Jeremia 11 - MUKANDA USANDU WA ZAMBI 1975

¹ Liji lino lia kuli Yehova liejile kuli Jeremia ngwo,

² Ivwa maliji a usendo uno ukahanjike ni malunga ja Yunda ni akwa Yerusaleme.

³ Muwamba kuli ayo ngwe, Yehova mwe Zambi ya Izalele kanambe ngwenyi, Kashingiwa mutu mweswe kapanjikile maliji a usendo uno

⁴ natumine tulamba twenu muze naachijile mu chifuchi cha Engitu, mwe mu lutengo wa utale ngwami, Panjikenu ku liji liami, lingenu yeswe ngunanutumina. Chocho munukapwa atu jami ni yami mungukapwa Zambi yenu

⁵ hanga ngukamanune shingo lize nalishingile ni tulamba twenu, ngukaahe chifuchi cha kupukukila yamwa ni wuchi, ngwe ha tangwa lino lia musono. Ami nakumbulwile ngwami, Chochene, Yehova.

⁶ Yehova wambile kuli yami ngwenyi, Ambujola maliji wano eswe mu yihunda ya Yunda, ni mu matapalo a Yerusaleme ngwe, Ivwenu maliji a usendo uno nukaalinge.

⁷ Mumu natowezele tulamba twenu ni tachi muze naachijile ku chifuchi cha Engitu, nikwatoweza tangwa ha tangwa ndo musono uno ngwami, Ononokenu ku liji liami.

⁸ Hindu kononokene chipwe kutela matwi, alioze mutu mweswe wendele ni pami ja mbunge yenyi yipi. Kashika naakokelele maliji eswe a usendo uno naatuminyine, alioze kaalingile.

⁹ Cheka nawa Yehova wambile kuli yami ngwenyi, Hikwapwa kulolema hakachi ka malunga ja Yunda ni akwa Yerusaleme.

¹⁰ Hanahilukila uhenge wa tulamba two, waze katayile kwivwa maliji jami. Hanakaula mazambi akwo akaalingile. Munyachi wa Izalele ni munyachi wa Yunda hanatangula usendo uze nalingile ni tulamba two.

¹¹ Kashika Yehova kanambe ngwenyi, Ngunaneha chipi hali ayo kechi kahasa kuliehacho. Chipwe mateta kuli yami chichi kaapanjika.

¹² Mba yihunda ya Yunda ni akwa Yerusaleme maya nikuteta kuli mazambi aze akwaochela insensu alioze o kechi kahasa kwalamwina ha tangwa lia lamba lio.

¹³ Mumu yenu A-Yunda, mazambi jenu hoka ngwe yihunda yenu, ni yilumbilo yize hinwamika ya kunukolesa sonyi, yilumbilo ya kwochelaho insensu kuli Mbale, yoka ngwe matapalo a mu Yerusaleme.

¹⁴ Kashika kanda ulembela vungu lino chipwe kwatetela hanji kwahakwila mumu chichi kapanjika muze mangusanyika ha tangwa lia lamba lio.

¹⁵ Mukwa zango liami kuchi mahasa kupwa mu zuwo liami muze halinga yitanga ya luchisa? Munuhasa kuchinda chize muchikanuwana ha kulinga yilakenyo ya shingo, hanji ha kulambula musunya wa yitapo? Te munuhasa kulikwiza?

¹⁶ Yehova kushi wanutongwele ngwenyi, Muolevwe wa wisu, kuwaha ni mihuko yipema. Alioze makauchocheka kahia ni lundunjila wa kangonga munene, mba mitango yawo yeswe muyiwema.

¹⁷ Yehova-wa-Tujita yoze wanutumbile hananwambe chipi mumu ha chipi chize munyachi wa Izalele ni munyachi wa Yunda hanalingi ni kungwihia ha kwochela insensu Mbale.

¹⁸ Yehova wangulwezele kashika nachinyingikine, henaho wangulwezele yitanga yo yipi.

¹⁹ Alioze napwile ngwe mwana-panga chimbovu wa kutwala ku chishihilo. Chanyingikine ngwami, Yami anatakila yuma ngwo, Tukenyeke we mutondo ni mihuko yawo; tukamuteteko ku chifuchi cha amwono, hanga akavulame jina lienyi ndo ku miaka.

²⁰ Alioze, Yehova-wa-Tujita yena wakupatula ni ululi, ni kweseka mbunge ni manyonga, ngumone kama chize mwafwetesa mumu hinakunjika chikuma chami kuli vena.

²¹ Kashika Yehova kanambe ha kutwala kuli malunga a Anatote, waze anafupu kukushiha, nikwamba ngwo, Kanda uprofeteza ni jina lia Yehova, kumuofwa ku kwoko lietu—

²² kashika Yehova-wa-Tujita kanambe ngwenyi, Mungwaaha kastigu. Akweze jo kumafwa ni katana, ni ana jo a malunga ni a mapwo kumafwa ni kapunga;

²³ niumwe malisalaho wakuhi. Mumu malunga ja Anatote mungwakokela chipi ha mwaka wa kastigu yo.