Jeremia 21 - MUKANDA USANDU WA ZAMBI 1975

¹ Liji lino lia kuli Yehova liejile kuli Jeremia muze mwanangana Zedekia yatuma kuli iye Pashure mwana Malekia ni sasendote Zefania mwana Maseia ngwenyi,

² Nutuhulile kuli Yehova, mumu Nabukanezore mwanangana wa Babilonia kanase jita ni yetu. Hanji Yehova malinga ni yetu nikulita ni yitanga yenyi ya kukomwesa, akamuhilwise atuhichike.

³ Jeremia yamba kuli ayo ngwenyi, Ambenu kuli Zedekia ngwenu,

⁴ Yehova Zambi ya Izalele kanambe ngwenyi, Munguhilwisa kunyima yitwa ya jita yize yili mu moko jenu, ya kwasa nayo jita ni mwanangana wa Babilonia ni A-Kaletea, waze ananuseleka kweswe ku yipanga yenu ya mawe. Mungwaneha eswe hamuwika muchima lia chihunda chino.

⁵ Yami mwene mungwasa jita ni yenu ni kwoko lia kuzoza ni lia tachi, ni utenu, ni chijinde, ni ufwatulo unene.

⁶ Mungulamba akwa chihunda chino, ni atu ni tushitu, kumafwa ni chilungo chinene.

⁷ Yehova kanambe ngwenyi, Kulutwe mungukunjika Zedekia mwanangana wa Yunda, ni tuvumbi twenyi, ni akwa chihunda chino waze kafwile ni chilungo, hanji ni katana, hanji ni kapunga, mungwakunjika mu moko ja Nabukanezore mwanangana wa Babilonia, mu moko ja akwa kole jo, ku moko ja waze anafupu kwashiha. Kumakaalamba ni lutwilo wa katana. Kechi kaavwila vumbi, hanji kwatetela, hanji kwavwila keke.

⁸ Kuli wano atu muwamba ngwe, Yehova kanambe ngwenyi, Ngunase kumeso jenu jila ya mwono ni jila ya kufwa.

⁹ Mweswe masala mu chihunda chino mafwa ni katana, ni kapunga, ni chilungo, alioze mweswe matuhuka nikulikunjika kuli A-Kaletea waze ananuseleka kechi kufwa, mamwaha mwono wenyi, upite wa jita.

¹⁰ Mumu Yehova kanambe ngwenyi, Hinasa meso jami kulimika ni chihunda chino ha chipi, hi ha chipema ko. Kumunguchihana mu moko ja mwanangana wa Babilonia mba iye kumachocha ni kahia.

¹¹ Ku munyachi wa mwanangana wa Yunda amba ngwe, Ivwenu liji lia Yehova,

¹² Enu munyachi wa David! Yehova kanambe ngwenyi, Ha chimene patulenu ni upatwilo uze unalite, pululenu ku kwoko lia mukwa kupinjisa yoze hamwiya, kuchina ufwatulo wami muutuhuka ngwe kahia ukalekwoke ni yoze maujima wakuhi mumu ha yitanga yenu yipi.

¹³ Yehova kanambe ngwenyi, Kunalimika ni yenu nwatwama mu chikulo; enu liwe lia ha chana. Enu nwakwamba ngwenu, Iya mapalumuka kulimika ni yetu? Iya manjila mu mazuwo jetu?

¹⁴ Yehova kanambe ngwenyi, Mungunwaha kastigu nikulita ni mihuko ya yitanga yenu. Munguwika kahia mu usaki wako mba mukalalisa chize cheswe chinamujingilika.