Jeremia 33 - MUKANDA USANDU WA ZAMBI 1975

¹ Liji lia Yehova yiliza kuli Jeremia chisuho chamuchiali shimbu te atwama wa kuyikila mu yize ya tulayi ngwo,

² Chino kanambe Yehova Tangi ya hashi, Yehova mukwa kuwumba hashi akakoleseho—jina lienyi Yehova, ngwenyi,

³ Ngusanyikenu mba mungukumbulula. Mungunulweza yuma yinene ya kuhengeka yize te kunwayinyingikine.

⁴ Mumu Yehova Zambi ya Izalele kanambe ha kutwala ku mazuwo a mu chihunda chino ni mazuwo ja mianangana ja Yunda waze apuzwile akaatenge a kulilamwina no ku milumba ya kuseleka ni ku katana ngwenyi,

⁵ A-Kaletea kananjila mukwasa jita ni kwazalisa ni mijimba ya afu aze mungulamba mu utenu wami ni ufwatulo wami, mumu hinaswekela meso jami chihunda chino mumu ha ungulungulu wo.

⁶ Kumungukanehako kuhinduka ni kuwuka; mungwawuka nikwasolwela kulumbama cha kuwaha ni kujikiza.

⁷ Mungukahilwisa kuwaha cha Yunda ni kuwaha cha Izalele, nikwatunga nawa chize apwile hatangu.

⁸ Mungukaapemesa ku uhie wa kunguvulumuna; mungukakonekena uhie wa kunguvulumuna ni kungukatukila.

⁹ Ni chihunda chino kumuchikapwa kuli yami jina lia uwahililo, ni uhaliso, ni uhenya kumeso ja mavungu eswe a hashi waze mevwa yipema yize yeswe mungwalinga. O kumakevwa woma ni kuchikima mumu ha yipema yeswe ni kuwaha cheswe mungwalingila.

¹⁰ Yehova kanambe ngwenyi, Muno mwene enu nwakwamba ngwenu, Munapu mwa hululu, kumushi atu chipwe yimuna, ni mu yihunda ya Yunda, ni mu matapalo ja Yerusaleme muze munapu mwamokomoko, kumushi atu, chipwe akwa kutungako, chipwe yimuna, ngwami,

¹¹ kumakevwa nawa liji lia kusehejela, ni liji lia chiseke, ni liji lia sandungi, ni liji lia ndungi, ni liji lia njimba shimbu manehaneha milambu ya kusakwila ku zuwo lia Yehova ngwo, Sakwililenu kuli Yehova-wa-Tujita mumu Yehova iye mupema, mumu utu wa zango lienyi wa mutolo. Mumu kumungukahilwisa kuwaha cha chifuchi chize chapwile hatangu. Chocho kanambe Yehova.

¹² Yehova-wa-Tujita kanambe ngwenyi, Muno mwene munapu mwa hululu, kumushi atu chipwe yimuna, ni mu yihunda yamo yeswe, kumukukapwa mazuwo ja tufunga kanahwimisa yimuna jo.

¹³ Mu yihunda ya ku milundu, mu yihunda ya mu Shefela, ni mu yihunda ya Negeve, mu chifuchi cha Mbenjamine, ni mu yihela ya kujingilika Yerusaleme, ni mu yihunda ya Yunda, yimuna kumakapalika nawa kushi lia moko ja mukwa kwaalula. Chocho kanambe Yehova.

¹⁴ Yehova kanambe ngwenyi, Matangwa kaneza muze mungumanuna chilakenyo chize nalakenyene ni munyachi wa Izalele, ni munyachi wa Yunda.

¹⁵ Ha matangwa aze ha mwaka uze mungusokesa Mutango wa ululi hali David. Iye kumakalinga ululi ni kulita mu chifuchi.

¹⁶ Ha matangwa aze A-Yunda makaalamwina ni Yerusaleme matwama ni sambukila. Jina liako mulikapwa—Yehova ululi wetu.

¹⁷ Mumu Yehova kanambe ngwenyi, David kechi kahona lunga kutwama ha ngunja ya munyachi wa Izalele,

¹⁸ ni asasendote ja Levi kechi kahona lunga kumeso jami kulambula milambu ya kulumba, ni kulumba milambu ya wunga nikulambula yitapo ndo ku miaka ya mutolo.

¹⁹ Liji lia Yehova liejile kuli Jeremia ngwenyi,

²⁰ Yehova kanambe ngwenyi, Nyi munuhasa kushiha usendo wami ni mwalwa, ni usendo wami ni ufuku hanga mwalwa ni ufuku kuuchi kwiza ha ola yayo ya kufunjika,

²¹ nyi chocho, ni usendo wami ni David muutá kuushiha hanga kechi kapwa ni mwana wa lunga kutwama ha ngunja yenyi, ni usendo wami ni tuvumbi twami asasendote ja Levi.

²² Chizechene ngwe akwa mwilu kechi kuhasa kwaalula, ni masekeseke a ku kalunga-lwiji kechi kahasa kwaeseka, chocho mungwokesa waze masemuka kuli kavumbi kami David, ni asasendote ja Levi waze akunguvumbika.

²³ Liji lia Yehova liejile kuli Jeremia ngwenyi,

²⁴ Kwevwile chize wano atu anambe ngwo, Yehova hanalitunu minyachi yize yiali atongwele? Chocho hanalelesa atu jami ngwe kapwile vungu kumeso jo.

²⁵ Yehova kanambe ngwenyi, Nyi chakolesele usendo wami ni mwalwa ni ufuku ni je shimbi ja mwilu ni hashi,

²⁶ mba mungulituna waze masemuka kuli Yakomba ni kavumbi kami David; chichi katongola umwe wa waze masemuka kuli iye kuyula vungu lia Apalahama, ni Izake, ni Yakomba. Mumu mungukahilwisa kuwaha cho; mungukaavwila keke.