Jeremia 14 - MUKANDA USANDU WA ZAMBI 1975

¹ Liji lia Yehova lize liejile kuli Jeremia lia kutwala ku changa ngwenyi,

² Yunda kanalishimwoka ni yikolo yenyi yinahongo. Atu jenyi kanalili mbimbi hashi, ni muteto wa Yerusaleme unahiohio.

³ Alemu jenyi kakutuma ngamba jo ku meya; kakwiza ku mashima, keshi kuwana meya, kakuhiluka ni yikwachilo ya upolongo, kakupwa ni sonyi, chakwatatajala, kakutuka mitwe yo.

⁴ Se vula wakuhi mu chifuchi, njimi kanevu sonyi, ni kufuka mitwe yo, mumu ha mavu a chinyengo.

⁵ Chipwe naye ya kai wa mu yambu kakuhichika mwanenyi yoze wasemukanga musono, mumu kelo jakuhi.

⁶ Yimbulu a mu yambu kakumana ha milundu ya hululu, nikuhwilijela ngwe mikuza. Meso jo kanali mumu yiputa yakuhi.

⁷ Chipwe uhenge wetu kuwakutushindakenya, hindu Yehova, linga mumu ha ulemu wa jina lie; mumu kukokoloka chetu chapwa chinji; hitwakuvulumuna.

⁸ Ena, kutalatala cha Izalele, chilamwina cho ha tangwa lia lamba, kuchi te unapu ngwe chilambala mu chifuchi, ngwe ngeji yoze majingako akapombe ufuku umuwika?

⁹ Kuchi te unapu ngwe umwe kanakakashana, ngwe umwe mukwa ndundo yoze kahashile kulamwina? Hindu, Yehova, uli hakachi ketu, ni yetu hatuluka jina lie. Kanda utwehuka.

¹⁰ Ha kutwala kuli wano atu Yehova kanambe ngwenyi, Kanazange kwenda chocho, kasulile ku molu jo. Kashika Yehova kaatambwile, haliapwila mewuluka uhenge wo maafwetesa milonga yo.

¹¹ Yehova yamba kuli yami ngwenyi, Kanda ulembela wano atu akawahe.

¹² Chipwe malitwamina kulia chichi kwivwa muteto wo. Chipwe malambula milambu ya kulumba ni milambu ya wunga chichi kwatambula alioze mungwanongesa ni katana, ni kapunga, ni chilungo.

¹³ Yingwamba ngwami, Mwene Yehova, aprofeta kakwamba kuli ayo ngwo, Kunuchi kamona katana, chipwe kupwa ni kapunga, alioze mungunwaha sambukila ya pundu muno mu chifuchi.

¹⁴ Yehova yamba kuli yami ngwenyi, Aprofeta anaprofeteza mahuza mu jina liami. Ami chaatumine, chipwe kwaaha liji chipwe kuhanjika no. Kanaprofeteza kuli yenu usolwelo wa mahuza, ngombo yamokomoko, ni kwonga cha mu manyonga jo ene.

¹⁵ Kashika Yehova kanambe ha kutwala kuli aprofeta waze anaprofeteza mu jina liami, chipwe yami chaatumine, waze anambe ngwo, Katana ni kapunga kechi keza ha chifuchi chino, ngwami, Wano aprofeta kumakanonga ni katana ni kapunga.

¹⁶ Ni atu aze akwivwa kuprofeteza cho makaambila mu matapalo a Yerusaleme, mumu ha kapunga ni katana ni waze maafunda kechi kasoloka—o ni mapwo jo, ni ana jo a malunga ni a mapwo. Mumu munguzukula hali ayo ungulungulu wo.

¹⁷ Amba kuli ayo liji lino ngwe, Masoji akasulumioke ku meso jami ufuku ni mwalwa, kanda apatuka, mumu *virgem atu jami hanamutu mbandu yinene, hanamulambe chipi.

¹⁸ Nyi mungutuhuka mu yambu, afu ja ku katana wika! Nyi mungunjila mu chihunda misongo ya kapunga wika! Mumu aprofeta ni asasendote kanalingi milimo yo mu chifuchi, alioze yinyingi yakuhi.

¹⁹ Hiunalitunu Yunda liakulu? Mbunge ye kuyazangile nawa Zaione? Kuchi te hiunatulambe ni kuwuka chakuhi? Twataliletalile uhwimino alioze chipema nichimwe kuchejile. Twataliletalile mwaka wa kuwuka alioze mwongo wejile.

²⁰ Yehova, tunatayiza ungulungulu wetu, ni uhenge wa tulamba twetu, mumu hitunakuvulumuna.

²¹ Kanda utumbila, mumu ha ulemu wa jina lie; kanda ulelesa ngunja ye yinene. Iwuluka, kanda utangula usendo we ni yetu.

²² Umwe hakachi ka mazambi aze a mahuza a mavungu mahasa kuneha vula? Te malilu ene mahasa kunokesa vula? Hi yena ko te, Yehova Zambi yetu? Tunatalatala kuli yena, mumu yena kuwakulinga yino yuma yeswe.