Jeremia 19 - MUKANDA USANDU WA ZAMBI 1975

¹ Yehova yamba ngwenyi, Yako ulande mulondo wa tengi, wa uma, ukaye ni amwe makulwana ja atu ni amwe makulwana ja asasendote,

² ukatuhuke ku mungulunga wa Bene-Hinome ku unjililo wa chikolo cha Chiyo-cha-ndeho, wambulule maliji aze mungukulweza.

³ Muwamba ngwe, Ivwenu liji lia Yehova, yenu mianangana ja Yunda ni akwa Yerusaleme. Yehova-wa-Tujita mwe Zambi ya Izalele kanambe ngwenyi, Ngunaneha chipi chimwe chikalu ha chifuchi chino matwi ja waze machivwa makapwa ni chimbangwinya.

⁴ Mumu atu hanangwehuka nikuchisa kuma kuno ha kwochelako insensu ku mazambi eka chipwe ayo, chipwe tulamba two, chipwe mianangana ja Yunda kaanyingikine, ni mumu hazalisako ni manyinga ja waze keshi chitela.

⁵ Hatunga manangamo kuli Mbale akalumbe ana jo a malunga mu kahia apwe milambu ya kulumba kuli Mbale. Chuma chino chachitumine, chipwe kuchamba, chipwe mu mbunge yami kuchanjilile.

⁶ Yehova kanambe ngwenyi, Kashika matangwa kaneza muze kuma kuno kechi kutongolako ngwo, Tofete, hanji mungulunga wa Bene-Hinome, alioze mamba ngwo, mungulunga wa Chishihilo.

⁷ Mba kuma kuno mungufuwisa kupala cha A-Yunda ni A-Yerusaleme, ni mungushihisa atu jo ni katana kumeso ja akwa kole jo, ni ku kwoko lia waze akufupa kwashiha. Mungupwisa mijimba ya afu jo kulia cha tujila a mu tetela, ni cha tushitu a mu yambu.

⁸ Mungupwisa chihunda chino chuma cha mwongo, chuma cha kuyunga. Mweswe mapalikako mevwa lwaji, mayunga mumu ha kuji-ni-tomo liako lieswe.

⁹ Mungukaakunjika kulia musunya wa ana jo a malunga ni a mapwo. Mweswe malia musunya wa mwenyembo wenyi mumu ha lamba muze maseleka chihunda kuli akwa kole jo waze anafupu kwashiha.

¹⁰ Henaho mushiha we mulondo kumeso ja malunga aze watwalangako,

¹¹ wambe kuli ayo ngwe, Yehova-wa-Tujita kanambe ngwenyi, Chocho mungushiha vungu lino ni chihunda chino, ngwe akushiha mulondo wa tengi chocho kechi kuhasa kuutokeka nawa. Mafunda mu Tofete mumu kukushi chifuka chikwo nawa.

¹² Yehova kanambe ngwenyi, Chocho mungulinga ni kuma kuno ni wano atu. Mungupwisa chihunda chino ngwe Tofete.

¹³ Mazuwo a Yerusaleme ni mazuwo ja mianangana ja Yunda maachisa ngwe chihela cha Tofete, mazuwo aze eswe ha mafulumba jo hochela insensu ku mbunga yeswe ya mwilu, ni kuzuza milambu ya kunwa ku mazambi akwo.

¹⁴ Mba Jeremia yakatuka ku Tofete kuze Yehova te kamutumanga kuprofeteza, yamanyina mu yize ya zuwo lia Yehova, yamba kuli atu eswe ngwenyi,

¹⁵ Yehova-wa-Tujita Zambi ya Izalele kanambe ngwenyi, Ngunakokela ha limbo lino ni ha yihunda yalio yeswe yipi yize yeswe hinavulukaho mumu hanakalisa makota jo, kasolo kwivwa maliji jami.