Jeremia 16 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Kuchi kumbata pwo, chipwe kusema ana a malunga, chipwe a mapwo kuma kuno.

³ Mumu Yehova kanambe ha kutwala kuli ana a malunga ni ana a mapwo, waze masemuka kuma kuno, ni anaye ni atato waze maasema mu chifuchi chino ngwenyi,

⁴ Kumakafwa ni misongo ya kufwa. Kechi kwalila, chipwe kwafunda, alioze mapwa ngwe wilo ha mavu. Kumakafwila ku katana ni kapunga, ni mijimba yo muyikapwa kulia cha tujila a mu tetela, ni cha tushitu a mu yambu.

⁵ Mumu Yehova kanambe ngwenyi, Kanda unjila mu zuwo lia kulilila, kanda uya ukalite mbimbi hanji kwatwila mikuma mumu yami hinachiza sambukila yami ku vungu lino, hamwe ni utu wa zango liami ni keke. Chocho kanambe Yehova.

⁶ Ni anene ni akepe mafwa mu chifuchi chino. Kechi kwafunda; kechi kwalila; niumwe malilemeka mumu hali ayo chipwe kulitewula.

⁷ Niumwe mapalula mbolo ni yoze wafwisa, akamulembejeke mumu hali mufu. Niumwe mamwaha musenge wa kulembejeka akanwe mumu hali tato hanji naye.

⁸ Kuchi kuya mu zuwo lia chiteleka kutwama no, hanji kulia ni kunwa.

⁹ Mumu Yehova-wa-Tujita Zambi ya Izalele kanambe ngwenyi, Munguteta kuma kuno kwe kumeso je, ni ha matangwa je, liji lia chiseke ni liji lia uwahililo, ni liji lia sandungi ni liji lia ndungi.

¹⁰ Ha kwambulwila wano atu maliji ano eswe, o mamba kuli yena ngwo, Kuchi te Yehova hanambe yipi yino yinene yeswe hali yetu? Uhenge wetu uka? Mulonga uze twavulumuna Yehova Zambi yetu uka?

¹¹ Mba muwamba kuli ayo ngwe, Yehova kanambe ngwenyi, Mumu tulamba twenu hanangwehuka, hanakaula mazambi eka nikwalingila nikwawayila, hanangwehuka; kafungile shimbi yami.

¹² Ni yenu hinwawana tulamba twenu, mumu mweswe kanakaula upale wenyi mwene upi ni wa pami, kasolo kungwivwa.

¹³ Kashika mungunuchiza mu chifuchi chino ni kununyasa ku chifuchi, chipwe yenu chipwe tulamba twenu kachinyingikine. Kwenako munukalingila mazambi eka mwalwa ni ufuku, mumu chichi kanuvwila vumbi nilimwe.

¹⁴ Kashika Yehova kanambe ngwenyi, Matangwa kaneza muze kechi kwamba ngwo, Ni mwono wa Yehova yoze wachijile atu a Izalele ku chifuchi cha Engitu,

¹⁵ alioze mamba ngwo, Ni mwono wa Yehova yoze wachijile A-Izalele ku chifuchi cha ku Norte ni ku yifuchi yeswe kuze haahumina. Mumu mungwahilwisa nawa ku chifuchi cho ene chize nahanyine kuli tulamba two.

¹⁶ Yehova kanambe ngwenyi, Ngunatumina akwa kutela yishi anji, mba kumakaoza; mba kulutwe mungutumina yingyanga anji, no maahanga ku milundu yeswe, ni mindundena yeswe ni ku yivwenge.

¹⁷ Mumu meso jami kanatale ndako jo jeswe; kujanguswaminyine. Chipwe uhenge wo kahashile kunguswekelawo.

¹⁸ Mungwafwetesa kaali ha uhenge wo ni shili yo, mumu hanapihisa chifuchi chami ni mijimba ya mahamba jo a luchisa, no hanazalisa chihinga chami ni yizelwokeso yo.

¹⁹ Yehova, yena tachi jami ni mbonge yami, chiswamo chami ha tangwa lia lamba, kuli yena mavungu makungulukila, chize ku masongo a hashi nikwamba ngwo, Tulamba twetu kahingile nichimwe shina mahuza wika, yuma yamokomoko kuyafumbwile nichimwe.

²⁰ Te mutu mahasa kulilingila mazambi? Wano hi mazambi ko!

²¹ Kashika mungwanyingikisa, chisuho chino chimuwika mungwanyingikisa ngolo jami, ni ndundo jami, mba kumanyingika jina liami ngwo, Yehova.