Izaya 9 - MUKANDA USANDU WA ZAMBI 1975

¹ Kukuchi kupwa milima kuli yoze wapwile mu hunya. Kunyima te wakokele chifuchi cha Zapulone ni cha Napatali mu sau, alioze mu matangwa a kusula kumakasa uhenya ha jila ya ku kalunga-lwiji, chifuchi cha sali lize lia Yordau, Ngalileya ya mavungu.

² Atu aze endele mu milima hamona pangu linene; waze atwamine mu chifuchi cha milima pwi, hali ayo pangu linene hilinapanguka.

³ Hiwokesa lie vungu, hiwaweza ku uwahililo walio; kanawahilila kumeso je ngwe uwahililo wa kucha, ngwe malunga kakuwahilila ha kulipangila upite wa kupupa.

⁴ Mumu hiwamakuna kanga ya chiteli chenyi, ni pango ya ha chipaya chenyi, ni mbwechi ya mukwa kumupinjisa, ngwe ha tangwa lia Mindiane.

⁵ Mumu sapato yeswe ya kajita yoze wakuliataliata mu Chizungozungo cha jita, ni mazalo eswe akuvunga mu manyinga, makayocha ngwe kunyi ja ha jiko.

⁶ Mumu kuli yetu hikwasemuka umwe kemba, kuli yetu hahana umwe mwana wa lunga. Chiyulo kumuchikapwa ha chipaya chenyi, ni jina lienyi mamuluka ngwo, Longeshi wa mana mukwa kukomwesa, Zambi ya Ndundo, Tata ya Miakulwila, Mwanangana wa Sambukila.

⁷ Kutanda cha chiyulo chenyi ni cha sambukila kuchichi kusula, ha ngunja ya David ni ha wanangana wenyi kuukolesa ni kuujikijisa ni upatwilo ni ululi chize ku tangwa lize ni ndo ku miaka yeswe. Tachi ja Yehova-wa-Tujita mujilinga chino chuma.

⁸ Mwene hatuma limwe liji lia kulimika ni A-Yakomba; mulikapwila hali A-Izalele.

⁹ Mba atu eswe kumakanyingika, Eframe ni waze atwama mu Samaria, waze akwamba ni kulengumuka ni kulizata cha mbunge ngwo,

¹⁰ E, tijolo hijapuzuka, alioze mututunga ni mawe a kululika; hateta misuwa, alioze mutusalakanyisa ya sedru.

¹¹ Kashika Yehova kakusangula akwa kulimika no, kakuvundula akwa kole jo.

¹² A-Seria ku Chivumbuko, ni A-Filistea ku Chitokelo, kakuwumbula A-Izalele ni makanwa a kupakula. Chipwe chocho utenu wenyi kuwakondolokele; kwoko lienyi hindu kanalizozo.

¹³ Atu katewulukilile kuli yoze waalambile, kafupile Yehova-wa-Tujita.

¹⁴ Kashika Yehova watetele mutwe ni muchila wa Izalele ha tangwa limuwika, ni mutango wa mungaji ni lumbungu tangwa limuwika.

¹⁵ Mukulwana mulemu iye we mutwe, profeta wa mahuza iye muchila;

¹⁶ mumu tusongo twa vungu lino kakwapiangula, ni akwa kwakaula kanaazemuna.

¹⁷ Kashika Mwene kawahililile ni akweze jo; kavwilile keke ana-ashiwa ni tuliwa jo; mumu mutu mweswe chitanganyanyi ni chihenge, kanwa lieswe linahanjika uhepuke. Chipwe chocho utenu wenyi kuwakondolokele; kwoko lienyi hindu kanalizozo.

¹⁸ Mumu ungulungulu kuunalekwoka ngwe kahia, unamanununa mikalale ni mingonga, unachocheka usaki wa mu musenge, unafwinjila mwilu ngwe nguji lia mwishi.

¹⁹ Ku ufwatulo wa Yehova-wa-Tujita chifuchi chinaweme, ni atu hanalumuka kunyi ja ha jiko; mutu niumwe mavwila keke usoko wenyi.

²⁰ Kakuchanga ku chindume, hindu achili ni zala; kakuwumbula ku chimeso, alioze kakuchile; mutu mweswe kakulia musunya wa mwenyembo wenyi.

²¹ Manase kanali Eframe, ni Eframe kanali Manase, mba hanalikate kulimika ni Yunda. Chipwe chocho utenu wenyi kuwakondolokele; kwoko lienyi hindu kanalizozo.