Izaya 64 - MUKANDA USANDU WA ZAMBI 1975

¹ Nyi kachi mupula malilu ukahulumuke, hanga milundu yikachikime ha kuheta che—

² ngwe kahia kakukwata ku yitete, ngwe kahia kakufulwisa meya— hanga ukafumanyise jina lie kuli akwa kulimika ni yena, mavungu akachikime ha kuheta che.

³ Muze walingile yuma ya kukomwesa yize kutwataliletalile, wahulumukine, mba milundu yachikimine ha kuheta che.

⁴ Chize ku shakulu niumwe kandevwa, chipwe kusa chinyingi ni matwi jenyi, nilimwe liso kanda limona umwe Zambi shina yena mwene, yoze wakulingila akwa kumutwaminyina.

⁵ Ena wakutakana ni yoze malinga ululi nikuwahilila, ni waze akwiwuluka ndako je. Ena watenukine, ni yetu twavulumwine; twatwamine shimbu linene mu milonga yetu, mba makatulamwina?

⁶ Eswe hitwalumuka ngwe umwe mukwa luchisa, yitanga yetu yeswe ya ululi yapwa ngwe mahina a luchisa. Eswe twakulela ngwe lifwo, mba uhenge wetu wakutuhehula ngwe fuji.

⁷ Kukushi yoze unatambika ha jina lie; yoze malisunga kukukwata. Mumu yena hiwasweka meso je kuli yetu, hiwatukunjika ku tachi ja uhenge wetu.

⁸ Hindu, Yehova, uli Tata. Etu tuli uma, ena uli tengi. Etu eswe tuli chitanga cha moko je.

⁹ Yehova, kanda uhiana kutenuka; kanda wiwuluka uhenge miaka yeswe. Tala, Zewula, etu eswe tuli atu je.

¹⁰ Yihunda ye yisandu hiyalumuka puya. Zaione hiyalumuka puya, Yerusaleme hiyapwa ya hululu.

¹¹ Zuwo lietu lipema lisandu, kuze tulamba akuhalishile, hanaliocho ni kahia; mba yihela yetu yeswe yipema hiyinapuzwoka.

¹² Yehova, te mulihulika mumu ha yino yuma? Mukahola nikutupinjisa chikolo?