Jeremia 12 - MUKANDA USANDU WA ZAMBI 1975

¹ Ena Yehova uli mukwa ululi, muze nakunenganyana kuli yena, hindu ngunazange kulumbununa chikuma chami kumeso je. Kuchi te jila ya chingulungulu yakuwaha? Kuchi te akwa mafwefwe eswe kakutatuka?

² Yena wakwatumba mba masoka miji. Kakutatuka nikwima mihuko. Yena uli hakamwihi mu makanwa jo, alioze ku mbunge jo uli kusuku.

³ Alioze yena Yehova unangunymgika. Unangumono, nikweseka manyonga jami ha kutwala kuli yena. Watukule ngwe mapanga a kuya ku chishihilo, ukaatulike ha tangwa lia kushiha.

⁴ Ndo mwiji muka chifuchi muchilishimwoka, ni mwambu mu minda muulela? Mumu ha ungulungulu wa waze atwamamo tushitu ni tujila hanaahungumunamo, mumu te atu ambile ngwo, Kechi kamona songo lietu.

⁵ Nyi hiwazomboka ni akwa kwenda hashi no hanakuvwisa yikatalo, kuchi muhasa kuzomboka ni tuvwalu? Nyi mu chifuchi cha sambukila unalikolela, yika mulinga mu mushitu wa Yordau?

⁶ Mumu chipwe ayayenu ni munyachi wa tatenu, chipwe o halinga ni yena ni mafwefwe, kanakuhange ni kukolojoka. Chipwe mahanjika ni yena maliji apema kanda uafuliela.

⁷ Hinehuka zuwo liami, hinambila chihinga chami; hinakunjika mukwa zango lia mbunge yami mu moko ja akwa kole jenyi.

⁸ Chihinga chami hichalumuka kuli yami ngwe ndumba mu usaki, hahanjika kulimika ni yami; kashika namuvwila kole.

⁹ Te chihinga chami chapwa ngwe kajila wa yipekayipeka wa kushiha yifwo? Tujila a kushiha yifwo hanamuseleka kulimika nenyi? Yako, ukakungulule tushitu eswe a mu yambu eze akawumbule.

¹⁰ Tufunga anji hanenyeka munda wami wa uva, hanaliate chihinga chami ni molu jo, hanapwisa chihinga chami chipema ngwe puya ya hululu.

¹¹ Hanachipwisa cha kwenyeka; chakulinyenga kuli yami se chapwa cha kwenyeka. Chifuchi cheswe chapwa cha kwenyeka, alioze niumwe kanachise mbunge.

¹² Akwa kupunda haneza ha milundu yeswe ya hululu mu puya, mumu katana ka Yehova kakuwumbula, chize ku songo limwe lia chifuchi ndo ku songo likwo lia chifuchi; niumwe mutu kali ni sambukila.

¹³ Hakuwa tiliku alioze hacha mbimbo, halivwisa yikola alioze kufumbuka chakuhi, mihuko yenu munuyivwila sonyi, mumu ha utenu usasu wa Yehova.

¹⁴ Yehova kanambe ha kutwala kuli enyembo jami api, waze akukwata ku chihinga chize hinahana kuli atu jami A-Izalele ngwenyi, Mungwatukula ku chifuchi cho; mungutukula munyachi wa A-Yunda hakachi ko.

¹⁵ Alioze muchikapwa muze te hinaatukula munguhiluka, mungwavwila keke. Mungwaneha nawa mutu mweswe ku chihinga chenyi, mutu mweswe ku chifuchi chenyi.

¹⁶ Muchikapwa nyi malilongesa kanawa kanawa ndako ja atu jami, akalishinge ni jina liami ngwo, Ni mwono wa Yehova, chizechene ngwe alongesele atu jami kulishinga ni Mbale; nyi chocho mba maatungisa hakachi ka atu jami.

¹⁷ Alioze nyi kapanjikile mba mungutukula vungu lize nikulitukula nikulionwona. Chocho kanambe Yehova.