Jeremia 2 - MUKANDA USANDU WA ZAMBI 1975

¹ Liji lia Yehova liejile kuli yami ngwo,

² Yako ukambe mu matwi ja A-Yerusaleme ngwe, Yehova kanambe ngwenyi, Ngunewuluka kulalaminya cha ukweze we ni zango lie lia ndungi, chize wangukawile mu puya mu chifuchi chize kakuwilemo mbuto.

³ Izalele wapwile musandu kuli Yehova, mbuto yitangu ya kucha. Eswe alileko ahile; chipi chaawanyine. Chocho kanambe Yehova.

⁴ Enu munyachi wa Yakomba, ni yenu majimo eswe a munyachi wa Izalele, ivwenu liji lia Yehova.

⁵ Yehova kanambe ngwenyi, Chipi chika akakenu awanyine muli yami mba hangukatuka nikuya kusuku, nikukaula yuma yamokomoko nikwalumuka amokomoko?

⁶ Kambile ngwo, Yehova kuli ali? Yoze watuchijile ku chifuchi cha Engitu, watusongwelele mu puya, mu chifuchi cha kango ni mena, mu chifuchi cha pwila ni milima pwi, mu chifuchi kuze niumwe mapalikamo, niumwe matwamamo.

⁷ Nanunehene ndo mu chifuchi cha kulumbama cheswe hanga nukayuke ni mihuko yamo ni yuma yamo yipema. Alioze muze nwanjilile nwachishile chifuchi chami, ni kupwisa chihinga chami chuma cha lwaji.

⁸ Asasendote kambile ngwo, Yehova kuli ali? Akwa kukwata ku shimbi kangunyingikine; akwa kuyula anguvulumwine; aprofeta aprofetezele ni jina lia Mbale, ni kukaula yuma kuyafumbwile.

⁹ Yehova kanambe ngwenyi, Kashika nguchili nikulitachika ni yenu, mungulitachika ni ana ja ana jenu.

¹⁰ Palikenu ndusu ndo ku mbaka ya Kitime nutale, hanji tumenu ku Keta nuhengule kanawa. Talenu nyi hikwapwa kushi chuma chipwa haha.

¹¹ Vungu limwe hiliasumbakenya mazambi jalio, chipwe kapwile mazambi amwenemwene? Alioze atu jami hasumbakenya uhenya wo ni chuma chimwe kuchafumbwile.

¹² Enu malilu, lishimwokenu ha chuma chino. Pwenu ni woma wunji; pwenu a hululu. Chocho kanambe Yehova.

¹³ Mumu atu jami halinga yuma yipi yiali. Hanangwehuka, yami lie fuji lia meya a mwono, mba hanalitotela mashima ene, mashima a miaji, kahashile kupwa ni meya.

¹⁴ Izalele te kapinji? Te mwana wa ha chihunda? Kuchi te nyi hanalumuka wa kupunda?

¹⁵ Ndumba hanatete hali iye, hanatete ni tachi. Hanahichika chifuchi chenyi ngwe puya, yihunda yenyi yinapuzuka, kuyishi atu.

¹⁶ Chikwo nawa, malunga a ku Nofe ni Tafane hanalokola mbanda-mutwe we.

¹⁷ Yena mwene walikokela chuma chino ha kwehuka Yehova Zambi ye shimbu te makusongwela mu jila.

¹⁸ Mba haliapwila chika unafumbuka ha kuya ku Engitu ukanwe meya a ku Nilo? Chika unafumbuka ha kuya ku Asuria ukanwe meya a ku Ufrateze?

¹⁹ Ungulungulu we muukakufumba kukatuka che kuli yami muchikakukanjisa. Nyingika umone chinapu chipi chisasu kukatuka kuli Yehova Zambi ye, woma wa yami wakuhi muli yena. Chocho kanambe Mwene Yehova-wa-Tujita.

