Jeremia 27 - MUKANDA USANDU WA ZAMBI 1975

¹ Ha kuputuka kuyula Zedekia mwana Josia mwanangana wa Yunda, liji lino liejile kuli Jeremia lia kuli Yehova:

² Yehova wambile kuli yami ngwenyi, Ulilingile yikapa ni kanga Ukayise ha kota ye.

³ Mba tuma liji kuli mwanangana wa Endome, ni mwanangana wa Moape, ni mwanangana wa ana ja Amone, ni mwanangana wa Teru, ni mwanangana wa Sendone ku moko ja tunganda two waze haneza kuli Zedekia mwanangana wa Yunda ku Yerusaleme.

⁴ Hana liji lino kuli ayo atwale kuli miata jo: Yehova-wa-Tujita, Zambi ya Izalele kanambe ngwenyi, Twalenu liji lino kuli miata jenu,

⁵ yami mwene ni tachi jami jinene ni kwoko liami lia kuzoza hinatanga hashi, ni atu, ni tushitu waze ali hashi, mba nakuyihana kuli mweswe munguzanga kumwahayo.

⁶ Haliapwila hinahana yifuchi yino yeswe kuli kavumbi kami Nabukanezore, mwanangana wa Babilonia. Hinamwaha nawa tushitu a mu yambu akamulingile.

⁷ Mavungu eswe mamulingila, ni mwanenyi, ni mujikulu wenyi ndo mwaka wa chifuchi chenyi hiwaheta, mba mavungu anji ni mianangana anene mamupwisa kapinji ko.

⁸ Alioze nyi vungu limwe hanji wanangana umwe kechi kalingila yono Nabukanezore mwanangana wa Babilonia; kechi katá kusa makota jo mu kanga ya mwanangana wa Babilonia, munguhana kastigu ku vungu lize ni katana, ni kapunga, ni chilungo ndo hinaanongesa ku kwoko lienyi. Chocho kanambe Yehova.

⁹ Kashika kanda nupanjika kuli aprofeta jenu, ni tahi jenu, ni akwa yilota jenu, hanji akwa munanyi jenu, hanji yimbanda jenu, waze anambe kuli yenu ngwo, Kunuchi kalingila mwanangana wa Babilonia.

¹⁰ Mumu yize anaprofeteza kuli yenu mahuza kashika manuchiza ku chifuchi chenu ni yami mungukanuhumako, munukakuwa.

¹¹ Alioze akwa vungu lieswe waze mazeyesa makota jo kushi lia kanga ya mwanangana wa Babilonia ni kumulingila, mungwahichika mu chifuchi cho ene akalimemo ni kutwamamo. Chocho kanambe Yehova.

¹² Yinguhanjika chizechene kuli Zedekia mwanangana wa Yunda ngwami, Zeyesenu makota jenu kushi lia kanga ya mwanangana wa Babilonia nukamulingile ni atu jenyi nukatwame ni mwono.

¹³ Kuchi te yena ni atu je mafwa ni katana, ni kapunga, ni chilungo, ngwe Yehova hamba ha kutwala ku mavungu eswe aze kechi kulingila mwanangana wa Babilonia?

¹⁴ Kanda nupanjika ku maliji ja aprofeta aze anambe kuli yenu ngwo, Kunuchi kalingila mwanangana wa Babilonia. Mumu yize anaprofeteza kuli yenu mahuza.

¹⁵ Yehova kanambe ngwenyi, Chaatumine yami, hindu kanaprofeteza mahuza mu jina liami, kashika mungunuhuma mba munukakuwa, ni yenu ni aprofeta aze anaprofeteza kuli yenu.

¹⁶ Mba yinguhanjika kuli asasendote ni vungu lino lieswe ngwami, Yehova kanambe ngwenyi, Kanda nupanjika ku maliji ja aprofeta jenu waze anaprofeteza kuli yenu, ngwo, Talenu yikwachilo ya zuwo lia Yehova kwasala hakehe mba mayichiza ku Babilonia, mumu yize anaprofeteza kuli yenu mahuza.

¹⁷ Kanda nupanjika kuli ayo. Lingilenu mwanangana wa Babilonia nukatwame ni mwono. Kuchi te mapwisa chihunda chino kuchishi atu?

¹⁸ Nyi o aprofeta ni liji lia Yehova kali nalio alembe kuli Yehova-wa-Tujita hanga yikwachilo yize yasala mu zuwo lia Yehova, ni mu zuwo lia mwanangana wa Yunda, ni mu Yerusaleme kanda yiya ku Babilonia.

¹⁹ Mumu Yehova-wa-Tujita kanambe ha kutwala ku manguji, ni lutanke, ni yimanyino, ni yikwachilo yikwo yize yichili mu chihunda chino,

²⁰ yize Nabukanezore mwanangana wa Babilonia kachijile muze wachijile ku Yerusaleme Jekonia mwana Jehoakime mwanangana wa Yunda hamwe ni alemu eswe ja mu Yunda ni Yerusaleme nikwatwala ku unjize mu Babilonia, ngwenyi,

²¹ Yehova-wa-Tujita, Zambi ya Izalele kanambe ha kutwala ku yikwachilo yize yasala mu zuwo lia Yehova, ni mu zuwo lia mwanangana wa Yunda, ni mu Yerusaleme, ngwenyi,

²² Kumakayimbata ku Babilonia; muyikatwamako ndo tangwa lize munguyinyonga, mba munguyineha nawa nikuyisa kuma kwayo. Chocho kanambe Yehova.