munyachi wa Rekabe Jeremia yamba ngwenyi, Yehova-wa-Tujita, Zambi ya Izalele kanambe ngwenyi, Mumu hinunononoka ku shimbi ya kalamba kenu Jonadabe ni kufunga yiyulo yenyi yeswe, ni kulinga yize yeswe wanwambile,

¹⁹ kashika Yehova-wa-Tujita, Zambi ya Izalele kanambe ngwenyi, Jonadabe mwana Rekabe kechi kahona lunga kumana kumeso jami nilimwe tangwa.