Jeremia 34 - MUKANDA USANDU WA ZAMBI 1975

¹ Liji lino liejile kuli Jeremia lia kuli Yehova, muze Nabukanezore mwanangana wa Babilonia ni tujita twenyi eswe, ni mawanangana eswe a hashi aze iye te kanaayulu ni mavungu eswe kanase jita ni Yerusaleme ni yihunda yayo yeswe ngwenyi,

² Yehova Zambi ya Izalele kanambe ngwenyi, Yako uhanjike ni Zedekia mwanangana wa Yunda ukambe kuli iye ngwe, Yehova kanambe ngwenyi, Ngunahana chihunda chino kuli mwanangana wa Babilonia mba iye machocha ni kahia.

³ Kuchi kwomboka mu kwoko lienyi, alioze pundu makukwata ni kukukunjika kuli iye. Mukamona mwanangana wa Babilonia liso ni liso, mukahanjika nenyi meso ni meso mba muoya ku Babilonia.

⁴ Alioze ivwa liji lia Yehova, ena Zedekia mwanangana wa Yunda. Yehova kanambe ha kutwala kuli yena ngwenyi, Kuchi kafwa ni katana.

⁵ Kumuofwa ni sambukila. Ni chizechene ngwe ochele tumbuto twa lupembo mupema hali tulamba twe mianangana waze akutetekelele, chocho atu makwochela tumbuto twa lupembo mupema ni kukulila ngwo, Mama yami, mwata wetu! Mumu Yehova ngwenyi, Yami hinahanjika lie liji.

⁶ Mba profeta Jeremia wambile maliji wano eswe kuli Zedekia mwanangana wa Yunda, mu Yerusaleme,

⁷ shimbu tujita twa mwanangana wa Babilonia masa jita ni Yerusaleme, ni yihunda yeswe ya Yunda yize te yinasala, Lakishi ni Azeka, mumu yino te wika yasala ya yihunda ya kukolesa ya A-Yunda.

⁸ Liji lino liejile kuli Jeremia lia kuli Yehova muze te mwanangana Zedekia hakolesa usendo ni akwa Yerusaleme eswe akaahe shimbi ya utuswilo,

⁹ hanga mutu mweswe akatusule ndungo jenyi ja A-Hepreu, ni a malunga ni a mapwo, niumwe kanda apita Ka-Yunda usoko wenyi.

¹⁰ Ononokene, alemu eswe, ni atu eswe waze hanjila mu usendo wa kutusula mutu mweswe ndungo jenyi a malunga ni a mapwo hanga kechi kapichiwa nawa. Eswe yononoka, yaatusula.

¹¹ Alioze kulutwe yalumuka, yakwata cheka nawa ndungo ja malunga ni a mapwo waze te hanaatusula nikwazeyesa mu undungo.

¹² Liji liejile kuli Jeremia lia kuli Yehova:

¹³ Yehova Zambi ya Izalele kanambe ngwenyi, Ha kuchiza tulamba twenu ku chifuchi cha Engitu ku zuwo lia upinji nakolesele no usendo ngwami,

¹⁴ Ha mwaka wamuchishimbiali munutusula Ka-Hepreu ni mukwenu mweswe hinwalanda mba hanulingila miaka yisambano. Chanutamba kumutusula ku milimo yenu. Alioze tulamba twenu kapanjikile chipwe kutela matwi.

¹⁵ Matangwa akehe kunyima nwalikonyekene ni kulinga chipema kumeso jami ni kwambujola utuswilo, mutu mweswe kuli mukwo. Nwakolesele usendo kumeso jami mu zuwo lino haliluka jina liami.

¹⁶ Alioze nwalumukine ni kujilula jina liami ha kutambula nawa mutu mweswe ndungo jenyi ja malunga ni a mapwo waze te nwaatuswile nikulita ni mbunge jo, ni kwazeyesa mu undungo wenu.

¹⁷ Kashika Yehova kanambe ngwenyi, Kunwononokene kuli yami kwambujola utuswilo, mutu mweswe kuli usoko wenyi ni kuli mwenyembo wenyi. Kashika yami mungutusula hali yenu katana, ni chilungo, ni kapunga. Chocho kanambe Yehova. Kumunukapwa chuma cha lwaji ku mavungu eswe a hashi.

¹⁸ Waze atangwile usendo wami; kazangile kufunga shimbi ja usendo uze akolesele kumeso jami, apatwile mwana-ngombe nikupalika hakachi ka yihanda yenyi,

¹⁹ ni alemu ja A-Yunda, ni alemu ja Yerusaleme, ni aunuku, ni asasendote, ni akwa chifuchi eswe aze apalikile hakachi ka yihanda ya mwana-ngombe,

²⁰ mungwakunjika kuli akwa kole jo ni kuli waze anazange kwashiha. Mijimba yo muyipwa kulia kuli tujila a mu tetela ni kuli tushitu a mu yambu.

²¹ Ni Zedekia mwanangana wa Yunda ni alemu jenyi mungwakunjika kuli akwa kole jo, ni kuli waze anazange kwashiha, ni kuli tujita twa mwanangana wa Babilonia waze te hanakatuka kuli yenu.

²² Yehova kanambe ngwenyi, Mungutuma shimbi, mungwahilwisa nawa ku chihunda chino, akase nacho jita, akachitambule, akachoche ni kahia. Mungupwisa yihunda ya mu Yunda mwamokomoko kumushi atu.