Jeremia 18 - MUKANDA USANDU WA ZAMBI 1975

¹ Liji liejile kuli Jeremia lia kuli Yehova ngwenyi,

² Katuka ukapalu muke ku zuwo lia tengi, mba kwenako mungukuvwisa maliji jami.

³ Chocho Hapalumukine ku zuwo lia tengi, te kanahondangana ku roda yenyi.

⁴ Ndeho yize te anawumbu ku uma yalumbukile mu moko ja tengi, mba yayiwumba cheka nawa ndeho yeka nikulita ni upale wa tengi.

⁵ Henaho liji lia Yehova yiliza kuli yami ngwenyi,

⁶ Yehova kanambe ngwenyi, Enu akwa munyachi wa Izalele, te Chahashile kulinga ni yenu ngwe yono tengi hajinga? Chize chapwa uma mu moko ja tengi chocho nwapwa yenu mu moko jami enu akwa munyachi wa Izalele.

⁷ Nyi tangwa heswaho mungwamba ha kutwala ku munyachi hanji wanangana umwe kuutukula, hanji kuupalwola, hanji kuwonwona,

⁸ mba nyi munyachi uze ngunambe muwalumuka ku upi wawo, ni yami mungwalumuka ku chipi chize namba kuulinga.

⁹ Mba nyi tangwa limwe mungwamba ha kutwala ku munyachi hanji wanangana kuutunga ni kuutumba,

¹⁰ nyi muulinga chipi kumeso jami kuwapanjikile ku liji liami, mba mungwalumuka ku chipema chize namba kuulinga.

¹¹ Kashika amba kuli A-Yunda ni waze atwama mu Yerusaleme ngwe, Yehova kanambe ngwenyi, Ngunawumbu chuma chipi kulimika ni yenu. Ngunanyongo chuma cha kulimika ni yenu. Hilukenu mutu mweswe ku ndako jenyi jipi, lulikenu ndako jenu ni yitanga yenu.

¹² Ahoze o anambe ngwo, Acho chamokomoko. Mutukaula chize hitwapala, ni mutu mweswe malinga nikulita ni pami ja mbunge yenyi yipi.

¹³ Kashika Yehova kanambe ngwenyi, Hula hakachi ka mavungu, iya hanevu chuma ngwe chino? Mwe *virgem Izalele hanalingi chuma cha lwaji.

¹⁴ Neve ku Lebano kuyakukatuka ku yimawe ya Sirione? Meya a ku milundu kakuma? Yitwetwe yize yakupalika kèkè?

¹⁵ Alioze atu jami hananguvulama. Kakwochela insensu mazambi eka. Hanatalinga mu majila jo, mu matapalo akulu, hanakondoloka mu tumajila twa ku malumbu hi tapalo ko.

¹⁶ Hanalumuna chifuchi cho chuma cha mwongo, chuma cha kusoza ndo ku miaka. Mweswe mapalikako mevwa mwongo, ni kuhunga mutwe wenyi.

¹⁷ Mungwamwanga ngwe fuji ya ku Chivumbuko kumeso ja akwa kole. Nyima yami mungwatalikisa ha tangwa lio ha kuji-ni-tomo, hi meso jami ko.

¹⁸ Henaho ambile ngwo, Tuyenu tukatwame punga Jeremia. Mumu shimbi kuyichi kutokela sasendote, hanji chiyulo kuli mukwa mana, hanji liji kuli profeta. Tuyenu tukamulambe ni limi. Kanda tupanjika ku maliji jenyi niamwe.

¹⁹ Ungwivwe Yehova! Panjika ku kulemba chami.

²⁰ Kakufweta chipema ni chipi? Hindu hanangufulila wumbu anguchize mwono wami. Iwuluka chize namanyine kumeso je ni kwahakwila, ngukatewulule ufwatulo we kuli ayo.

²¹ Kashika kunjika ana jo ku kapunga; wakunjike ku chiyulo cha katana. Mapwo jo apwe ndumba ni tuliwa. Malunga jo akafwe ni chilungo, ni akweze jo akaashihe ni katana mu jita.

²² Tukevwe muteto ku mazuwo jo, muze muneha akwa kupupa hali ayo susumuku! Mumu o hanangufulila wumbu, nikungutela makambwila.

²³ Alioze yena Yehova unanyingika kutaka cho cheswe cha kungushiha. Kanda ukonekena uhenge wo; kanda ujimuna shili yo ku meso je. Anunguke kumeso je; ukaapatwile ha tangwa lia utenu we.