Izaya 61 - MUKANDA USANDU WA ZAMBI 1975

¹ Spiritu ya Mwene Yehova hwali hali yami, mumu Yehova hananguwayisa ngukanehe sango lipema kuli yiswale. Hanangutumu ngukawuke waze amakuka mbunge, kwambujola kutusuka kuli funge, ni kwazulwila mapito a zuwo lia ususu kuli waze anakashiwa.

² Hanangutumu kwambujola mwaka wa vumbi lia Yehova, ni tangwa lia Zambi lia kukala milonga, hanga ngukawumbijeke waze eswe analinyenge;

³ kusela kuli akwa kulinyenga mu Zaione— kwaaha chipangula cha yitemo kusalakana uto, maji a uwahililo kusalakana chinyengo, chikuto cha uhaliso kusalakana mbunge ya kuhonga, hanga akaatongole ngwo, Carvalho ya ululi ya kutumba kuli Yehova akamwehe uhenya.

⁴ Makatunga nawa mazuwo a shakulu waze hanapuzuka, makatunga nawa yuma ya kushi yize hanonwona. Makalulika yihunda yize hiyinalumbuka, yuma ya kwonwona ku yisemuko yinji.

⁵ Yilambala mamanamana nikulisa mapanga jenu, tundaka manulimina ni kufunga minda yenu ya uva.

⁶ Alioze yenu manutongola ngwo, Asasedote ja Yehova, atu manufumanyisa ngwo, Tuvumbi twa Zambi yetu. Munukalia upite wa mavungu, nikulisamba mu yikumba yo.

⁷ Kusalakana sonyi jenu munupwa ni yihanda yiali, kusalakana sau munuwahilila ni chihinga chenu. Kashika mu chifuchi chenu munuzuka yihanda yiali, uwahililo wenu muupwa wa mutolo.

⁸ Mumu yami Yehova nakuzanga upatwilo wa kulita, nakuvwila kupiha wiji ni uhenge. Ni umwenemwene mungwaaha kwononona cho, mungukolesa no usendo wa mutolo.

⁹ Ana jo makaanyingika hakachi ka mavungu; waze masemuka kuli ayo makaanyingika hakachi ka minyachi. Waze eswe makaamona makaatayiza ngwo, Atu a kuwahisa kuli Yehova.

¹⁰ Munguwahilila chikolo muli Yehova, mbunge yami muyilikwiza muli Zambi yami; mumu hanangujiki ni mazalo a ulamwino, hanangufuku ni chikuto cha ululi, chizechene ngwe sandungi kakulisa chipangula cha yitemo, ni ndungi kakuliwahisa ni yuma ya uhenya.

¹¹ Mumu chizechene ngwe mavu kakusokesa mafwo, ni munda wakusokesa yize akuwilemo, chocho Mwene Yehova masokesa ululi ni uhaliso kumeso ja mavungu eswe.