Izaya 6 - MUKANDA USANDU WA ZAMBI 1975

¹ Ha mwaka wa kufwa cha mwanangana Uzia namwene mwe Mwene kanatwama ha ngunja kwilu, nikunangama, ni lupula wenyi wazalishile tembele.

² Helu lienyi liamanyine aserafime, umwe ni umwe kali ni mapulwa asambano. Aali afukile no meso jenyi, aali afukile no molu jenyi, aali ahumukine no.

³ Umwe watambikile kuli mukwo ni mukwo ngwo, Yehova-wa-Tujita aye musandu, musandu, musandu. Hashi heswe hanazala ni uhenya wenyi.

⁴ Fundamentu ya yikuli yanyikine ha liji lia mukwa kutambika, mba zuwo lieswe liazalile ni mwishi.

⁵ Ami yingwamba ngwami, Lamba liami! Ngunatoko, mumu nguli mukwa mivumbo ya luchisa, natwama hakachi ka akwa mivumbo ya luchisa; mumu meso jami hamona Mwanangana, Yehova-wa-Tujita.

⁶ Henaho umwe serafime yahumuka, yeza kuli yami, kanambata kala lia kahia, te hachiza ni lumana ha chilumbilo.

⁷ Yalisa ku kanwa liami ngwenyi, Chino hichakwata ku mivumbo ye, mba uhie we hakuchizawo, ni shili ye hakukonekenayo.

⁸ Yingwivwa liji lia Mwene ngwenyi, Iya mungutuma? Yoze matuyilako iya? Mba yingwamba ngwami, Yami uno; ngutume yami.

⁹ Aye yamba ngwenyi, Yako ukambulwile wano atu ngwe, Kwivwa munwivwa, alioze kuchichi kunulumbunuka, Kumona munumona, alioze kunuchi kunyingika.

¹⁰ Pwisa mbunge ja wano atu ja maji, ni matwi jo akaleme, ni meso jo akafuke, kuchina akamone ni meso jo, akevwe hi matwi jo, akanyingike ni mbunge jo, akalumuke aawuke.

¹¹ Ami yingwamba ngwami, Mwene, ndo mwiji muka? Aye yamba ngwenyi, Ndo yihunda muyipwa ya hululu, ni yoze matwamamo wakuhi, ni mazuwo keshi malunga, ni chifuchi muchisala cha woya,

¹² ni Yehova hatwala atu kusuku, ni yihela ya woya yapwa yinji hakachi ka chifuchi.

¹³ Alioze umwe hakachi ka kumi malisalaho, hindu machocha nawa, ngwe mutondo wa terebine, hanji carvalho, uze wahichika chimbunji mu mavu ha kuupakula. Munyachi lisandu che chimbunji.