Izaya 8 - MUKANDA USANDU WA ZAMBI 1975

¹ Yehova yamba kuli yami ngwenyi, Anda chilolwa chinene cha kusonekaho Usoneke ni sona ja matangwa eswe ngwe, Kuli Maha-shala-hasha-baze.

² Yingusanyika yela amwenemwene, sasendote Uriya ni Zekaria mwana Jeberekia apwe yela jami.

³ Yingunjila kuli mwe profeta wa pwo, aye yaka ufumba, yasema mwana wa lunga. Mba Yehova yamba kuli yami ngwenyi, Umuluke jina, Maha-shala-hasha-baze;

⁴ mumu shimbu mwana kanda achinyingika kwamba ngwenyi, Tata, hanji Mama, upite wa Ndamaseku ni yikumba ya Samaria mayimbata kumeso ja mwanangana wa Asuria.

⁵ Yehova yamba cheka nawa kuli yami ngwenyi,

⁶ Mumu wano atu hanalituna meya a Shiloa aze akwenda ni vumbi, kakusangunuka ni woma kumeso ja Rezine ni mwana Remalia;

⁷ kashika Mwene maneha hali ayo meya a mu mwe Lwiji, anji a tachi, mwanangana wa Asuria ni uhenya wenyi weswe. Kumakasupwokela ha wendelo wo weswe ni helu lia mbumbulu jeswe.

⁸ Kumakapukumukina hali A-Yunda, nikusupwokelako nikuhiana ndo maheta ku kota. Mapulwa jo a kuzazulula kumakazalisa kutoha cheswe cha chifuchi che, Emanuele.

⁹ Zangumiokenu, enu mavungu, nukamakwoke; panjikenu, enu yifuchi ya kusuku; lijichikenu numakwoke tuyipinji; lijichikenu numakwoke tuyipinji.

¹⁰ Twamenu punga hamuwika, alioze muchikafuwa; hanjikenu liji, alioze kulichi kakola, mumu Zambi tuli nenyi hamwe ni yetu.

¹¹ Mumu Yehova yahanjika chocho ni yami ni kwoko lienyi lia tachi hali yami. Yangutoweza ngwenyi, Kanda wenda mu jila ya wano atu. Ngwenyi,

¹² Chize wano atu matongola ngwo, Utwahe, kanda uchitongola yena ngwe, Utwahe. Chize o mavwila woma, kanda uchivwila woma yena, chipwe kwivwa mwongo.

¹³ Alioze Yehova-wa-Tujita, iye mukamumona mwe musandu. Ukamuvwile woma iye; ukamuvwile mwongo iye.

¹⁴ Iye kumakapwa chiswamo, ni liwe lia kuhukanyisa, luliwe lwa kutalingisa ku minyachi yeswe yiali ya Izalele. Mapwamuheto ni kambwila kuli akwa Yerusaleme.

¹⁵ Anji makatalingaho; makalimbuka nikumakwoka makafwa mu kambwila, makakwachika.

¹⁶ Kasa Shindakenyo; jika ni Chijikilo longeso lino hakachi ka tumbaji twami.

¹⁷ Mungutwaminyina Yehova, yoze unaswekela meso jenyi munyachi wa Yakomba. Muli iye mungutalatala.

¹⁸ Nyingikenu, yami ni ana aze Yehova hangwaha hi twapwa yilayi ni yinyingi mu Izalele ya kuli Yehova-wa-Tujita, yoze watwama ha mulundu wa Zaione.

¹⁹ Mba muze manwamba ngwo, Hanjikenu ni akwa mahamba ni yimbanda aze akuyevweta ni kulinyinguna, ambenu ngwenu, Atu kechi kuhanjika ni Zambi yo? Te mahanjika ni afu ha kutwala kuli amwono?

²⁰ Tuyenu ku lie longeso ni ye Shindakenyo! Nyi kahanjikile nikulita ni liji lino mba kuvumbuka cha tangwa kuchishiko kuli ayo.

²¹ Kumakapalika mu chifuchi ni kupinda chinji, ni zala; mba muze mevwa zala, kumakatenuka ni kutuka mwanangana wo ni Zambi yo ni kutala kwilu.

²² Mba kumakatala hashi, kumanyi kupinda ni milima ni kulá cha hunya; mba kumakaakapula mu milima pwi.