Jeremia 3 - MUKANDA USANDU WA ZAMBI 1975

¹ Nyi mutu malakula pwo lienyi aye makatuka kuli iye, maya ulo weka, te mamuhilukila nawa? Chifuchi chize te kuchichi kupiha chikolo nyi chocho? Mba Yehova kanambe ngwenyi, Yena hiwalinga ukoi ni akwa kukuzanga anji; mba muhiluka nawa kuli yami?

² Hetula meso je ku milundu kuyishi mitondo utale! Halihi kapombele ni yena? Kwe ku masesa a majila hiwatwaminyina akwa kukuzanga, ngwe Ka-Arabe mu puya. Hiwapihisa chifuchi ni ukoi we upi.

³ Kashika hakumina vula wa chehu ni vula wa samakwasa kejile. Hindu uli ni huma lia chikoi; kusolo kwivwa sonyi.

⁴ Ngwami haliapwila wangusanyika ngwe, Tata, uli sepa lia ukweze wami—

⁵ te matenuka matangwa eswe? Mapwa ni matoto ndo ku songo? Kuhanjika hiwahanjika, alioze hiwalinga chipi cheswe hiwahasa.

⁶ Yehova yamba kuli yami ha matangwa a mwanangana Josia ngwenyi, Hiwamona chize yono Izalele mukwa mafwefwe halinga? Hiwamona chize haya ku mulundu weswe usuku ni mushi lia mutondo weswe wa wisu nikulinga ukoi?

⁷ Hindu nanyonga ngwami, Muze halinga chino cheswe mahiluka kuli yami. Alioze kahilukile, ni yayo wa mahuza Yunda yachimona.

⁸ Aye yamona ngwe ha utanji weswe wa yono mukwa mafwefwe Izalele hinamuhuma ni mukanda wa kulakula. Hindu yayo wa mahuza Yunda kevwile woma alioze iye nawa yaya nikulinga ukoi.

⁹ Mumu ukoi yiulela kuli iye, kashika yachisa chifuchi cheswe nikulinga utanji ni mawe ni mitondo.

¹⁰ Alioze chipwe ni yino yuma yeswe hindu yayo wa mahuza Yunda kahilukile kuli yami ni mbunge yeswe alioze yalionga. Chocho kanambe Yehova.

¹¹ Ni Yehova yamba kuli yami nawa ngwenyi, Uhie wa mukwa mafwefwe Izalele ukepe, wa mukwa mahuza Yunda unene.

¹² Yako ukambe maliji ano nikutalikisa ku Norte ngwe, Yehova kanambe ngwenyi, Mukwa mafwefwe Izalele, hiluka. Chichi kukutala ni utenu mumu nguli mukwa keke. Yehova kanambe ngwenyi, Chichi kutenuka ndo ku miaka yeswe.

¹³ Tayiza uhie we, ngwe hiwakatukila Yehova Zambi ye, nikuzangazanga yilambala mushi lia mutondo weswe wa wisu, ni kwononoka ku liji liami ka. Chocho kanambe Yehova.

¹⁴ Yehova kanambe ngwenyi, Hilukenu enu ana a mafwefwe, mumu yami nguli mukwa kunuyula. Mungunwandanda umuwika ku chihunda aku hanji aali ku munyachi umwe, ni kununeha ku Zaione.

¹⁵ Mungukanwaha tufunga nikulita ni mbunge yami waze manulisa ni mana ni chinyingi.

¹⁶ Yehova kanambe ngwenyi, Mba muze munusema ni kuliokesa mu chifuchi, ha matangwa aze kechi kamba nawa ngwo, Mushete wa usendo wa Yehova! Kechi kaunyonga, hanji kuwiwuluka, hanji kuufupa. Kechi kaulinga nawa.

¹⁷ Ha miaka yize matongola Yerusaleme ngwo, Ngunja ya Yehova, ni mavungu eswe maswilako kumeso ja Yehova mu Yerusaleme mba kechi kasa nawa pami kukaula mbunge ja ayo ene jipi.

¹⁸ Ha matangwa aze munyachi wa Yunda muulinunga ni munyachi wa Izalele mba hamuwika makatuka ku chifuchi cha Norte ni kwiza ku chifuchi chino nahanyine chihinga kuli tulamba twenu.

¹⁹ Nangyonga chize mungukusa hakachi ka ana jami a malunga nikukwaha chifuchi chipema, chihinga chahiana kuwaha hakachi ka mavungu eswe. Nanyonga ngwami, Mangutongola ngwenyi, Tata. Mangukaula, kechi kapianguka.

²⁰ Pundu, ngwe pwo mukwa mafwefwe mahichika lunga lienyi, chocho yenu hinwapwa ni mafwefweni yami enu munyachi wa Izalele. Chocho kanambe Yehova.

²¹ Liji limwe kanalivu ha milundu kuyishi mitondo, ana ja Izalele a malunga kulila ni kulembelela mumu hanahengesa majila jo, ni kuvulama Yehova Zambi yo.

²² Enu ana a mafwefwe hilukenu, mba munguwuka mafwefwe jenu. Tuneza kuli yena mumu uli Yehova Zambi yetu.

²³ Pundu mindundena yinapu ya kutwonga ni mizumbu ya ha milundu. Pundu, ulamwino wa Izalele uli muli Yehova Zambi yetu.

²⁴ Chize ku ukweze wetu che chuma cha sonyi hichalia yuma yize yeswe tulamba twetu ahondanganyinyine ni mapanga jo, ni ngombe jo, ni ana jo a malunga ni a mapwo.

²⁵ Tupombenu mu sonyi jetu, ulelu wetu utufuke mumu hitwavulumuna Yehova Zambi yetu, ni yetu ni tulamba twetu chize ku ukweze wetu ndo musono. Kutwononokene ku liji lia Yehova Zambi yetu.