Jeremia 31 - MUKANDA USANDU WA ZAMBI 1975

¹ Yehova kanambe ngwenyi, Ha mwaka uze mungukapwa Zambi ya minyachi yeswe ya A-Izalele mba o kumakapwa atu jami.

² Yehova kanambe ngwenyi, Atu aze kafwile ni katana awanyine vumbi mu puya. Muze A-Izalele afupile uhwimino,

³ Yehova wasolokele kuli ayo nikukatuka kusuku. Hinanuzanga ni zango lia mutolo, kashika hinakukoka ni utu wa zango.

⁴ Mungukutunga cheka nawa ena *virgem Izalele! Kumukatungiwa. Cheka nawa mukalipemesa ni tumikupiela ukaye ukahangane ni akwa kusehejela.

⁵ Cheka nawa mukatumba minda ya miuva ha milundu ya Samaria. Akwa kutumba matumba, mba mayuka ni mihuko.

⁶ Mumu tangwa muliza muze tulayi masanyika mu chifuchi cha Eframe ku milundu ngwo, Katukenu tuye ku Zaione kuli Yehova Zambi yetu.

⁷ Mumu Yehova kanambe ngwenyi, Imbenu ni liji linene lia chiseke mumu hali Yakomba; likwizenu mumu hali mukwa lutwe hakachi ka mavungu. Ambululenu; halisenu nikwamba ngwenu, Yehova hanalamwina atu jenyi, e masalila ja A-Izalele.

⁸ Mungwachiza ku chifuchi cha ku Norte, mungwakonga chize ku kusula-songo lia hashi. Hakachi ko kumukukapwa afwa-meso ni yitonji, ni tufumba ni tufumbakaji hamuwika, mbunga yinene, eswe makahiluka kuno kwene.

⁹ Meza nikulila, mungwakoka ni kwalembejeka. Mungwaendesa ku yitwetwe ya meya mu jila yimwe yalulama muze kechi katalinga; mumu nguli tato kuli A-Izalele. Eframe mwe mwanami mutangu.

¹⁰ Enu mavungu, panjikenu liji lia Yehova nukaliambulule ku yifuchi ya mbaka kusuku. Ambenu ngwenu, Yoze wamwangine Izalele kumakamukonga nawa ni kumufunga ngwe kafunga kakuhinga mapanga jenyi.

¹¹ Mumu Yehova hakula Yakomba hamukula ku moko aze amukumbile ni tachi.

¹² Kumakeza ni kwimba ni liji linene ha mulundu wa Zaione; kumakalikwiza ha yuma yipema ya Yehova, mbuto, ni vinyu, ni maji, ni misamba ya mapanga ni ngombe. Mwono wo kumuukapwa ngwe chala cha kutuchika, mba kechi kahonga nawa.

¹³ Henaho ana-mapwo makawahilila ni kuhangana ni akweze ni makulwana makasehejela. Mungwalumuna kulila cho mu uwahililo. Mungwalembejeka; mungwaaha chiseke ha chinyengo cho.

¹⁴ Mungukayukisa mbunge ja asasendote ni kulumbama ni atu jami kumakayuka ni upeme wami. Chocho kanambe Yehova.

¹⁵ Yehova kanambe ngwenyi, Liji limwe analivu mu Rama, kulila mbimbi; kulila chisasu. Rakele kanalilila ana jenyi. Katayile amulembejeke hali ana jenyi, mumu keshiko.

¹⁶ Yehova kanambe ngwenyi, Funga liji lie; kanda ulila. Funga meso je; kanda ahita masoji, mumu milimo ye makwononwenayo ni ana je kumakakatuka ku chifuchi cha akwa kole akeze ku chifuchi cho. Chocho kanambe Yehova.

¹⁷ Yehova kanambe ngwenyi, Kutalatala kuchili ha kutwala ku yuma yenu ya kulutwe. Ana jenu kumakahiluka ku chifuchi cho.

¹⁸ Hinevwa A-Eframe nikutwa mikuma ngwenyi, Hiwangufumba mba nafumbiwa ngwe musamba wa ngombe yoze kanda amuhombwesa. Nguhilwise kama hanga ngukahuzuluke mumu uli Yehova Zambi yami.

¹⁹ Kulutwe lia kuhambuluka nalikonyekene. Muze te hangulongesa nalilambile ha shina lia kulu. Nevwile sonyi, nalitupiekele mumu napwile ni kusauka cha ukweze wami.

²⁰ Eframe iye mwanami wa lunga mulemu nyi? Iye mwanami wa zango nyi? Mumu cheswe munguhanjika cha kulimika nenyi kunakumwiwuluka hindu. Kashika mbunge yami yakumuvwila usona. Pundu, mungumuvwila keke. Chocho kanambe Yehova.

