Izaya 62 - MUKANDA USANDU WA ZAMBI 1975

¹ Ha mukunda wa Zaione chichi kahola, ha mukunda wa Yerusaleme chichi kahwima, ndo ululi wenyi hiwasoloka ngwe pangu, ni ulamwino wenyi hiwasoloka ngwe soka lia kahia.

² Mavungu mamona ululi wenu; mianangana eswe mamona uhenya wenu. Kumakanuluka jina liaha lize kanwa lia Yehova mulikanwaha.

³ Kumunukapwa chipangula cha upeme mu kwoko lia Yehova, kumunukapwa chipangula cha wanangana mu kwoko lia Zambi yenu.

⁴ Kechi kanutongola nawa ngwo, A kwehuka; chifuchi chenu kechi kachitongola nawa ngwo, Cha woya. Alioze makanutongola ngwo, Uwahililo wami watwamamo; ni chifuchi chenu makachitongola ngwo, Cha ulo, mumu Yehova kanawahilila muli yenu, ni chifuchi chenu muchipwa cha ulo.

⁵ Mumu chizechene ngwe mukweze kakumbata virgem, chocho ana jenu manumbata; chizechene ngwe sandungi kakwivwa chiseke ni mwe ndungi, chocho nawa Zambi yenu mevwa chiseke ni yenu.

⁶ Ena Yerusaleme, hinasa tulayi ha yipanga ye ya mawe, mba mwalwa weswe ni ufuku weswe kechi kahola nilimwe tangwa. Enu akwa kwiwulula Yehova, kanda nuhwima,

⁷ kanda numwecha ndo hanakolesa Yerusaleme, ndo hanayipwisa uhaliso hano hashi.

⁸ Yehova halishinga ni kwoko lienyi lia chindume, halishinga ni kwoko lienyi lia ndundo ngwenyi, Chichi kahana mbuto yenu kulisa akwa kole jenu; tundaka kechi kanwa vinyu yenu yize hinwahondanganyina.

⁹ Alioze waze mayicha mayilia, nikuhalisa Yehova, ni waze mayihela mayinwa mu maze ja zuwo liami lisandu.

¹⁰ Palikenu, palikenu mu yikolo, lulikenu jila ya atu. Lingenu, lingenu tapalo, chizenuho mawe, mikenu mbandeira helu lia minyachi.

¹¹ Nyingikenu, Yehova hanambulula ndo ku songo lia hashi ngwenyi, Ambenu kuli mwana-pwo Zaione ngwenu, Talenu ulamwino wenu uneza. Kwononona chenyi kaneza nacho, fweto yenyi yinamutetekela.

¹² Kumakaatongola ngwo, E atu asandu; likwo nawa ngwo, Kule ja Yehova. Makanutongola ngwo, A kufupa, lie limbo kalimbilile.