Jeremia 1 - MUKANDA USANDU WA ZAMBI 1975

¹ Maliji a Jeremia, mwana Hilekia, wa hakachi ka asasendote, waze apwile mu Anatote mu chifuchi cha Mbenjamine.

² Liji lia Yehova liejile kuli iye ha matangwa a Josia mwana Amone, mwanangana wa Yundu, mu mwaka kumi ni wamuchitatu wa kuyula chenyi.

³ Liejile nawa ha matangwa a Jehoakime mwana Josia, mwanangana wa Yunda, ndo ku songo lia mwaka kumi ni kashi wa Zedekia mwana Josia, mwanangana wa Yunda, ndo ku ufunge wa Yerusaleme ha kakweji wamuchitano.

⁴ Liji lia Yehova liejile kuli yami ngwo,

⁵ Shimbu kanda nguchikuwumba mu jimo nakunyingikine; shimbu kanda uchisemuka nakutumbikilile; nakuselele ukapwe profeta ku mavungu.

⁶ Ami yingwamba ngwami, Mwene Yehova, Chanyingikine kuhanjika mumu nguchili mukweze.

⁷ Alioze Yehova yamba kuli yami ngwenyi. Kanda wamba ngwe, Nguchili mukweze, mumu muoya kuli waze eswe mungukutuma, muhanjika cheswacho mungukwamba.

⁸ Kanda wavwila woma mumu kunguli hamwe ni yena kukupulula. Chocho kanambe Yehova.

⁹ Mba Yehova yazoza kwoko lienyi yalisa ku kanwa liami; Yehova yamba kuli yami ngwenyi, Tala, hinasa maliji jami mu kanwa lie.

¹⁰ Tangwa lino hinakusa helu lia mavungu ni mawanangana, ukatukule, ukapuzule, ukonwone, ukanungune, ukatunge, ukatumbe.

¹¹ Liji lia Yehova yiliza kuli yami ngwo, Jeremia, yika unamono? Yingwamba ngwami, Ngunamono mutango wa amendoa.

¹² Yehova yamba kuli yami ngwenyi, Wamona kanawa mumu ngunafungu liji liami ngukalimanunune.

¹³ Liji lia Yehova yiliza kuli yami chisuho chamuchiali ngwo, Yika unamono? Yingwamba ngwami, Ngunamono ndeho yinafuluka, yinombu nyima ku Norte.

¹⁴ Yehova yamba kuli yami ngwenyi, Ku Norte chipi muchikatuka ni kuhulumukina hali akwa chifuchi eswe.

¹⁵ Mumu Yehova kanambe ngwenyi, Ngunasanyika minyachi yeswe ya mawanangana a ku Norte. Kumakeza mba mweswe hakachi ko masa ngunja yenyi ku unjililo wa yikolo ya Yerusaleme, kulimika ni yipanga-ya-mawe yayo yeswe ya kujingilika ni yihunda yeswe ya Yunda.

¹⁶ Mungwamba upatwilo wami wa kulimika no, mumu ha ungulungulu wo weswe wa kungwehuka. Hanocho insensu ku mazambi akwo nikuwayila yitanga ya moko jo.

¹⁷ Alioze ena, jichika muya we; katuka ukambe kuli ayo yeswe mungukutumina. Kanda wavwila woma, kuchina mungukuvwisa woma kumeso jo.

¹⁸ Ni yami, tala, ngunakupwisa musono chihunda cha kukolesa, kanda nguji lia utale, kanda ni yipanga ya unengu kulimika ni chifuchi cheswe. Mulimika ni mianangana ja A-Yunda, ni alemu jako, ni asasendote jako ni e atu a mu chifuchi.

¹⁹ Kumakasa jita ni yena; alioze kechi kakukumba, mumu yami nguli hamwe ni yena kukupulula. Chocho kanambe Yehova.