Jeremia 29 - MUKANDA USANDU WA ZAMBI 1975

¹ Wano e maliji a mukanda profeta Jeremia ku Yerusaleme yautuma kuli makulwana ja njize ni kuli asasendote, ni kuli aprofeta, ni kuli atu eswe, waze Nabukanezore te hachiza ku Yerusaleme nikwatwala ku Babilonia.

² Chino chapwile muze mwanangana Jekonia, ni naye mwanangana, ni aunuku, ni alemu ja mu Yunda ni Yerusaleme, ni yilangaji, ni fuli, eswe hakatuka ku Yerusaleme.

³ Yatuma mukanda mu kwoko lia Eleasa mwana Shafane, ni Gemaria mwana Hilekia waze Zedekia mwanangana wa Yunda yatuma kuli Nabukanezore mwanangana wa Babilonia. Mu mukanda yamba ngwenyi,

⁴ Yehova-wa-Tujita, Zambi ya Izalele kanambe kuli njize eswe hachiza ku Yerusaleme ni kutuma ku Babilonia ngwenyi,

⁵ Tungenu mazuwo nukatwamemo; limenu minda nukalieko.

⁶ Mbatenu mapwo nukaseme ana ja malunga ni ja mapwo; mbachilenu mapwo anenu a malunga hangisenu anenu a mapwo, hanga akaseme ana ja malunga ni ja mapwo. Liokesenu, kanda nutepuluka.

⁷ Wahisenu chihunda kuze hinanutuma ngwe njize nukachilembele kuli Yehova mumu nyi muchiwaha ni yenu munuwaha.

⁸ Mumu Yehova-wa-Tujita, Zambi ya Izalele kanambe ngwenyi, Kanda nutayiza aprofeta ni tahi waze atwama hakachi kenu kunwonga. Kanda nupanjika ku yilota yize akulota,

⁹ mumu kananuprofetezela mahuza mu jina liami. Ami chaatumine. Chocho kanambe Yehova.

¹⁰ Mumu Yehova kanambe ngwenyi, Muze makumi shimbiali a miaka hamanunuka ku Babilonia mungununangisa; mungumanununa kuli yenu chize nalakenyene. Mungunuhilwisa ku chifuchi chino.

¹¹ Yehova kanambe ngwenyi, Ngunanyingika manyonga aze nguli no hali yenu; manyonga a kunuwahisa hi kunupinjisa ko. Manyonga a kunwaha kutalatala ku yuma ya kulutwe.

¹² Mba munutambika kuli yami, nikwiza ni kulemba kuli yami mba mungunwivwa.

¹³ Munungufupa mba mununguwana, nyi munungufupa ni mbunge jenu jeswe.

¹⁴ Yehova kanambe ngwenyi, Mununguwana mba munguhilwisa kuwaha chenu ni kunukonga ni kunuchiza ku mavungu eswe ni yifuchi yeswe kuze hinanuhumina mba mungunuhilwisa nawa ku chifuchi kuze nanuchijile hatangu ngukanutume ku unjize. Chocho kanambe Yehova.

¹⁵ Mumu hinwamba ngwenu, Yehova hatwaha aprofeta mu Babilonia—

¹⁶ Yehova kanambe ha kutwala kuli mwanangana yoze unatwama ha ngunja ya David ni ha kutwala kuli atu aze eswe anatwama mu chihunda chino, usoko wenu waze kayile ni yenu ku unjize,

¹⁷ Yehova-wa-Tujita kanambe ngwenyi, Talenu, ngunatumu kuli ayo katana, ni kapunga, ni chilungo, mba mungwapwisa ngwe makuyu aze hapiha chocho niumwe kahashile kwalia.

¹⁸ Mungwakaula ni katana, ni kapunga, ni chilungo; mungwapwisa chuma cha lwaji ku mavungu eswe a hashi, akapwe shingo, ni mwongo, ni musozo, ni luchoko hakachi ka mavungu kuze hinaahumina,

¹⁹ mumu kapanjikile maliji jami, Yehova ngwenyi, Nalikolezele kutuma ni tuvumbi twami aprofeta alioze kunwapanjikile.

²⁰ Ivwenu liji lia Yehova, enu njize eswe hinachiza ku Yerusaleme ni kunutuma ku Babilonia.

²¹ Yehova-wa-Tujita, Zambi ya Izalele kanambe ha kutwala kuli Ahabe mwana Kolaia ni Zedekia mwana Maseia waze ananuprofetezela mahuza mu jina liami ngwenyi, Mungwakunjika mu moko ja Nabukanezore mwanangana wa Babilonia mba iye maashiha kwe kumeso jenu.

²² Ha mukunda wo shingo lino malishinga nalio njize eswe ja A-Yunda waze ali mu Babilonia ngwo, Yehova akupwise ngwe Zedekia ni Ahabe waze mwanangana wa Babilonia wochele ni kahia.

²³ Mumu halinga uhepuke mu Izalele; halinga utanji ni mapwo ja akwo, hanahanjika mu jina liami maliji a mahuza aze chaatumine. Yami ngunachinyingika ni yami nguli chela. Chocho kanambe Yehova.

²⁴ Kuli Shemaia wa ku Nehelame muwamba ngwe,

²⁵ Yehova-wa-Tujita, Zambi ya Izalele kanambe ngwenyi, Ena hiwatuma mikanda mu jina lie kuli atu eswe a mu Yerusaleme, ni kuli sasendote Zefania mwana Maseia ni asasendote eswe ngwo,

²⁶ Yehova hakupwisa sasendote kusalakana sasendote Jehoiada, ukapwe ni chiyulo cha zuwo lia Yehova helu lia chizaluke mweswawo yoze maprofeteza, ukamuse mu kuli ja ku moko ni ku kota.

²⁷ Kuchi te kwakanjishile Jeremia wa ku Anatote, yoze unaprofeteza kuli yenu?

²⁸ Mumu iye hatuma kuli yetu ku Babilonia ngwenyi, Unjize wenu muupwa wa miaka kashika tungenu mazuwo nukatwamemo; limenu minda nukalieko.

²⁹ Sasendote Zefania yatanga mukanda uno mu matwi ja profeta Jeremia.

³⁰ Mba liji lia Yehova yiliza kuli Jeremia ngwenyi,

³¹ Tuma kuli njize eswe ngwe, Yehova kanambe ha kutwala kuli Shemaia wa ku Nehelame ngwenyi, Mumu Shemaia haprofeteza kuli yenu muze yami chamutumine, nikunufulielesa mahuza,

³² kashika munguhana kastigu kuli Shemaia wa ku Nehelama ni kuli waze eswe makasemukina kuli iye, ngwami, Kechi kupwa ni niumwe mukwa mwono hakachi ka vungu lino kumona chipema chize mungulinga kuli atu jami mumu ha kuhanjika yuma ya kukatukila Yehova. Chocho kanambe Yehova.