Izaya 7 - MUKANDA USANDU WA ZAMBI 1975

¹ Ha matangwa ja Ahaze mwana Yotame mwana Uzia mwanangana wa A-Yunda, Rezine mwanangana wa Seria, ni Peka mwana Remalia mwanangana wa A-Izalele akandukile ku Yerusaleme akase no jita, alioze kahashile kuchikumba.

² Muze mukwa munyachi wa David hevwa ngwo, A-Seria halikata ni A-Eframe, mbunge yenyi ni mbunge ja atu jenyi jachikimine ngwe mitondo ya mu yambu yakutukunga ni fuji.

³ Mba Yehova yamba kuli Izaia ngwenyi, Yako utakane ni Ahaze, yena ni mwané Sheare-jashube, ku songo lia kapila wa Chitende cha ku tunda, ha tapalo lia kuya ku munda wa mukwa kutomesa mahina.

⁴ Amba kuli iye ngwe, Panjika uhwime, kanda wivwa woma, ni mbunge ye kanda yilezumuka mumu ha yimbunji yino yiali ya kufwinda, chipwe ha utenu usasu wa Rezine ni Seria, ni mwe mwana Remalia.

⁵ Mumu Seria hamwe ni Eframe ni mwana Remalia hanatake chipi cha kulimika ni yena ngwo,

⁶ Tukandukenu ku chifuchi cha Yunda tukachikolese mwongo, tukachikumbe hali yetwene, tukapwise mwana Tabiele mwanangana wamo.

⁷ Mwene Yehova kanambe ngwenyi, Kuchichi kukola, kuchichi kwiza kupwa.

⁸ Mumu mutwe wa Seria Ndamaseku, ni mutwe wa Ndamaseku Rezine; (Ha makumi asambano a miaka ni miaka yitano Eframe muyipatwoka tuyipinji, chocho kuyichi kapwa nawa vungu.)

⁹ Ni mutwe wa Eframe Samaria, ni mutwe wa Samaria mwe mwana Remalia. Nyi kunuchi kufuliela, pundu kunuchi kukola.

¹⁰ Cheka nawa Yehova yamba kuli Ahaze ngwenyi,

¹¹ Eta chilayi kuli Yehova Zambi ye, chipwe chajotoka ngwe Shiole, hanji kusuha ngwe mwilu.

¹² Alioze Ahaze yamba ngwenyi, Chichi kwita, chichi kweseka Yehova.

¹³ Aye yamba ngwenyi, Nyi chocho, panjika ena mwana David. Chalela kuli yena kukatalisa atu, kashika mukatalisa Zambi yami nawa?

¹⁴ Kashika Mwene iye mwene makwaha chilayi. Nyingika, umwe *virgem maseseka, masema mwana wa lunga, mamuluka jina—Emanuele.

¹⁵ Iye malia maji a yamwa ni wuchi, ndo manyingika kulituna chipi ni kutongola chipema.

¹⁶ Mumu shimbu mwana kanda anyingika kulituna chipi ni kutongola chipema, chifuchi cha wano mianangana aali unachikimina muchipwa cha woya.

¹⁷ Yehova makukokela yena, ni atu je, ni munyachi we, matangwa kanda nuchiamona chize ku tangwa lize Eframe wakatukile ku Yunda—mwe mwanangana wa Asuria.

¹⁸ Ha tangwa lize Yehova matambika ni miluzu kuli jiji yoze uli kuto ya yitwetwe ya Engitu, ni kuli puka yoze uli ku chifuchi cha Asuria.

¹⁹ O eswe meza ni kupwila mu mambongo ajotoka, ni mu yivwenge mu yimawe, ni ha mingonga yeswe, ni ha kelo jeswe.

²⁰ Ha tangwa lize Yehova kumakalanda tewula yoze wa mu sali lia Lwiji (ngwami, mwanangana wa Asuria) akatewule nenyi mutwe ni wona wa ku molu, ni kuchiza we wevu nawa.

²¹ Ha tangwa lize mutu mafunga ni mwono chimbembe cha ngombe ni mapanga aali,

²² mba ha kulumbama cha yamwa mamwaha, malia maji a yamwa, mumu waze eswe malisalaho mu chifuchi malia maji a yamwa ni wuchi.

²³ Ha tangwa lize kweswako kwapwile kanunu ka miuva ya kufwika kanunu ka shekele ja prata, mukujika ni mikalale ni mingonga.

²⁴ Malunga mayako ndo ni mata ni mivu, mumu chifuchi cheswe muchipwa cha mikalale ni mingonga.

²⁵ Mba milundu yize yeswe ayisangwile ni matemo, kunuchi kupalikako mumu ha woma wa mikalale ni mingonga. Muyipwa wendelo wa ngombe ni kuze mapanga maliataliata.