Jeremia 25 - MUKANDA USANDU WA ZAMBI 1975

¹ Liji lize liejile kuli Jeremia ha kutwala kuli A-Yunda eswe ha mwaka wamuchiwana wa Jehoakime mwana Josia mwanangana wa A-Yunda (achi chapwile mu mwaka utangu wa Nabukanezore mwanangana wa Babilonia).

² Te liji lize profeta Jeremia yamba kuli A-Yunda eswe ni A-Yerusaleme eswe ngwenyi,

³ Makumi aali a miaka ni miaka yitatu (chize ku mwaka kumi ni tatu wa Josia mwana Amone mwanangana wa Yunda ndo musono) liji lia Yehova liakwizaza kuli yami, ni yami hinahanjika kuli yenu nikulimenyeka nikuhanjeka, hindu kunwapanjikile.

⁴ Kunwapanjikile chipwe kutela matwi jenu, chipwe Yehova hatumatuma kuli yenu tuvumbi twenyi aprofeta eswe ngwenyi,

⁵ Alumukenu eswe, ku ndako jenu jipi ni ku yitanga yenu yipi, nukatwame mu chifuchi chino Yehova hanwaha, kuli yenu ni kuli tulamba twenu chize ku shakulu ndo ku miaka.

⁶ Kanda nukaula mazambi akwo kwalingila chipwe kwawayila, nukangwihie ni yitanga ya moko jenu, mba chichi kunulinga chipi nichimwe.

⁷ Yehova kanambe ngwenyi, Hindu nwangupangula hanga nungwihie ni yitanga ya moko jenu, nulilumbule.

⁸ Kashika Yehova-wa-Tujita kanambe ngwenyi, Mumu kunwononokene ku maliji jami,

⁹ kashika yami Yehova ngunambe ngwami, Hinatuma kusaka mavungu eswe a ku Norte ni kavumbi kami Nabukanezore mwanangana wa Babilonia mba mungwakoka kulimika ni chifuchi chino ni atu jacho ni wano mavungu eswe akunujingilika. Mungwaonwona liakulu, ni kwapwisa chuma cha mwongo, ni chuma cha kuyunga, ni luchoko wa mutolo.

¹⁰ Chikwo nawa munguchiza kuli ayo liji lia kuseha ni liji lia chiseke, ni liji lia sandungi ni lia ndungi, ni zungo lia kutwa, ni pangu lia ndeya.

¹¹ Chifuchi chino cheswe muchalumuka cha kwenyeka ni cha mwongo, ni minyachi yino muyilingila mwanangana wa Babilonia makumi shimbiali a miaka.

¹² Mba ha kuhwa makumi shimbiali a miaka munguhana kastigu kuli mwanangana wa Babilonia ni vungu lienyi, chifuchi cha A-Kaletea, mumu ha uhenge wo, ni kupwisa chifuchi cha kwenyeka ndo ku miaka. Chocho kanambe Yehova.

¹³ Mungukokela ha chifuchi chize maliji aze eswe hinahanjika kulimika nacho, yeswe yinasonewa mu mukanda uno, yize Jeremia hanaprofeteza kulimika ni mavungu eswe.

¹⁴ Mumu mavungu anji ni mianangana anene makaapwisa tupinji mba mungwafwetesa nikulita ni yitanga yo ni milimo ya moko jo.

¹⁵ Yehova Zambi ya Izalele kanambe kuli yami ngwenyi, Tambula ku kwoko liami musenge uno wa vinyu ya ufwatulo ukanwise mavungu eswe kuze ngunakutumu.

¹⁶ Kumakanwa, kumakapiepieta, kumakazaluka mumu ha katana ngunatumu hakachi ko.

¹⁷ Chocho natambwile musenge ku kwoko lia Yehova, ni mavungu kuze Yehova wangutumine naanwishinewo.

¹⁸ Ngwami, Yerusaleme ni yihunda ya mu Yunda, ni mianangana ni alemu jayo, akayenyeke ni kuyipwisa ya hululu, ni kuyunga, ni shingo ngwe tangwa lino.

