Jeremia 26 - MUKANDA USANDU WA ZAMBI 1975

¹ Ha kuputuka kuyula Jehoakime mwana Josia mwanangana wa Yunda, liji lino liakatukile kuli Yehova.

² Yehova kanambe ngwenyi, Manyina mu yize ya zuwo lia Yehova ukahanjike kuli akwa yihunda yeswe ya Yunda waze akwiza kuwayila mu zuwo lia Yehova maliji eswe mungukwaha kuhanjika no. Kanda uhichika chipwe liji limuwika.

³ Hanji makapanjika, mutu mweswe akatuke ku jila yenyi yipi, hanga ngukalikonyeke ha chuma chikalu chize ngunambe kwalinga mumu ha yitanga yo yipi.

⁴ Muwamba kuli ayo ngwe, Yehova kanambe ngwenyi, Nyi kunuchi kupanjika kuli yami nukende mu shimbi yami yize ngunase kumeso jenu

⁵ nukapanjike ku maliji a tuvumbi twami aprofeta, aze nakulikoleza kutuma chipwe kunwachinyongene,

⁶ nyi chocho, mungupwisa zuwo lino ngwe Shilo, mungupwisa chihunda chino shingo lia mavungu eswe a hashi.

⁷ Asasendote ni aprofeta ni atu eswe evwile Jeremia nikuhanjika maliji ano mu zuwo lia Yehova.

⁸ Mba muze Jeremia hamana kuhanjika yize yeswe Yehova hamutuma kuhanjika ni atu eswe, henaho asasendote, ni aprofeta ni atu eswe yamukwata ngwo, Kumuofwa!

⁹ Kuchi te hiwaprofeteza mu jina lia Yehova ngwe, Zuwo lino mulipwa ngwe Shilo, ni chihunda chino muchipwa cha woya, kuchishi atu? Mba atu eswe yaseleka Jeremia mwe mu zuwo lia Yehova.

¹⁰ Muze alemu ja Yunda evwile yino yuma yakatuka ku zuwo lia mwanangana yeza ku zuwo lia Yehova. Yatwama ha yitwamo yo ku unjililo wa Chikolo Chaha cha ku zuwo lia Yehova.

¹¹ Mba asasendote ni aprofeta yamba kuli alemu ni atu eswe ngwo, Yono mutu katela kufwa mumu haprofeteza kulimika ni chihunda chino, ni yenu hinwachivwa ni matwi jenu.

¹² Henaho Jeremia yamba kuli alemu eswe ni atu eswe ngwenyi, Yehova wangutumine kuprofeteza kulimika ni zuwo lino ni chihunda chino maliji ano eswe hinwevwa.

¹³ Kashika pemesenu ndako jenu ni yitanga yenu, nukononoke ku liji lia Yehova Zambi yenu, mba Yehova malikonyeka ha chuma chino chikalu hamba kulimika ni yenu.

¹⁴ Alioze ha kutwala kuli yami, mu moko jenu nguli. Lingenu cheswacho chanupemena.

¹⁵ Alioze nyingikenu pundu nyi munungushiha munukoka hali yenu ni ha chihunda chenu ni atu jacho manyinga keshi chitela, mumu pundu Yehova wangutumine kuli yenu kuhanjika maliji ano eswe mu matwi jenu.

¹⁶ Mba alemu ni atu eswe yamba kuli asasendote ni aprofeta ngwo, Yono mutu katelele kufwa mumu hanahanjika kuli yetu mu jina lia Yehova Zambi yetu.

¹⁷ Amwe a kuli alemu ja chifuchi yakatuka nikuhanjika ku chikungulwila cheswe cha atu ngwo,

¹⁸ Mika wa ku Morese yaprofeteza ha matangwa ja Hezekia mwanangana wa Yunda, nikwamba kuli atu eswe ja A-Yunda ngwenyi, Yehova-wa-Tujita kanambe ngwenyi, Zaione muyipwa ya kuchipa ngwe munda; Yerusaleme muyipwa mulumba wa yipuzu, ni mulundu wa zuwo ngwe mulundu umwe wa usaki.

¹⁹ Te Hezekia mwanangana wa Yunda ni atu ja A-Yunda yamushiha nyi? Kevwile woma wa Yehova nikulembelela kuli Yehova, mba Yehova yalikonyeka ha kutwala ku yuma yikalu yize hahanjika hali ayo? Alioze yetu tunambe kulikokela yuma yikalu chikolo.

²⁰ Kwapwile nawa mutu mukwo waprofetezele mu jina lia Yehova, jina lienyi Uriya mwana Shemaia wa ku Kiriate-Yerimi. Aye yaprofeteza kulimika ni chihunda chino ni chifuchi chino ni maliji a kulifwa ni wano a Jeremia.

²¹ Muze mwanangana Jehoakime ni tujita twenyi eswe ni alemu jenyi eswe evwile maliji jenyi mwanangana wafupile kumushiha. Alioze Uriya yachivwa, yevwa woma, yomboka, yachinyina ku Engitu.

²² Mba mwanangana Jehoakime yatuma ku Engitu amwe malunga, Elenatane mwana Akopore ni akwo hamwe nenyi,

²³ o yasaka Uriya ku Engitu yamuneha kuli mwanangana Jehoakime. Aye yamushiha ni katana, yambila mujimba wenyi mu chifuka cha atu amokomoko.

²⁴ Alioze kwoko lia Ahikame mwana Shafane Wakwashile Jeremia kashika kamuhanyine kuli atu amushihe.