Izaya 60 - MUKANDA USANDU WA ZAMBI 1975

¹ Katukenu, pangukenu, mumu pangu lienu hilieza. Uhenya wa Yehova hiwavumbuka hali yenu.

² Milima muyikafuka hashi; milima pwi muyikafuka mavungu. Alioze Yehova makavumbuka hali yenu, ni uhenya wenyi muukamoneka hali yenu.

³ Mavungu makeza ku pangu lienu, mianangana makeza ku kupanguluka cha kuvumbuka chenu.

⁴ Talenu kweswe kwa kunujingilika nukamone; eswe kanakunguluka hamuwika, kaneza kuli yenu. Anenu a malunga makatuka kusuku; anenu a mapwo maambata mu makondo.

⁵ Munukamona, munukapanguluka. Mbunge jenu mujikawaha ni kulikwiza, mumu matalikisa kulumbama cheswe cha kalunga-lwiji kuli yenu, upite wa mavungu muukeza kuli yenu.

⁶ Mbunga ya tumelu muyikanufuka, yimbembe ja tumelu a ku Mindiane ni Efwa. Ni akwa Shipa eswe kumakeza. Makaneha oru ni libano; kumakambulula uhaliso wa Yehova.

⁷ Mbunga jeswe ja mapanga ja Keta mujikakungulukila kuli yenu, ni kuji a mapanga a Nepayote kumakanuvumbika. Kumakeza ku chilumbilo chami mba mungukaatambula. Mungukahana uhenya ku zuwo liami lia uhenya.

⁸ Wano anahumuka ngwe lelwa, wano kaneza ngwe membe ku tupenda two aya?

⁹ Mumu akwa mbaka eswe makangutwaminyina. Mato a ku Tashi kanaliange, akanehe anenu a malunga kusuku, ni prata ni oru hamuwika no, mumu ha jina lia Yehova Zambi yenu, ha mukunda wa mwe Musandu wa Izalele mumu hanwaha uhenya.

¹⁰ Tundaka makatunga yipanga yenu yamawe ni mianangana jo makanuvumbika. Mumu nanulambile mu ufwatulo wami, alioze mu vumbi liami mungukanuvwila keke.

¹¹ Mapito ja yihunda yenu makapwa awashi matangwa eswe, ni mwalwa ni ufuku kechi kaajila; hanga akanehe kuli yenu upite wa mavungu, ni mianangana jo a kukoka mu chendo.

¹² Mumu munyachi hanji wanangana wa waze kanuvumbikile kumuukakuwa. Mavungu aze kumakaonwona.

¹³ Uhenya wa Lebano muwiza kuli yenu, we kupresu, ni muzunge, ni mupinyu, ya kupemesa nayo kuma kwami kusandu. Mungukasa uhenya kuma kwa yiliato yami.

¹⁴ Ana ja waze anupinjishile meza nikuhetamina hashi kuli yenu; waze eswe anulelesele mahetamina ku yiliato yenu. Kumakanutongola ngwo, Limbo lia Yehova, Zaione ya mwe Musandu wa Izalele.

¹⁵ Mumu wapwile uli wa kwehuka ni kukuvwila kole, niumwe kapwile nikupalikilamo, kashika mungukakupwisa wa ulamba wa mutolo, ni uwahililo chize ku miaka ndo ku miaka.

¹⁶ Kumunukanwa yamwa ya mavungu, kumunukamwa ku mele ja mianangana. Kumunukanyingika, Yami Yehova nguli Chilamwina chenu, nguli Mukwa-Kunukula, Mukwa-Ndundo wa Yakomba.

¹⁷ Ha unengu mungukasalakanyisa oru, ha utale mungukasalakanyisa prata, ha mutondo mungukasalakanyisa unengu, ha mawe mungukasalakanyisa utale. Ha tulayi twenu mungukanusela sambukila; ha tupita mungukanusela ululi.

¹⁸ Upupilo kechi ka wivwa nawa mu chifuchi chenu, chipwe kwenyeka ni kwonwona mu manjiza jenu. Munukatongola yipanga yenu ngwenu, Ulamwino, munukatongola mapito jenu ngwenu, Uhaliso.

¹⁹ Tangwa kulichi kapwa nawa pang u lienu lia mwalwa; kakweji kechi katemuka kuli yenu ha ufuku. Alioze Yehova makapwa pangu lienu lia mutolo, Zambi yenu makapwa uhenya kuli yenu.

²⁰ Tangwa lienu kulichi katoka nawa, kakweji wenu kechi kakatukako. Mumu Yehova makapwa pangu lienu lia mutolo, ni matangwa jenu a kulishimwoka kumakahwa.

²¹ Atu jenu eswe makapwa akwa ululi; kumakazuka chifuchi ndo ku miaka ya mutolo nikupwa mutondo uze natumbile, chitanga cha moko jami, hanga akangwehe uhenya.

²² Mulelu Wahiana kumakapwa munyachi, mukepe wahiana kumakapwa vungu lia ndundo. Yami nguli Yehova, mungutambwisa chuma chino ha mwaka wacho.