Jeremia 22 - MUKANDA USANDU WA ZAMBI 1975

¹ Yehova kanambe ngwenyi, Palumuka ku zuwo lia mwanangana wa Yunda wambululeko liji lino ngwe,

² Ena mwanangana wa Yunda, watwama ha ngunja ya David, ivwa liji lia Yehova, hamwe ni tuvumbi twe, ni atu je aze akunjila ku yikolo yino.

³ Yehova kanambe ngwenyi, Patulenu nikulita; lingenu ululi, pululenu ku kwoko lia mukwa kupinjisa yoze hamwiya. Kanda nulinga uhenge hanji upupilo kuli chilambala, hanji mwana-shiwa, hanji tuliwa, kanda numwanga muma muno manyinga ja waze keshi chitela.

⁴ Mumu nyi munwononoka pundu ku liji lino, mba mianangana akutwama ha ngunja ya David makanjila ku yikolo ya zuwo lino nikwenda mu matemba ni hali tuvwalu, o ni tuvumbi two ni atu jo.

⁵ Alioze nyi kunwapanjikile maliji wano, Yehova kanambe ngwenyi, Ngunalishingi ni yami mwene ngwami, zuwo lino mulialumuka lia kwenyeka.

⁶ Mumu ha kutwala ku munyachi wa mwanangana wa Yunda, Yehova kanambe ngwenyi, Enu nwapwa kuli yami ngwe Ngiliate ngwe mbulwa mulundu wa Lebano, hindu mungunupwisa puya; chihunda kuchishi atu.

⁷ Mungululika akwa kunwonwona, mweswe ni yitwa yenyi ya jita. Makateta misedru yenu yipema yahiana ni kuyimbila mu kahia.

⁸ Mavungu anji mapalika ku chihunda chino nikwamba mutu mweswe kuli mwenyembo wenyi ngwenyi, Kuchi te Yehova hanalingi chocho ni chihunda chino chinene?

⁹ Mba makumbulula ngwo, Mumu ehukile usendo wa Yehova Zambi yo ni kuwayila mazambi eka ni kwalingila.

¹⁰ Kanda nulilila yoze hanafu chipwe kumutwila mikuma; alioze lilenu masoji asasu hali yoze unayi, mumu kechi kahiluka nawa kumona chifuchi asemukinyine.

¹¹ Mumu ha kutwala kuli Shalume mwana Josia, mwanangana wa Yunda, yoze waswanyine tato Josia mu wanangana mba wakatukile ku chifuchi chino, Yehova kanambe ngwenyi, Kechi keza nawa,

¹² alioze kuze amutwalile funge kwenako mafwila. Kechi kamona nawa chifuchi chino.

¹³ Lamba kuli yoze matunga zuwo lienyi ni uhenge, ni yipatulo yenyi ya kwilu ni upatwilo uze kuwalitele. Yoze wakulingisa mwenyembo wenyi milimo yawana, kamuhele fweto yenyi.

¹⁴ Kakwamba ngwenyi, Mungulitungila zuwo linene ni yipatulo yinene ya kwilu. Kakulinga njanela jamo, ni kulamikaho matabua ja sedru, ni kusaho ulombo uchila nge.

¹⁵ Unamono ngwe uli mwanangana mumu wakweseka kuhiana akwenu ni sedru? Tatenu te kalile, kanwine, shimbu mapatula nikulita ni kulinga ululi? Miaka yize te kanawaha.

¹⁶ Wapatwile kanawa chikuma cha chiswale ni mukwa kuhona, miaka yize te kanawaha. Yehova kanambe ngwenyi, Chenacho te chinalumbunuka kungunyingika.

¹⁷ Alioze yena uli ni meso ni mbunge ya kunyonga kufumbuka cha uhenge, ni kumwanga manyinga keshi chitela ni kulinga upinjiso ni upupilo.

¹⁸ Kashika ha kutwala kuli Jehoakime mwana Josia mwanangana wa Yunda Yehova kanambe ngwenyi, Kanda amulilila mbimbi ngwo, Mama yami yaye! hanji mama yami ndumbwamie! Kanda amulilila mbimbi ngwo, Mama yami mwate! hanji mama yami mwanangana wetue!

¹⁹ Mamufunda ngwe kufunda cha chimbulu, cha kumumbulumuna haze lia yikolo ya Yerusaleme.

²⁰ Kanduka ku Lebano ukatete; tambika mu Mbashane; kololoka ku Aparime mumu akwa zango lie eswe hanaonwona.

²¹ Nahanjikile kuli yena ha mwaka wa kuwaha che, alioze wambile ngwe, Chisolo kupanjika. Ndako jino te nije chize ku ukweze we kusolo kwivwa liji liami.

²² Fuji muyikafunga tufunga twe eswe, ni akwa zango lie maya ufunge. Henaho mba muwivwa sonyi ni kutatajala mumu ha ungulungulu we weswe.

²³ Ena watwama ha Lebano nikusa chaswa che ku misedru muwiza kutwa mikuma muze misongo ye muyikuwana; yikola ngwe ya pwo mu kufumbajala.

²⁴ Yehova kanambe ngwenyi, Ni mwono wami ngwami, Chipwe Konia mwana Jehoakime mwanangana wa Yunda wapwa kazeya wa ha kwoko liami lia chindume, hindu mungunuchizaho

²⁵ ni kunukunjika mu moko ja waze anafupu kunushiha; ku moko ja waze nwakwavwila woma; mwe mu moko ja Nabukanezore mwanangana wa Babilonia, ni mu moko ja A-Kaletea.

²⁶ Mungukunyasa yena ni noko yoze wakusemene mu chifuchi cheka kuze kanusemenene ni kuze munufwila.

²⁷ Alioze ku chifuchi cho akuchivwila usona kechi kezako nawa.

²⁸ Yono lunga Konia kanapu ndeho yimwe yafwa, ya kulelesa, chikwachilo niumwe kachizangile, nyi? Kuchi te iye ni ana jenyi hanaakongo nikwanyasa mu chifuchi kachinyingikine?

²⁹ Ena chifuchi! Chifuchi! Chifuchi! Ivwa liji lia Yehova!

³⁰ Yehova kanambe ngwenyi, Soneka lunga yono ngwe keshi mwana; lunga umwe kechi kawaha ha matangwa jenyi. Mumu niumwe wa ana jenyi makawaha nikutwama ha ngunja ya David, nikuyula nawa mu Yunda.