Jeremia 23 - MUKANDA USANDU WA ZAMBI 1975

¹ Yehova kanambe ngwenyi, Lamba kuli tufunga akwonwona ni kumwanga mapanga a kelo jami.

² Kashika ha kutwala kuli tufunga waze akufunga atu jami Yehova Zambi ya Izalele kanambe ngwenyi, Enu hinwamwanga mapanga jami ni kwahuma. Kunwaasele mbunge. Yami mungunusela mbunge ha yitanga yenu yipi. Chocho kanambe Yehova.

³ Henaho mungukonga masalila ja mapanga jami ku yifuchi yeswe kuze hinaahumina. Mungwaneha nawa ku limba lio mba masema ni kuliokesa.

⁴ Mungwasela tufunga waze maafunga mba kechi kevwa nawa woma chipwe kulishimwoka. Niumwe makahona nawa. Chocho kanambe Yehova.

⁵ Yehova kanambe ngwenyi, Matangwa kaneza muze mungukasolola hali David Mutango wa ululi, mba iye kumakapwa mwanangana wa kuyula, nikulinga ni mana, ni kupatula ni kulita ni ululi mu chifuchi.

⁶ Ha matangwa jenyi malamwina Yunda, ni Izalele matwama ni sambukila. Jina lize mamwaha ngwo, Yehova ululi wetu.

⁷ Yehova kanambe ngwenyi, Kashika matangwa kaneza muze atu kechi kamba ngwo, Ni mwono wa Yehova yoze wachijile A-Izalele mu chifuchi cha Engitu,

⁸ alioze makamba ngwo, Ni mwono wa Yehova yoze wachijile ni kusongwela ana ja ku munyachi wa Izalele ku chifuchi cha ku Norte ni ku yifuchi yeswe kuze te hanaahumina. Mba matwama mu chifuchi cho ene.

⁹ Ha kutwala kuli aprofeta: Mbunge yami hiyafwa muchima, yifwaha yami yeswe yinachikima. Ngunapu ngwe umwe unazengewa, ngwe yoze vinyu hiyamukumba, mumu hali Yehova ni ha maliji jenyi asandu.

¹⁰ Mumu chifuchi hichazala ni yitanji. Mumu chifuchi chinalinyenge ha mukunda wa shingo; kelo ja ku puya hijoma. Jila yo yipi; ngolo jo kujalulamine.

¹¹ Ni profeta ni sasendote eswe ni aali yitanganyanyi. Chipwe mu zuwo liami hinawana ungulungulu wo. Chocho kanambe Yehova.

¹² Kashika jila yo muyipwa kuli ayo ngwe majila asenena mu milima kuze maahumina akalimbuke. Mumu mungwakokela chipi ha mwaka wa kastigu yo. Chocho kanambe Yehova.

¹³ Muli aprofeta ja Samaria namwene chuma chipi. Aprofetezele ku tachi ja Mbale ni kupiangula atu jami A-Izalele.

¹⁴ Alioze muli aprofeta ja Yerusaleme namwene chuma cha kuvwisa lwaji. O kakulinga utanji ni kwenda ni mahuza. Kakutakamisa moko ja akwa kulinga yipi, kashika niumwe akuhichika ungulungulu wenyi. Eswe hanalumuka ngwe Sondome kuli yami; ngwe waze atwama mu Ngomora.

¹⁵ Kashika Yehova-wa-Tujita kanambe ha kutwala kuli aprofeta ngwenyi, Mungwalisa musase ni kwanwisa meya a kasashisa mumu kuli aprofeta ja Yerusaleme utanganyanyi hiwalitanda mu chifuchi cheswe.

¹⁶ Yehova-wa-Tujita kanambe ngwenyi, Kanda nupanjika ku maliji ja aprofeta waze akuprofeteza kuli yenu nikunuzalisa ni kutalatala chamokomoko. Kakuhanjika yilota ya mu manyonga jo ene; kahanjikile ni kanwa lia Yehova.

¹⁷ Kakwambamba kuli waze akulelesa liji lia Yehova ngwo, Mukawaha, ni kuli waze akukaula mbunge jo ene ni pami kakwamba ngwo, Nichimwe chuma chipi kuchichi kukuwana.

¹⁸ Mumu iya hakachi ko hapwa mu punga ya Yehova akanyingike akevwe liji lienyi? Iya hapanjika ku liji lienyi alivwe?

