Jeremia 28 - MUKANDA USANDU WA ZAMBI 1975

¹ Ha mwaka uze wene, ha kuputuka kuyula Zedekia mwanangana wa Yunda ha kakweji wamuchitano ha mwaka wamuchiwana, Hanania mwana Azure profeta wa ku Ngibeone yahanjika ni yami mu zuwo lia Yehova, kumeso ja asasendote ni atu eswe ngwenyi,

² Yehova-wa-Tujita Zambi ya Izalele kanambe ngwenyi, Hinapatula kanga ya mwanangana wa Babilonia.

³ Shimbu miaka yiali kanda yihwa munguhilwisa kuno yikwachilo yeswe ya zuwo lia Yehova, yize Nabukanezore mwanangana wa Babilonia wachijile kuno nikuyitwala ku Babilonia.

⁴ Kumunguneha nawa ku chifuchi chino Jekonia mwana Jehoakime mwanangana wa Yunda, ni njize eswe a ku Yunda waze ayile ku Babilonia, mumu mungupatula kanga ya mwanangana wa Babilonia. Chocho kanambe Yehova.

⁵ Mba profeta Jeremia yahanjika ni profeta Hanania, kumeso ja asasendote ni atu eswe waze te anamana mu zuwo lia Yehova.

⁶ Profeta Jeremia yamba ngwenyi, Chikapwe chocho! Ngunazange Yehova alinge chocho. Yehova akalinge nikulita ni maliji hiwaprofeteza akachize ku Babilonia yikwachilo ya mu zuwo lia Yehova, ni njize eswe nikwahilwisa kuno cheka nawa.

⁷ Hindu, panjikenu liji lino ngunambe mu matwi jenu ni mu matwi ja wano atu eswe.

⁸ Ngwami, Aprofeta waze atutetekelele chize ku miaka ya shakulu aprofetezele jita, ni kapunga, ni chilungo ya kulimika ni yifuchi yinji ni mawanangana anene.

⁹ Mba profeta yoze maprofeteza ngwenyi, Sambukila, muze liji lia profeta yoze mulimanunuka, mba eswe manyingika ngwo, Pundu, Yehova hatuma yono profeta.

¹⁰ Henaho profeta Hanania yachiza kanga ku kota ya profeta Jeremia, yayipatula.

¹¹ Hanania yahanjika kumeso ja atu eswe ngwenyi, Yehova kanambe ngwenyi, Chocho mungupatula kanga ya Nabukanezore mwanangana wa Babilonia ku makota ja mavungu eswe ni miaka yiali kanda yihwa. Alioze profeta Jeremia yaya kwenyi.

¹² Muze Hanania hapatula kanga ku kota ya profeta Jeremia, kulutwe lia kashimbu liji lia Yehova yiliza kuli Jeremia ngwo,

¹³ Yako ukambulwile Hanania ngwe, Yehova kanambe ngwenyi, Ena hiwapatula kanga ya mutondo alioze ami mungusalakanyisaho kanga ya utale.

¹⁴ Mumu Yehova-wa-Tujita, Zambi ya Izalele kanambe ngwenyi, Hinasa ha makota ja wano mavungu eswe kanga ya utale ya undungo kuli Nabukanezore mwanangana wa Babilonia. Kumakamulingila mumu hinamwaha chipwe tushitu a mu yambu.

¹⁵ Mba profeta Jeremia yamba kuli profeta Hanania ngwenyi, Panjika Hanania, Yehova kakutumine alioze yena hiwakoka akwa vungu lino akafuliele mahuza.

¹⁶ Kashika Yehova kanambe ngwenyi, Mungukuchiza hano hashi. Mwaka uno wene kumuofwa mumu hiwamba yuma ya kukatukila Yehova.

¹⁷ Mwaka uze wene ha kakweji wamuchishimbiali, profeta Hanania wafwile.