Izaya 65 - MUKANDA USANDU WA ZAMBI 1975

¹ Ami te nazangile angufupe kuli waze kahulile hali yami. Ami te nazangile anguwane kuli waze kangufupile. Ku vungu lia waze kangutambikile nambile ngwami, Yami uno, yami uno.

² Tangwa lieswe nazozele moko jami kuli akwa kukolema, waze anende mu jila yimwe kuyapemene, nikukaula kutaka cho ene.

³ Wano atu kakungwihia kwe kumeso jami matangwa eswe, nikushiha yitapo mu minda nikwochela insensu ha tijolo.

⁴ Kakutwama mu yifuka nikuhwisa ufuku kuma kwa kuswama. Kakulia yifwo ya ngulu, kali ni mutato wa yuma ya lwaji mu ndeho jo.

⁵ Kakwamba ngwo, Twama kwe! Kanda ungukundama mumu hinalihandununa ni yena. Wano kapwa ngwe mwishi mu mazulu jami, ngwe kahia kakuyila tangwa lieswe nganganga.

⁶ Nyingikenu, chinasonewa kumeso jami ngwami, Chichi kahola, mungukafwetesa, mungukafwetesa mwe mu makondo jo

⁷ ni uhenge wo, ni uhenge wa atato; chocho kanambe Yehova mumu hanochela insensu ha milundu, hanangutuku ha mindundena. Mungweseka mu makondo jo fweto ya yize halinga kulu.

⁸ Yehova kanambe ngwenyi, Kakuwana vinyu mu chichakata, mba kakwamba ngwo, Kanda nuchenyeka mumu uwape ulimo. Chocho ni yami mungulinga ha mukunda wa kavumbi kami, chichi kaenyeka eswe.

⁹ Yakomba makangwaha ana. Yunda makangwaha amwe kuswana milundu yami. Waze naatongwele mayihinga, tuvumbi twami makatwamako.

¹⁰ Sharone muyikapwa ulilo wa mapanga, chikulo cha Akore muchikapwa kuma kwa kuutamina ngombe, ni hali atu jami waze hangufupa.

¹¹ Alioze yenu nwakwehuka Yehova, nwakuvulama mulundu wami usandu; nwakwalila mesa Ngate, nwakuzalisa misenge ya vinyu ya kuchinga hali Meni.

¹² Mungunufunjikila katana, yenu eswe munuhetamina ku kufwa. Mumu ha kutambika chami, kunwakumbulwile, ha kuhanjika chami, kunwapanjikile. Alioze nwalingile chipi kumeso jami, nwatongwele chize yami Chawahililile nacho.

¹³ Kashika Mwene Yehova kanambe ngwenyi, Tuvumbi twami makalia, alioze yenu munupwa ni zala. Tuvumbi twami makanwa, alioze yenu munupwa ni pwila. Tuvumbi twami makawahilila, alioze yepu munwivwa sonyi.

¹⁴ Tuvumbi twami makemba ni chiseke mu mbunge, alioze yenu munuteta ni yikola mu mbunge, munulila mbimbi mumu ha chikulikuli mu Spiritu jenu.

¹⁵ Munukahichika jina lienu ngwe shingo kuli waze naatongwele, mba Mwene Yehova makanushiha; alioze matuka tuvumbi twenyi jina lieka.

¹⁶ Kashika yoze maliwahisa mu chifuchi, maliwahisa ni jina lia Zambi ya umwenemwene, yoze malishinga mu chifuchi malishinga ni Zambi ya umwenemwene, mumu lamba lia kushi hanalivulama, hiliaswamina kumeso jami.

¹⁷ Mungutanga lilu liaha ni hashi haha, ni yuma ya kushi kechi kayiwuluka nawa, chipwe kuyinyonga.

¹⁸ Likwizenu ni kuwahilila ndo ku miaka ni chuma chino munguchitanga; mumu mungukatanga Yerusaleme uwahililo; atu jenyi makapwa chiseke.

¹⁹ Ni yami munguwahilila ni Yerusaleme, mungwivwa chiseke ni atu jami. Kechi kevwamo nawa liji lia kulila, hanji muteto wa lamba.

²⁰ Kuhechi kapwamo kemba wa kutwama ni mwono matangwa akehe, hanji mukulwana yoze kechi kamanununa matangwa jenyi, mumu mwana kumafwa ni kulakaji lia miaka, ni mukwa shili wa kulakaji lia miaka mapwa wa kushinga.

²¹ Kumakatunga mazuwo a kutwamamo; kumakatumba minda ya uva nikulia ye mihuko yamo.

²² Kechi katunga hanga mukwo akatwamemo, kechi katumba hanga mukwo akalieko. Mumu matangwa ja atu jami mapwa ngwe matangwa ja mitondo; waze naatongwele makawahilila ni milimo ya moko jo.

²³ Kechi kahondangana mokomoko; kechi kasema ana a kumona kuji-ni-tomo, mumu kumakapwa ana ja waze hanaawahisa kuli Yehova, ni ana jo hamwe no.

²⁴ Mungukumbulula shimbu kanda achitambika; shimbu machihanjika mungwivwa.

²⁵ Kangunga ni mwana-panga makalia hamuwika, ndumba makalia mwambu ngwe ngombe. Fufuta muyikapwa kulia cha lunoka. Kechi kavwisa yikola hanji kwenyeka mweswe mu mulundu wami usandu. Chocho kanambe Yehova.