¹⁹ Talenu kangonga ka Yehova! Ufwatulo hiwaputuka. Chijimbi wa tachi, makalundumukina ha mitwe ya yingulungulu.

²⁰ Utenu wa Yehova kuuchi kahiluka kunyima ndo halinga ni kumanununa yize hapala mu manyonga jenyi. Ha matangwa a kusula muchinulumbunuka zwalala.

²¹ Ami chatumine aprofeta, hindu azombokele. Chahanjikile no hindu aprofetezele.

²² Alioze nyi kachi apwile mu punga yami, kachi alumbunwine maliji jami kuli atu jami, kachi aatembwile ku jila yo yipi ni ku wupi wa yilinga yo.

²³ Yehova kanambe ngwenyi, Nguli Zambi ya hakamwihi, mba hi nguli Zambi wa kusuku ko nyi?

²⁴ Yehova kanambe ngwenyi, Mutu mahasa kuswama kumwe kuma kwa kuhengeka, ami chichi kuhasa kumumona? Yehova kanambe ngwenyi, Te chazalishile lihi ni hashi?

²⁵ Hinevwa aprofeta ha kuprofeteza mahuza mu jina liami ngwo, Hinalota, hinalota!

²⁶ Ndo mwiji muka mahuza matwama mu mbunge ja waze akuprofeteza mahuza; waze akuprofeteza yuma ya kwonga ya mu mbunge jo ene?

²⁷ O kakuzanga kuvulamisa atu jami jina liami ni yilota yize akuliawila, chizechene ngwe tulamba two avulamine jina liami mumu hali Mbale.

²⁸ Profeta mweswe kali ni chilota akachaule chilota chenyi, alioze mweswe kali ni liji liami ahanjike liji liami ni umwenemwene. Yehova kanambe ngwenyi, Mwambu wamokomoko ni tiliku kuyinalifu te?

²⁹ Yehova kanambe ngwenyi, Liji liami linapu ngwe kahia, ngwe muhato wa kupatula mawe tuyipalupalu.

³⁰ Yehova kanambe ngwenyi, Kashika kunalimika ni aprofeta waze akwiya maliji jami umwe kuli mukwo ni mukwo.

³¹ Yehova kanambe ngwenyi, Kunalimika ni aprofeta aze akuhanjika ni malimi jo ngwo, Yehova unachambe.

³² Yehova kanambe ngwenyi, Kunalimika ni waze akuprofeteza yilota ya mahuza nikuyaula ni kupiangula atu jami ni mahuza jo, ni kulizelula cho, muze ami chaatumine chipwe kwaaha chiyulo, kashika kakwashile wano atu nichimwe. Chocho kanambe Yehova.

³³ Muze umwe wa wano atu, hanji profeta, hanji sasendote makuhula ngwenyi, Chiteli cha Yehova chika? Muwamba kuli ayo ngwe, Yena mwene uli chiteli, mba Yehova kanambe ngwenyi, Ngunambe kukumbila.

³⁴ Mba ha kutwala kuli profeta, hanji sasendote, hanji umwe hakachi ka atu yoze mamba ngwenyi, Chino chiteli cha Yehova, munguhana kastigu kuli yono lunga ni akwa zuwo lienyi.

³⁵ Kashika munwamba mutu mweswe kuli mwenyembo wenyi, ni mutu mweswe kuli usoko wenyi ngwenu, Yehova kuchi akumbulula? Hanji Yehova kuchi ahanjika?

³⁶ Alioze chiteli cha Yehova kunuchi kuchamba nawa, mumu chiteli hichapwa liji lia mutu mweswe mwene, mba nunahengesa maliji a mwe Zambi ya mwono, Yehova-wa-Tujita Zambi yetu.

³⁷ Kashika munwamba kuli profeta ngwenu, Yehova kuchi akukumbulula? Hanji, Yehova kuchi amba?

³⁸ Alioze nyi munwamba ngwenu, Chiteli cha Yehova, mba Yehova kanambe ngwenyi, Mumu hinwamba maliji ano ngwenu, Chiteli cha Yehova, muze yami nanutumine ngwami, Kanda nwamba ngwenu, Chiteli cha Yehova

³⁹ kashika mungunuzundula ni kunumbila kumeso jami, ni yena ni chihunda chino nanuhele ni tulamba twenu.

⁴⁰ Mba mungunukokela luchoko wa mutolo ni sonyi ja miaka yeswe jize kechi kajivulama.