Jeremia 15 - MUKANDA USANDU WA ZAMBI 1975

¹ Mba Yehova yamba kuli yami ngwenyi, Chipwe kachi Mose ni Samuel mamana kumeso jami, hindu mbunge yami kuyichi kuya kuli wano atu. Uakatwise kumeso jami akaye!

² Mba muze makuhula ngwo, Kulihi mutuya? Amba kuli ayo ngwe, Yehova kanambe ngwenyi, Waze hanaasela chilungo, aye ku chilungo, ni waze hanaasela katana, aye ku katana. Waze hanaasela kapunga, aye ku kapunga, ni waze hanaasela ufunge, aye ku ufunge

³ Yehova kanambe ngwenyi, Mungusa hali ayo yonwonyi awana ngwami, Katana kushiha, ni tuwa kuwumbula, ni tujila a mu tetela, ni tushitu a hashi kulia ni kwonwona.

⁴ Mungwapwisa chuma cha lwaji kuli akwa mawanangana eswe a hashi mumu ha yize yuma Manase, mwana Hezekia, mwanangana wa Yunda walingile mu Yerusaleme.

⁵ Ena Yerusaleme, iya makuvwila keke? Iya makutetela? Iya majingako akahule chize watwama?

⁶ Yehova kanambe ngwenyi, Hiwalituna yami, wakuyaya unyimenyime, kashika hinolola kwoko liami kulimika ni yena ni kukwonwona. Janguhwa nikulikoneka.

⁷ Hinaafuza ni chikungo cha kufuza nacho mwe mu yikolo ya chifuchi. Hinaashiha atu jo, hinonwona atu jami, kakatukile ku ndako jo.

⁸ Hinokesa tuliwa jo kuhiana masekeseke a ku kalunga-lwiji. Kuli anaye ja akweze hinaneha umwe chonwonyi wa ha mwalwa. Susumuku hinakokela hali ayo kulifwita ni mwongo.

⁹ Yoze te hasema ana shimbiali hanakokoloka, hanalezumuka. Tangwa lienyi hilianjila shimbu kuchili mwalwa. Hanamukolesa sonyi, hanasauka. Ni waze hanalisalaho mungukunjika ku katana kumeso ja akwa kole jo. Chocho kanambe Yehova.

¹⁰ Ena mama! Lamba liami mumu wangusema, yami nguli lunga wa kulitachika ni wa kulimanangana chifuchi cheswe. Chaahele mikuli chipwe kuyitambula hindu e atu eswe kakungutukatuka.

¹¹ Chikapwe chocho Yehova, nyi chaahakwilile kuli yena akawahe; nyi chahakwilile akwa kole kumeso je ha mwaka wa lamba ni ha mwaka wa luyinda.

¹² Te umwe mahasa kumakuna utale, utale wa ku Norte, hanji unengu?

¹³ Yikumba yenu ni upite wenu munguhana wa kupupa, ni ndando yakuhi, mumu ha milonga yenu yeswe ndusu mu chifuchi chenu cheswe.

¹⁴ Mungukutuma kulingila akwa kole jenu mu chifuchi kunwachinyingikine, mumu mu utenu wami hinawika kahia, mukalekwoka miaka yeswe.

¹⁵ Yehova, ena unanyingika. Ungwiwuluke Ungunangise. Ungukalile hali akwa kunguhungumiona. Mu kulihumikiza che kanda unguchiza. Nyingika kanawa ha mukunda wa yena nakulikoleza ni luchoko.

¹⁶ Yawana maliji je, mba naalia, ni maliji je alumukine kuli yami uwahililo ni chiseke cha mbunge yami, mumu hanangutuku jina lia yena, Yehova Zambi-ya-Tujita.

¹⁷ Chatwamine hamuwika ni akwa chiseke, chipwe kulikwiza. Natwamine ukwawami mumu kwoko lie liapwile hali yami, mumu hiwanguzalisa ni wuli.

¹⁸ Kuchi te yikola yami kuyishi kuhola, ni chilonda chami kuchishi yitumbo, kuchisolo kuhinduka? Te kumuopwa kuli yami ngwe chitwetwe cha kwonga, ngwe meya aze akuhwa?

¹⁹ Kashika Yehova kanambe ngwenyi, Nyi muhiluka mungukuhuzulula, mba mukamana kumeso jami. Nyi muwamba chize chinaleme, hi chize ko chamokomoko, kumuopwa ngwe kanwa liami. O matalikisa kuli yena, hi yena ko mutalikisa kuli ayo.

²⁰ Yehova kanambe ngwenyi, Mungukupwisa kuli wano atu ngwe chipanga cha unengu cha kukolesa. O masa jita ni yena, alioze kechi kukukumba. Mumu yami nguli hamwe ni yena kukulamwina ni kukupulula.

²¹ Mungukupulula ku kwoko lia chingulungulu; mungukuhula ku tachi ja mukwa uswi.