²⁰ Hasuku wamakwine kanga ye nikupatula mihipu ye nikwamba ngwe, Chichi kuzeya. Ewa ha mulundu weswe usuku ni mushi lia mutondo weswe wa wisu wahetaminyine ngwe chikoi.

²¹ Hindu nakutumbile mutondo wa uva ulemu, wa mbuto yipema pundu. Kuchi hiwalumuka wamokomoko, mutondo wa uva wa mu yambu?

²² Chipwe musana ni soda ni sabau yinji hindu luchisa wa uhie we kwali kumeso jami. Chocho kanambe Mwene Yehova.

²³ Kuchi muhasa kwamba ngwe, Chalichishile, chakawile Ambale? Tala jila ye mu chikulo; nyingika chize hiwalinga ngwe chimbembe cha kamelu kanapinji ni kulikonekakoneka.

²⁴ Ngwe chihwo cha chimbulu wa mu yambu hanalijilila ni puya ha kuzwa chenyi kanahumbika fuji. Iya mahasa kusulisa usolo wenyi? Waze anamuzange kechi kalikatalisa mumu ha kakweji kenyi mamuwana.

²⁵ Funga molu je kandaya keshi haku, funga muliwu we ku pwila. Alioze wambile ngwe, Hijakangana kulu, mumu hinazanga yilambala mba mungwakaula.

²⁶ Ngwe mwiji kakwivwa sonyi ha kumukwata chocho akwa munyachi wa Izalele mevwa sonyi, o, ni mianangana jo, ni alemu jo, ni asasendote jo, ni aprofeta jo.

²⁷ Waze akutongola mutondo ngwo, Uli tata. Ku liwe mamba ngwo, Wangusemene. Mumu hangumba nyima, kangutalikishile meso jo. Hindu ha mwaka wa lamba lio kakwamba ngwo, Katuka utulamwine!

²⁸ Alioze mazambi jenu kuli ali waze nwalilingilile yenwene? Nyi mahasa kunulamwina ha mwaka wa lamba lienu, akatuke! Mumu yena Yunda mazambi je hoka ngwe yihunda ye.

²⁹ Yehova kanambe ngwenyi, Kuchi te nwakungusuma? Eswe hinwangukatukila.

³⁰ Hinalamba ana jenu alioze chamokomoko, mumu katambwile kufumba nichimwe. Katana ka yenwene wonwene aprofeta jenu ngwe ndumba mukwa kupapulula.

³¹ Ni yenu akwa chisemuko chino, panjikenu liji lia Yehova. Te hinapwa kuli Izalele ngwe puya? Hinapwa ngwe chifuchi cha milima pwi? Nyi chocho kuchi te atu jami kakwamba ngwo, Tunatusuka, kutuchi kwiza nawa kuli yena?

³² Te mwana-pwo mavulama yuma yenyi ya uhenya? Hanji ndungi mavulama mazalo jenyi? Hindu atu jami hananguvulama kwalula matangwa anji kuhiana.

³³ Wakutalikisa kanawa jila ye ya kufupa akwa zango lie? Chipwe yingulungulu ja mapwo lianalilongesa ndako jipi kuli yena.

³⁴ Chikwo nawa ha mahina je hwali manyinga a mwono wa yiswale keshi chitela, kwaawanyine hanji kulokola zuwo. Hindu, chipwe ni yino yuma yeswe

³⁵ wakwamba ngwe, Chishi mulonga; utenu wenyi hiwangwecha pundu. Mungukuneha ku upatwilo mumu ha kwamba ngwe, Chavulumwine.

³⁶ Chapwa chilelu kuli yena kuhehwangila nikwalumiona ndako je! Alioze kumakukolesa sonyi kuli A-Engitu chizechene ngwe akukolesele sonyi kuli A-Asuria.

³⁷ Kwenako nawa mukatuka suswa mutwe mumu Yehova halituna waze unaafuliela kuchi kuhasa kuwaha no ku yilinga ye.