Jeremia 10 - MUKANDA USANDU WA ZAMBI 1975

¹ Enu akwa munyachi wa Izalele ivwenu liji Yehova kananwambe.

² Yehova kanambe ngwenyi, Kanda nulilongesa ndako ja mavungu. Kanda nwivwa woma ha yilayi ya mwilu mumu mavungu kakuyivwila woma,

³ mumu ndako ja mavungu ja kwonga. Mapakula mutondo wa mu yambu mausonga ni njimbu mu kwoko lia chilangaji.

⁴ Atu mauwahisa ni prata ni oru; maukolesa ni muhato ni mbambo, chocho kuwahashile kulisunga.

⁵ Tuponya two kapwa ngwe mutondo wa kwola kahashile kuhanjika. Chatamba kwambata mumu kahashile kwenda. Kanda nwavwila woma, mumu kahashile kulinga chipi, chipwe kulinga chipema keshi nacho.

⁶ Kukushi niumwe walita ni yena Yehova, uli munene, ni jina lie linene ni ndundo.

⁷ Iya kechi kukuvwila woma, ena Mwanangana wa mavungu? Chino chinakute mumu hakachi ka akwa mana a mavungu ni mu yifuchi yo kukushi umwe walita ni yena.

⁸ O yelo, kanda yihepuke; longeso lia tuponya ngwami mutondo.

⁹ Prata ya kutatula mayineha ku Tashi, oru mayineha ku Ufaze. O kapwa milimo ya yilangaji, ni ya moko ja fuli-oru. Mazalo jo alauluka ni a ufungo, eswe milimo ya akwa utotombo.

¹⁰ Alioze Yehova iye Zambi wamwenemwene, iye Zambi ya mwono ni mwanangana wa mutolo. Ha kutenuka chenyi hashi hakunyika. Ha ufwatulo wenyi mavungu kahashile kujikiza.

¹¹ Muwamba kuli ayo ngwe, Mazambi aze katangile malilu ni hashi kumakanonga ni hashi ni mushi lia malilu.

¹² Iye watangile hashi ni ndundo jenyi, wakolesele muno-muze ni mana jenyi, wazazulwile malilu ni yinyingi yenyi.

¹³ Muze mahiohiesa liji lienyi kwapwa lundunjila wa meya mu malilu. Kakwandula mbundu ku masongo a hashi. Kakutanga njaji ja vula; kakuchiza fuji ku machila jenyi.

¹⁴ Mutu mweswe kapwa chelo, keshi mana; fuli-oru mweswe mamukolesa sonyi ku mahamba jenyi. Mumu tuponya twenyi a kwonga, mwiku wakuhi muli ayo.

¹⁵ Kafwikile nichimwe, chitanga chimwe cha kwonga. Ha mwaka wa kastigu kumakanonga.

¹⁶ Yoze wapwa chihinga cha Yakomba kapwile ngwe ayo, mumu iye mwe mukwa kuwumba yuma yeswe. Mba Izalele lie vungu lia chihinga chenyi; jina lienyi Yehova-wa-Tujita.

¹⁷ Enu nwatwama mu chihunda cha kuseleka, andenu mafunda jenu hashi.

¹⁸ Mumu Yehova kanambe ngwenyi, Nyingikenu mungunyasa haze akwa chifuchi mwakono. Mungwakokela huli hanga akalivwe.

¹⁹ Lamba liami mumu ha yikola yami! Mbandu yami yipi. Alioze nambile ngwami, Pundu lino lamba liami, mba changutamba kulikoleza nalio.

²⁰ Mbalaka yami hanayenyeka ni mihipu yami yeswe hiyinapatuka. Ana jami eswe hanayi, keshiko. Kukushi yoze manguzazulwila mbalaka yami nawa, hanji kuzezeleka kurtina jami.

²¹ Mumu tufunga kapwa yelo, kahulile kuli Yehova. Kashika kawahile mu milimo yo, ni mbunga yo yeswe ya mapanga hiyamwangana.

²² Ivwenu lufuma umwe! Kuchineza! Chizungozungo cha ku chifuchi cha Norte, yihunda ya Yunda yikalumuke ya hululu, yipombelo ya mikuza.

²³ Yehova, ngunanyingika jila ya mutu kuyapwile ya kuli iye mwene; kuchatwamine muli mukwa kwenda kusongwela mashimbo jenyi.

²⁴ Yehova, ungufumbe, alioze ni kulita. Kanda uchilinga ni utenu we kuchina mukangumanununa.

²⁵ Zukula ufwatulo we ha mavungu aze kakunyingikine, hali minyachi aze katambikile ha jina lie. Mumu anongesene Yakomba, amunongesene ni kumukuwisa, ni kupwisa kuma kwenyi kwa kutwama kwa hululu.