²¹ Liselenu tema jikenu yinyingi ya jila hali yenwene; nyongenu kanawa Chikoka, tapalo lize nwayilile. Hiluka *virgem Izalele! Hiluka ku yihunda ye yino.

²² Ndo mwiji muka mukakashana, ena mwanami wa pwo mukwa mafwefwe? Mumu Yehova hatanga chuma chaha hano hashi. Pwo majingilika lunga.

²³ Yehova-wa-Tujita, Zambi ya Izalele kanambe ngwenyi, Cheka nawa mamba maliji ano mu chifuchi cha Yunda ni mu yihunda yako muze munguhilwisa kuwaha cho ngwo, Yehova akuwahise, ena zuwo lia ululi, ena mulundu usandu.

²⁴ Mba Yunda ni yihunda yako yeswe makatwamako hamuwika, ni njimi ni akwa kwendangana ni yimuna jo.

²⁵ Mumu munguyukisa mbunge ya yikatalo; munguzalisa mbunge yeswe yinahongo.

²⁶ Henaho nalawile, natalile; kumanyi tulo twami anguwahila.

²⁷ Yehova kanambe ngwenyi, Matangwa kaneza muze munyachi wa Izalele ni munyachi wa Yunda mungukuwako mbuto ya atu ni mbuto ya tushitu.

²⁸ Mba chizechene ngwe hinaatala kutukula, ni kupuzula, ni kununguna, ni kwonwona, ni kukoka yuma yikalu, chocho mungwatala kutunga ni kutumba. Chocho kanambe Yehova.

²⁹ Ha matangwa aze kechi kwamba nawa ngwo, Atato halia uva jisasu mba mu makanwa ja ana mwapangaminya.

³⁰ Alioze mutu mweswe mafwila mulonga wenyi mwene; mutu mweswe malia uva jisasu mevwa kupangaminya ku mazo.

³¹ Yehova kanambe ngwenyi, Matangwa kaneza muze mungukolesa usendo waha ni akwa munyachi wa Izalele ni akwa munyachi wa Yunda.

³² Yehova kanambe ngwenyi, Chichi kulinga usendo ngwe uze nalingile ni tulamba two muze naakwachile ku kwoko ngukaachize ku chifuchi cha Engitu. Usendo wami autangwile chipwe napwile mukwolunga.

³³ Alioze Yehova kanambe ngwenyi, Usendo mungukolesa ni munyachi wa Izalele kulutwe lia matangwa aze uno, Mungukasa shimbi yami muchima lio, ni kuyisoneka ha mbunge jo. Mungukapwa Zambi yo, no makapwa atu jami.

³⁴ Mutu kechi kalongesa mwenyembo wenyi, hanji usoko wenyi, ngwenyi, Nyingika Yehova mumu eswe mangunyingika chize kuli mukepe Wahiana ndo kuli munene Wahiana. Mumu mungukonekena uhenge wo; chichi kwiwuluka nawa shili yo. Chocho kanambe Yehova.

³⁵ Mwe Yehova yoze wahanyine tangwa likapwe pangu ha mwalwa, ni jila ya kufunjika ya kakweji ni matongonoshi akahane pangu ha ufuku; yoze wakuvundula kalunga-lwiji ndo mikanya yenyi muyihanjika lundunjila— jina lienyi, Yehova-wa-Tujita,

³⁶ kanambe ngwenyi, Nyi kwenda chino cha kufunjika muchihona kumeso jami (chocho kanambe Yehova) mba ana ja A-Izalele mahasa kuhona kupwa vungu kumeso jami ndo ku miaka.

³⁷ Yehova kanambe ngwenyi, Nyi mahasa kweseka malilu, nyi mahasa kupolongoza ku fundamentu ya hashi mba mungumbila waze eswe masemukina kuli A-Izalele mumu ha yize yeswe halinga. Chocho kanambe Yehova.

³⁸ Yehova kanambe ngwenyi, Matangwa kaneza muze matungila Yehova chihunda chino chize ku kaposhi ka Hananele ndo ku chikolo cha mbango.

³⁹ Ni muhipu wa kweseka muuhiana hindu ndusu ndo ku mulundu wa Ngarebe, mba muujinga ndo ku Ngoa.

⁴⁰ Mungulunga weswe wa mijimba ya afu, ni we uto, ni minda yeswe ndo ku chitwetwe cha Kendrone, ndo ku mbango ya chikolo cha tuvwalu kutalikisa ku Chivumbuko, cheswe muchipwa chisandu kuli Yehova. Kechi kachitukula hanji kuchinunguna nawa ndo ku miaka.