Izaya 66 - MUKANDA USANDU WA ZAMBI 1975

¹ Yehova kanambe ngwenyi, Lilu liapwa ngunja yami, ni hashi chitwamo cha yiliato yami. Zuwo lize munungutungila lika? Kuma kwami kwa kuhwimina kuchi kwapwa?

² Yehova kanambe ngwenyi, Yuma yino yeswe ya kulinga ni moko jami, kashika yuma yino yeswe niyami. Alioze mutu mungumutala, yono: mukwa kulikehesa, mukwa kumakuka mu Spiritu, yoze kakuchikimina liji liami.

³ Yoze mashiha ngombe kapwa ngwe mukwa kushiha mutu; mukwa kulambula chitapo cha mwanapanga, kapwa ngwe mukwa kumakuna kota ya kawa. Yoze mahana mulambu wa wunga kapwa ngwe mukwa kulambula manyinga a ngulu. Yoze mahana mulambu wa libano wa kwiwuluka kapwa ngwe mukwa kuwahisa kaponya. Wano eswe hatongola majila jo ene; mbunge jo jinawahilila mu yizelwokeso yo.

⁴ Yami nawa mungwatongwela luyinda; mungukoka hali ayo yize akuyivwila woma. Mumu ha kusanyika chami, niumwe kakumbulwile; ha kuhanjika chami, niumwe kapanjikile. Alioze alingile chipi kumeso jami; atongwele yize yami Chawahililile nayo.

⁵ Panjikenu liji lia Yehova, yenu nwakuchikimina liji lienyi, ngwami, Usoko wenu waze akunuvwila kole ni kunumbila mumu ha jina liami, o hanambe ngwo, Yehova afumane, hanga tukamone uwahililo wenu. Alioze o mevwa sonyi.

⁶ Panjikenu, Chizungozungo cha mu chihunda! Liji lia mu tembele! Liji lia Yehova, kanafwetesa akwa kole jenyi!

⁷ Shimbu kanda achifumbajala hasema; shimbu misongo yenyi kanda yichiputuka hakwata mwana wa lunga.

⁸ Iya hevwa chuma chipwa haha? Iya hamona yuma yipwa haha? Chifuchi muchisemuka tangwa limuwika? Vungu mulisemuka kashimbu kakene? Mumu ha kuputuka misongo yenyi Zaione hasema ana jenyi.

⁹ Te munguhetesa kwe ku kufumbajala, mba kusemuka chakuhi? Chocho kanambe Yehova. Yami mukwa kusemesa, te mungujika ngoji? Chocho kanambe Zambi yenu.

¹⁰ Enu nwakuzanga Yerusaleme, likwizenu nenyi nu wahilile hamuwika nenyi. Enu eswe nwakumulilila mbimbi likwizenu hamwe nenyi ni uwahililo,

¹¹ hanga nukamwe ku mele jenyi a kuhwimisa nukayuke; nukanwe kanawa ni chiseke ku kulumbama cha uhenya wenyi.

¹² Mumu Yehova kanambe ngwenyi, Munguhetesa kuli iye kuwaha cha yitanga yenyi ngwe lwiji. Upite wa mavungu munguuhetesa kuli iye ngwe muhwiji wa kusupwokela. Munukamwa, makanumbata mu kapwete kenyi, makanususuminya ha makungunwa jenyi.

¹³ Ngwe mwana wa kuwumbikiza kuli naye, chocho mungunuwumbikiza; mwe mu Yerusaleme manuwumbikiza.

¹⁴ Munukamona mba mbunge jenu mujikawaha; yifwaha yenu muyikawaha ngwe mwambu. Muchikafumana ngwo, Kwoko lia Yehova lili hamwe ni tuvumbi twenyi; utenu wenyi unalimika ni akwa kole jenyi.

¹⁵ Mumu Yehova meza ni kahia, matemba jenyi a jita mapwa fuji ya kangonga, hanga akafwete utenu wenyi ni ufwatulo, akakande ni milenge ya kahia.

¹⁶ Mumu Yehova malinga upatwilo wenyi ni kahia ni katana ha musunya weswe, ni waze Yehova mashiha mapwa anji.

¹⁷ Waze akulipemesa ni kulisela kunjila mu jardine, ni kukaula umwe hakachi ko akalie yifwo ya ngulu, ni chizelwokeso, ni tumbi, eswe kumakasulila hamuwika. Chocho kanambe Yehova.

¹⁸ Mumu ngunanyingika yitanga yo ni manyonga jo, mba nguneza ngukakonge mavungu eswe ni malimi akeze akamone uhenya wami.

¹⁹ Mungukamika chilayi hakachi ko. Waze malisalaho hakachi ko mungukatuma ku mavungu ku Tashi ni ku Pule, ni ku Lutu, akwa kunana uta, ni ku Tupale ni Yavwane ni ku mbaka jize ja kusuku, kuze kanda achivwa lufuma wami, hanji kumona uhenya wami; mba mambujola uhenya wami hakachi ka mavungu.

²⁰ O kumakachiza usoko wenu hakachi ka mavungu akapwe mulambu kuli Yehova. Maaneha hali tuvwalu, ni mu matemba, ni mu manda, ni hali mula, ni hali tumelu, ndo ku mulundu wami usandu ku Yerusaleme, ngwe A-Izalele kakuneha mulambu wo wa wunga mu chikwachilo chipema ku zuwo lia Yehova. Chocho kanambe Yehova.

²¹ Ni amwe hakachi ko mungutambula akapwe asasendote ni amwe akapwe A-Levi. Chocho kanambe Yehova.

²² Mumu Yehova kanambe ngwenyi, Chizechene ngwe lilu liaha ni hashi haha yize mungulinga muyikalinduluka kumeso jami, chocho ni ana jenu ni jina lienu muyikalinduluka.

²³ Yehova kanambe ngwenyi, Chize ku kakweji mwaha ndo ku kakweji mwaha, ni chize ku Sambata ndo ku Sambata, atu eswe meza kuwayila kumeso jami.

²⁴ Makatuhuka akatale mijimba ya afu aze angukatukilile. Mumu vuno lio kechi kafwa, ni kahia ko kukechi kajima. Kumakapwa chuma cha kuvwisa lwaji kuli atu eswe.