Jeremia 30 - MUKANDA USANDU WA ZAMBI 1975

¹ Liji lino lia Yehova liejile kuli Jeremia ngwenyi,

² Yehova Zambi ya Izalele kanambe ngwenyi, Soneka mu mukanda maliji wano eswe hinamba kuli yena.

³ Mumu Yehova kanambe ngwenyi, Matangwa kaneza muze munguhilwisa kuwaha cha atu jami A-Izalele ni A-Yunda. Mungukaaneha nawa ku chifuchi chize nahanyine kuli tulamba two, mba makachizuka. Chocho kanambe Yehova.

⁴ Wano e maliji Yehova wambile ha kutwala kuli A-Izalele ni A-Yunda ngwenyi,

⁵ Yehova kanambe ngwenyi, Hitwevwa muteto wa mwongo, wa woma, ni sambukila ka.

⁶ Hulenu haliapwila nuse chinyingi; lunga mahasa kufumbajala ni mwana? Nyi chocho kuchi te ngunamono lunga mweswe ni moko jenyi ha chiminga ngwe pwo ni misongo? Kuchi te meso eswe hanalumuka a woma?

⁷ Lwangu! Mumu lie tangwa lino lialema naye kukushi likwo lia kulifwa. Liapwa tangwa lia lamba kuli Yakomba; hindu makaalamwina ku lamba lino.

⁸ Yehova-wa-Tujita kanambe ngwenyi, Muchikapwa ha tangwa lize mungukamakuna kanga ha makota jo; mungukapatwola mihipu yo, mba yilambala kechi kaatenga nawa ngamba.

⁹ Alioze makalingila Yehova Zambi yo ni David mwanangana wo yoze mungusolola mumu hali ayo.

¹⁰ Kashika Yehova kanambe ngwenyi, Kanda wivwa woma, yena Yakomba kavumbi kami, ni yena Izalele kanda ulishimwoka, mumu mungukakulamwina chipwe kusuku. Mungukalamwina ana je ku chifuchi cha ufunge wo. Yakomba makahiluka ni kuhola ni kuhwima, niumwe mamukolesa woma.

¹¹ Mumu Yehova kanambe ngwenyi, Yami kunguli hamwe ni yena kukulamwina. Mungumanununa liakulu mavungu eswe kuze hinakumwangina, alioze chichi kakumanununa yena. Mungukufwetesa ni kulita; chichi katá kukuhichika ni kastigu yakuhi.

¹² Mumu Yehova kanambe ngwenyi, Yikola ye kuyishi yitumbo; mbandu ye yipi chikolo.

¹³ Niumwe keshiko kuhakwila chikuma che; niyimwe yitumbo ha mbandu ye, kuwuka kuchishiko hali yena.

¹⁴ Waze eswe akuzangile hanakuvulama; kakusele mbunge nichimwe, mumu hinakulamba ngwe nguli mukwa kole, hinakufwetesa ngwe nguli mukwa kulimika keshi keke, mumu uhie we unene, milonga ye kumeso ja atu eswe.

¹⁵ Kuchi te wakulitetela ha yikola ye? Yikola ye kuyishi yitumbo. Hinakulinga yuma yino mumu uhie we unene, milonga ye kumeso ja atu eswe.

¹⁶ Kashika waze akukunongesa kumakanonga, akwa kole je eswe kumaya ku ufunge, e eswe lume. Waze mapunda upite we kumakaapunda. Waze eswe makupupa kumakapupiwa.

¹⁷ Mumu Yehova kanambe ngwenyi, Mungukwaha nawa kuhinduka che; munguwuka mbandu je, mumu hakwamba ngwe uli wa kumbila, ngwo, Mwe Zaione niumwe kanamuse mbunge.

¹⁸ Yehova kanambe ngwenyi, Munguhilwisa kuwaha cha mbalaka ja Yakomba; munguvwila keke mazuwo jenyi. Makatunga cheka nawa che chihunda ha mulumba wacho, ni zuwo lia mwanangana mulikamana kuze liapwile kushi.

¹⁹ Momwene mukatuhukila miaso ya kusakwila, ni maliji ja akwa kusehejela. Mungukaokesa; kechi katepuluka; mungukaaha ulemu; kechi kakeha.

²⁰ Ana jo makapwa chizechene apwile kushi, ni chikungulwila cho muchikakola kumeso jami. Mungukahana kastigu kuli waze eswe maapinjisa.

²¹ Mwanangana wo makapwa umwe niwo, mukwa kwayula masolokela hakachi ko. Mungukamukundamisa mba meza kuli yami, mumu iya mahamuka kukundama kuli yami ni poko yenyi mwene? Chocho kanambe Yehova.

²² Mba munupwa atu jami ni yami mungupwa Zambi yenu.

²³ Talenu kangonga ka Yehova! Ufwatulo hanauputuka; Kakundukundu wa chijimbi. Makahulumukina ha mitwe ya yingulungulu.

²⁴ Utenu usasu wa Yehova kuuchi kahiluka ndo halinga ni kumanuna upale wa manyonga jenyi. Ha matangwa a kusula chino muchinulumbunuka.