Jeremia 24 - MUKANDA USANDU WA ZAMBI 1975

¹ Muze te Nabukanezore mwanangana wa Babilonia hachiza ku Yerusaleme ni kwatwala ku unjize Jekonia mwana Jehoakime mwanangana wa Yunda hamwe ni alemu ja A-Yunda, ni yilangaji, ni fuli, haatwala ku Babilonia mba Yehova yanguweza usolwelo uno: mitonga yiali ya makuyu hanayitumbika kulutwe lia tembele ya Yehova.

² Mutonga umwe uli ni makuyu apema chikolo, ngwe waze mahanga kuhia, alioze mutonga ukwo uli ni makuyu api chikolo. Hapiha chocho mutu kechi kuhasa kwalia.

³ Yehova yamba kuli yami ngwenyi, Jeremia, yika unamono? Yingwamba ngwami, Ngunamono makuyu. Makuyu apema kanapeme chikolo; makuyu api kanapiha chikolo chocho mutu kahashile kwalia.

⁴ Henaho liji lia Yehova yiliza kuli yami ngwenyi,

⁵ Yehova Zambi ya Izalele kanambe ngwenyi, Ngwe makuyu wano apema chocho mungumwena kupema njize a ku Yunda wano ngunachiza ku chifuchi chino nikwatuma ku chifuchi cha A-Kaletea.

⁶ Mungusa meso jami hali ayo ngukaalinge yipema. Mungwahilwisa nawa ku chifuchi chino, mungwatungisa, chichi kwapuzula nawa; mungwatumba chichi kwatukula.

⁷ Mungwaha mbunge ya kunyingika ngwo, Iye Yehova; mba o kumakapwa atu jami ni yami kumungukapwa Zambi yo mumu mahilukila kuli yami ni mbunge jo jeswe.

⁸ Alioze Yehova kanambe ngwenyi, Ngwe makuyu api, hapiha chocho mutu kechi kuhasa kwalia, chocho mungulinga ni Zedekia mwanangana wa Yunda, ni alemu jenyi, ni masalila ja A-Yerusaleme waze masala mu chifuchi chino ni waze anatwama mu chifuchi cha Engitu.

⁹ Mungwapwisa chuma cha lwaji ku yifuchi yeswe ya hashi. Mungwapwisa luchoko, ni kashilikilo, ni lenyo, ni shingo mu yifuchi yeswe kuze mungwahumina.

¹⁰ Mungutuma kuli ayo katana, ni kapunga, ni chilungo ndo hakuwa ku chifuchi chize nahanyine kuli ayo ni kuli tulamba two.