Izaya 63 - MUKANDA USANDU WA ZAMBI 1975

¹ Iya yono kanakatuka ku Endome, kanazala uzalo wa ulombo uchila wa ku Mbozera, mazalo jenyi a uhenya, kanende mu kulumbama cha tachi jenyi? Yami nguneza nikwambujola usambiso, yami nguli ni ndundo kulamwina.

² Kuchi te mazalo je anachili? Kuchi te uzalo we wapwa ngwe wa mukwa kuliachila ukamino wa vinyu?

³ Hinaliachila ukamino wa vinyu ukawami; kukwapwile niumwe wa akwa mavungu hamwe ni yami. Naaliachile ni utenu wami, naaliachile mu ufwatulo wami. Manyinga a mwono wo hasapukila ha uzalo wami, hinasapwila mazalo jami eswe.

⁴ Mumu tangwa lia kufwetesa liapwile mu mbunge yami, mwaka wami wa kukula hiwaheta.

⁵ Natalile alioze chikwashi wakuhi, nakomokene mumu kukwapwile niumwe kungukundwiza. Kashika kwoko lia yami mwene liangunehenene kukumba; ufwatulo wami wangujikijishile.

⁶ Naliachile mavungu mu utenu wami, nazengewesele mavungu mu ufwatulo wami, nazujile hashi manyinga ja mwono wo.

⁷ Mungwambulula utu wa zango lia Yehova. Mungwambulula uhaliso wa Yehova, nikulita ni yuma yeswe Yehova hatwaha, ni yipema yize yinene hahana ku munyachi wa Izalele, yize haaha nikulita ni keke yenyi, nikulita ni kulumbama cha utu wa zango lienyi.

⁸ Mumu wambile ngwenyi, Pundu o atu jami, ana a malunga waze kechi kangwonga. Chocho walipwishile Chilamwina cho.

⁹ Mu huli lio lieswe iye wamwene huli, mba mungelo wa kumeso jenyi waalamwinyine. Ni zango lienyi ni keke yenyi waakulile; waazundwile, waambachile matangwa eswe a shakulu.

¹⁰ Alioze o yakolema, yavwisa chinyengo Spiritu yenyi musandu; kashika iye yalumuka mukwa kole yo, iye mwene yasa no jita.

¹¹ Mba yewuluka matangwa a kushi a kavumbi kenyi Mose. Yoze wachijile mu kalunga-lwiji tufunga twa mapanga jenyi, kuli ali? Kuli atwama yoze wasele Spiritu yenyi musandu hakachi ko?

¹² Yoze wasele kwoko lienyi lia uhenya kwe ku kwoko lia Mose lia chindume; yoze wapulile e meya kumeso jo nikulifumanyishina jina lia mutolo iya?

¹³ Waasongwelele mu kalunga-lwiji, iya? Ngwe kavwalu mu puya katalingile.

¹⁴ Ngwe yimuna a kupalumuka ku chikulo, mwe Spiritu wa Yehova waahwimishine. Chocho wasongwelele atu je ukalifumanyishine jina lia uhenya.

¹⁵ Ku zuwo lie lisandu lia uhenya kwilu tala hashi umone. Tachi je ja mbunge, ni ndundo je jilihijo? Usona we ni keke ye wanguminayo.

¹⁶ Mumu yena uli Tata, chipwe Apalahama katunyingikine, chipwe Izalele katutayijile. Yena Yehova, uli Tata. Chize ku shakulu jina lie ngwo, Mukwa-Kutukula.

¹⁷ Yehova, kuchi te wakutupiangula ku majila je? Kuchi te wakukalisa mbunge jetu, kashika kutwakuvwilile woma? Hiluka ha mukunda wa tuvumbi twe, minyachi ya chihinga che.

¹⁸ Atu je asandu azukile zuwo lie lisandu ha shimbu likepe; alioze akwa kole jetu haliliachila mu mavu.

¹⁹ Hiwalumuka ngwe waze yena kwaayulile nilimwe tangwa; ngwe waze kaalukile jina lie.