Jeremia 13 - MUKANDA USANDU WA ZAMBI 1975

¹ Yehova yamba kuli yami ngwenyi, Yako ukalilanjile hina lia linyu ukali zale mu zalilo ye. Kanda ulisa mu meya.

² Chocho yingulanda hina lia linyu nikulita ni liji lia Yehova, yingulizala mu zalilo.

³ Liji lia Yehova yiliza kuli yami chisuho chamuchiali ngwenyi,

⁴ Anda hina lize unakalanda unazala mu zalilo; katuka uye ku Ufrateze ukalisweke mu chivwenge mu luliwe.

⁵ Yinguya, yingulisweka ku Ufrateze ngwe Yehova hangutuma.

⁶ Mba kulutwe lia matangwa anji Yehova yamba kuli yami ngwenyi, Katuka uye ku Ufrateze, ukandeko hina lize nakutumine kusweka.

⁷ Yinguya ku Ufrateze, yingufula, yinguchiza hina kuze naliswekele. Kumanyi hina hiiiapiha kuliatelele milimo nilimwe.

⁸ Mba liji lia Yehova yiliza kuli yami ngwenyi,

⁹ Yehova kanambe ngwenyi, Chizechene mungulumbula kulengumuka cha Yunda ni kulengumuka chinene cha Yerusaleme.

¹⁰ Akwa vungu lino lipi, kasolo kwivwa maliji jami, kakwenda ni pami ja mbunge jo, hanakaula mazambi akwo kwalingila ni kwawayila, kumakapwa ngwe hina lino kuliatelele milimo niyimwe.

¹¹ Mumu chizechene ngwe hina Makukwata ku mujimba wa mutu, chocho nawa yami hinakwachisa kuli yami munyachi weswe wa Izalele ni munyachi weswe wa Yunda; chocho kanambe Yehova, hanga akapwe kuli yami atu jami, ni jina, ni uhaliso, ni uhenya, alioze kapanjikile.

¹² Kashika muwamba liji lino kuli ayo ngwe, Yehova Zambi ya Izalele kanambe ngwenyi, Tuku yeswe muyikazala ni vinyu. Mba o mamba kuli yena ngwo, Te kutwanyingikine ngwetu tuku yeswe muyikazala ni vinyu?

¹³ Mba yena muwamba kuli ayo ngwe, Yehova kanambe ngwenyi, Kumungukazalisa akwa chifuchi chino eswe ni kuzengewa, chipwe mianangana waze anatwama ha ngunja ya David, chipwe asasendote, chipwe aprofeta ni waze eswe atwama mu Yerusaleme.

¹⁴ Mungukaapupa umwe hali mukwo, atato hali ana, chocho kanambe Yehova. Chichi kaavwila vumbi, hanji keke, chipwe kwatetela ngulitwamine kwaonwona.

¹⁵ Panjikenu nwivwe, kanda nulengumuka, mumu Yehova hanahanjika.

¹⁶ Chichimiekenu Yehova Zambi yenu shimbu kanda aneha milima, shimbu molu jenu kanda atalinga ha milundu ya kajimba-usoko. Shimbu munufupa pangu iye malialumuna Chizulie cha kufwa, nikulipwisa milima pwi.

¹⁷ Alioze nyi kunuchi kwivwa, mbunge yami ku tenga muyililila kulengumuka chenu. Meso jami kumakahia chikolo nikulila masoji, mumu mbunga ya mapanga a Yehova hanakwachika mu ufunge.

¹⁸ Amba kuli mwanangana ni naye ngwe, Likehesenu, twamenu hashi, mumu yipangula yenu ya uhenya muyikatuka ha mitwe yenu.

¹⁹ Yihunda ya ku Negeve hanayajila, mba kukushi niumwe kuyazulula. A-Yunda eswe hanaambata ku ufunge; e eswe hanayi ku ufunge.

²⁰ Hetulenu meso jenu numone waze anakatuka ku Norte. Mbunga yize ya mapanga akuhele, yilihiyo? Mbunga ye yipema?

²¹ Yika muwamba muze masa helu iia yena waze yena mwene waalongesele kupwa masepa je? Te kuchi kwivwa yikola, ngwe ya pwo mukwa kufumbajala?

²² Mba nyi muwamba mu mbunge ye ngwe, Kuchi te yino yuma hiyanguwana? Mumu ha mukunda wa unene wa uhenge we, hanakuzula ni kukulumbula.

²³ Te Ka-Etiopia mahasa kwalumuna kowa lienyi? Hanji changwi mahasa kwalumuna yipeka yenyi? Nyi o mahasa ni yenu munuhasa kulinga yipema, yenu nwalijilila nikulinga yipi.

²⁴ Mungunumwanga ngwe yizungu yize yakuhehuka ni fuji ya ku puya.

²⁵ Yehova kanambe ngwenyi, Chino chihanda chenu, fweto yize hinanufunjikila, mumu hinwanguvulama, hinwafuliela mahuza.

²⁶ Yami mwene munguzundula hina lie ndo ku meso, hanga sonyi je jikamoneke.

²⁷ Hinamona yizelwokeso yenu, ni utanji wenu, ni kulikumbukila chenu ni ukoi wenu wa usolo, ha milundu mu yambu. Lamba lie, Yerusaleme! Miaka yingahi ndo makupemesa?