¹⁹ Ni Falau mwanangana wa Engitu, tuvumbi twenyi, ni alemu jenyi, ni atu jenyi eswe.

²⁰ Ni yilambala waze eswe ali hakachi ko. Ni mianangana eswe a chifuchi cha Uze, ni mianangana eswe a mu chifuchi cha A-Filistea (Asekalone, ni Ngeza, ni Ekrone, ni waze asala ja Ashedode)

²¹ ni Endome, ni Moape, ni ana ja Amone.

²² Ni mianangana eswe a Teru ni mianangana eswe a Sendone, ni mianangana a ku mbaka mu sali lia kalunga-lwiji

²³ ni Ndetane, ni Tema, ni Buze ni waze eswe akupatula mbango ja kambu jo.

²⁴ Ni mianangana eswe a Arabia, ni mianangana eswe a mavungu a kuvundangenya a mu puya.

²⁵ Ni mianangana eswe a Zimiri, ni mianangana eswe a Elame, ni mianangana eswe a Media.

²⁶ Ni mianangana eswe a ku Norte, kusuku ni hakamwihi, umwe ha umwe, ni mawanangana a muno-muze waze ali hashi. Mba muze o hanwa mwe mwanangana wa Babilonia kumanwa.

²⁷ Mba muwamba kuli ayo ngwe, Yehovawa-Tujita, Zambi ya Izalele kanambe ngwenyi, Nwenu, nukazengewe, nukasaze. Limbukenu kanda nukatuka nawa, mumu ha katana yoze ngunatumu hakachi kenu.

²⁸ Nyi kasolo kutambula musenge ku kwoko lie akanwe mba muwamba kuli ayo ngwe, Yehova-wa-Tujita kanambe ngwenyi, Chanutamba kunwa.

²⁹ Mumu ngunaputuka kulinga yuma yikalu ku chihunda chize chili ni jina liami, mba enu kechi kunwaha kastigu? Yehova-wa-Tujita kanambe ngwenyi, Kumakanwaha kastigu. Ngunasanyika katana kulimika ni akwa hano hashi eswe.

³⁰ Kashika muprofeteza maliji ano eswe kulimika no nikwamba kuli ayo ngwe, Yehova kwilu makahanjika lundunjila ku zuwo lienyi lisandu liji lienyi mulikahiohia. Kumakahanjika ni lundunjila wa tachi cha kulimika ni limba lienyi lia mapanga, kumakakololoka kulimika ni akwa hano hashi eswe, ngwe akwa kuliata uva mu ukamino.

³¹ Chizungozungo muchikaheta ndo ku masongo a hashi, mumu Yehova kali ni chikuma kusuma nacho mavungu. Kanaputuka kusopa ni atu eswe a musunya, mba yingulungulu kumakaashiha ni katana. Chocho kanambe Yehova.

³² Yehova-wa-Tujita kanambe ngwenyi, Chuma chikalu chinayi ku vungu ni vungu mba kangonga munene kanavunduka chize ku masongo a hashi kusuku.

³³ Waze maashiha kuli Yehova ha tangwa lize mapwa chize ku songo limwe lia hashi ndo ku songo likwo. Kechi kaalila, chipwe kwakunga, chipwe kwafunda, alioze mapwa ngwe wilo ha mavu.

³⁴ Enu tufunga lilenu mbimbi, litetwokenu ni yenu miata ja mapanga lilangumunenu mu uto mumu matangwa a kunushiha ni kunumwanga haneza, mba munufwa ngwe kuji a mapanga a kusakula.

³⁵ Chiswamino cha tufunga kuchichi kusoloka, chipwe jila ya kwomboka kuli miata ja mapanga.

³⁶ Panjikenu ku muteto wa tufunga! Ivwenu mbimbi ya miata ja mapanga! Mumu Yehova kanapupu ulilo wo

³⁷ ni malimba a sambukila kanaenyeka, mumu ha utenu usasu wa Yehova.

³⁸ Hakatuka ku chiswamino chenyi ngwe ndumba. Chifuchi cho hichalumuka cha hululu mumu ha katana wa Yehova, ni ha utenu wenyi usasu.