Izaya 59 - MUKANDA USANDU WA ZAMBI 1975

¹ Nyingikenu, kwoko lia Yehova kuliahihile ngwe kulichi kuhasa kulamwina, hanji matwi jenyi hajika, kahashile kwivwa,

² alioze uhenge wenu hiwahandununa hakachi ka yenu ni Zambi yenu, milonga yenu hiyanufukila meso jenyi kanupanjikile.

³ Mumu moko jenu hapiha ni manyinga, minwe yenu hiyapiha ni uhenge. Mivumbo yenu hiyahanjika mahuza, malimi jenu kananyinguna ungulungulu.

⁴ Niumwe unasopo ni ululi, niumwe unatwala chikuma chenyi ku lwaza ni mbunge yipema. Kakufuliela ungaji wamokomoko, kakuhanjika mahuza. Kakwaka uhuka ni kusema uhenge.

⁵ Kakutota monda ja fwiji, kakuseleka wandajili. Mweswe malia monda jo kumafwa, mba chipwe mafwenya limwe, yenge kumatuhukamo.

⁶ Wandajili wo kuuchi kupwa uzalo, niumwe mahasa kulifuka ni milimo yo. Yilinga yo yitanga ya uhenge, yitanga ya upupilo yili mu moko jo.

⁷ Molu jo kakuzomboka ku yipi, kakutambuka kumwanga manyinga a kusamba. Manyonga jo manyonga a uhenge, kwenyeka ni kwonwona yapwa mu majila jo.

⁸ Jila ya uhwimino kayinyingikine, mu majila jo kumushi ululi. Hapwisa majila jo ja uhenge, waze alimo kanyingikine uhwimino.

⁹ Kashika upatwilo wa kulita kusuku uli ni yetu; ululi kuwatukwachile. Twakutalatala pangu, kumanyi milima yiliko. Twakutalatala mwalwa, kumanyi tunende muze mwalá pwi.

¹⁰ Twakupapata ku yishimi ngwe afwameso, twakupapata ngwe waze keshi meso. Twakutalinga tangwa ha muchima ngwe ha kajimba-usoko. Tuli ngwe afu hakachi ka akwa kutakama.

¹¹ Eswe twakukenana ngwe ursu. Twakutwatwa mikuma ngwe tutele. Twakufupa upatwilo wa kulita, kuushiko. Twakufupa ulamwino alioze kusuku uli ni yetu.

¹² Mumu Utanguko wetu hiwoka kumeso je; milonga yetu kuyakutushindakenya. Utanguko wetu watwama hamwe ni yetu; tunanyingika uhenge wetu.

¹³ Twakuvulumuna, twakulikala Yehova, twakuhambuluka mu jila ya kukaula Zambi yetu, twakuhanjika kupinjisa ni kukolema, twakunyonga mu mbunge maliji a mahuza, twakwahanjika nawa.

¹⁴ Upatwilo wa kulita hiwahiluka kunyima, ululi kanamana kusuku; mumu umwenemwene hiwafwa ha lwaza, kululama kuchahashile kunjilamo.

¹⁵ Umwenemwene kuwahona; mukwa kukatuka ku yipi kakulipwisa ngwe yoze mamupupa kuli akwo. Yehova wachimwene mba chamupihilile mumu upatwilo wa kulita wakuhi.

¹⁶ Yamona, mutu wakuhi, yakomoka kukushi hako. Mba kwoko lienyi mwene yilimunehena kukumba; ululi wenyi yiumujikijisa.

¹⁷ Yazala ululi ngwe chipwiko, ni ngalau ya ulamwino ha mutwe wenyi. Yazala mazalo a kukala milonga akaazale. Yalifuka ni ufwatulo ukapwe uzalo wa ngungu kuli iye.

¹⁸ Makaafwetesa nikulita ni yitanga yo, ufwatulo kuli akwa kulimika nenyi, fweto kuli akwa kole jenyi. Kuli akwa mbaka mahana fweto yo.

¹⁹ Chocho akwa Chitokelo mavwila woma jina lia Yehova. Akwa Chivumbuko mavwila woma uhenya wenyi. Mumu meza ngwe muhwiji wa tachi wa kushinjika ni fuji ya Yehova.

²⁰ Mukwa-Kukula meza ku Zaione, kuli A-Yakomba waze makatuka ku Utanguko. Chocho kanambe Yehova.

²¹ Yehova kanambe ngwenyi, Ha kutwala kuli yami, usendo wami kuli ayo muupwa uno ngwami, Spiritu yami yoze watwama hali yenu ni maliji jami aze hinasa mu kanwa lienu kechi kakatuka mu kanwa lienu, chipwe mu makanwa ja ana jenu, chipwe mu makanwa ja ajikulu jenu chize ku tangwa lia musono ndo ku miaka ya mutolo. Chocho kanambe Yehova.