Jeremia 20 - MUKANDA USANDU WA ZAMBI 1975

¹ Achi sasendote Pashure mwana Imere mwe mukwa lutwe wa kuyula zuwo lia Yehova yevwa Jeremia kuprofeteza yuma yino.

² Kashika Pashure yalamba profeta Jeremia, ni kumuyikila mu kuli jize japwile ku chikolo cha Mbenjamine cha ku tunda ku zuwo lia Yehova.

³ Muze hikwacha Pashure yeza kumuyikula mu kuli mba Jeremia yamba kuli iye ngwenyi, Yehova kakuhele nawa jina lia Pashure, alioze Magore-misavwe.

⁴ Mumu Yehova kanambe ngwenyi, Mungukupwisa mwongo kuli yena mwene ni kuli masepa je eswe. Makafwa ku tutana twa akwa kole jo shimbu yena muchitala. Mungukunjika A-Yunda eswe mu moko ja mwanangana wa Babilonia; makaatwala funge ku Babilonia ni kwashiha ni katana.

⁵ Chikwo nawa munguhana upite weswe wa chihunda chino ni kufumbuka chacho cheswe, ni yuma yize ya kupita kanayizange chikolo, ni yuma yilemu ya mianangana ja A-Yunda yeswe munguyihana mu moko ja akwa kole jo, o mayipunda, mayanda, ni kuyitwala ku Babilonia.

⁶ Ni yena Pashure ni waze eswe a ku zuwo lie munuya ku ufunge. Kwe ku Babilonia munuya, mba kwenako munufwila, ni kwenako manufunda, yena ni masepa je eswe waze hiwaprofeteza kuli ayo ni mahuza.

⁷ Yehova wangwonga, mba yami nongoloka. Wanguhiana ni tachi hiwangukumba. Hinalumuka chuma cha kuseha tangwa lieswe, atu eswe kakungulenya.

⁸ Mumu cheswe munguhanjika nakuteta kwilu. Nakutambika ngwami, Upupilo ni kwonwona! Mumu liji lia Yehova hilialumuka kuli yami luchoko ni sau tangwa lieswe nganganga.

⁹ Nyi mungwamba ngwami, Chichi kumuvuluka, chichi kutongola jina lienyi nawa, mu mbunge yami mwapwa ngwe kahia ka kulengenya ka kukashila mu yifwaha yami. Yikatalo ngunevu ya kusúla nako; Chahashile.

¹⁰ Mumu ngunevu anji nikuyevweta. Mwongo uliko kweswe kwa kujingilika! Masepa jami eswe kakwamba ngwo, Lituneye! Tulituneye! Mba kakutalatala ngulimbuke ngwo, Hanji mongoloka, mba mutuhasa kumukumba ni kumufwetesa.

¹¹ Alioze Yehova kwali hamwe ni yami ngwe kajita wa kukolesa woma. Kashika akwa kunguhungumiona malimbuka kechi kangukumba. Makevwa sonyi jinji mumu kechi kuhasa kumanununa. Kusauka cho cha mutolo kechi kuchivulama nilimwe tangwa.

¹² Yehova-wa-Tujita, yena wakweseka akwa ululi, Wakumona mbunge ni manyonga. Ngumone kama chize mwafwetesa, mumu hanakunjika chikuma chami kuli yena.

¹³ Imbilenu Yehova! Halisenu Yehova! Mumu hanapulula mwono wa akwa kuhona ku moko ja akwa kulinga yipi.

¹⁴ Tangwa lize nasemukine likashingiwe. Tangwa lize mama wangusemene kanda aliwahisa.

¹⁵ Yoze wanehene liji kuli tata lia kumuwahisa ngwenyi, Hiwasema mwana wa lunga, akashingiwe.

¹⁶ Au mutu akapwe ngwe yihunda yize Yehova wanungwine ni keke ka. Akevwe muteto ha chimene ni mutambi tangwa ha muchima,

¹⁷ mumu kangushihile mu jimo, kachi mama wapwile fuka liami, ni jimo lienyi likatohe ndo ku miaka.

¹⁸ Kuchi te natuhukile mu jimo ngukamone kuhondangana ni chinyengo, ni kuhwisa matangwa jami ni sonyi?