Izaya 58 - MUKANDA USANDU WA ZAMBI 1975

¹ Kololoka! Kanda utepululako! Zundula liji lie ngwe chitavwi; ambulula kuli atu jami Utanguko wo, ambulula kuli akwa munyachi wa Yakomba milonga yo.

² Hindu kakungufupa tangwa ha tangwa, ni kuwaha ha kunyingika ndako jami, ngwe umwe munyachi wa kulinga ululi, ngwe kambilile shimbi ya Zambi yo. Kakungwita upatwilo wa ululi, kakuwaha ni kukundama kuli Zambi.

³ Kuchi te twakulitwamina kulia, alioze yena kwachimwene? Kuchi te twakulilelesa, alioze yena kwachisele mbunge? Mumu ha tangwa lia kulitwamina kulia nunafupu kuliwahisa yenwene, hindu nwakupinjisa ngamba jenu.

⁴ Nwakulitwamina kulia hanga nukazwele ni kulitachika, ni kulamba ni kome ya ungulungulu. Kulitwamina kulia chino nwakulinga musono kuchichi kuhetesa liji lienu mwilu.

⁵ Kumanyi chino kulitwamina kulia, yami nachitongwele? Te mulipwa tangwa lia kulilelesa mutu? Te mahetamisa mutwe wenyi ngwe lumbungu nikulialila chikeleyi ni uto? Te tangwa lino munulitongola ngwenu, Tangwa lia kulitwamina kulia, tangwa lia kuwahila Yehova?

⁶ Chize nakutongola yami ngwe tangwa lia kulitwamina kulia, ngwami, Kachi kujitula mihipu ya ungulungulu, kujitula yikapa ya kuli, kwecha akwa lamba atusuke, kumakuna kuli jeswe.

⁷ Ngwami, Kupangila kulia chenu ni akwa zala, kuneha mu mazuwo jenu yiswale waze keshi zuwo. Muze munumona yoze keshi mazalo numufuke, kanda nuswama kuli mutu ni mukwenu.

⁸ Nyi chocho pangu lienu mulikapanguluka ngwe kucha cha tangwa; kuhinduka chenu muchikasoloka washi. Ululi wenu muukanutetekela ni uhenya wa Yehova muukanufunga kunyima.

⁹ Mba munukatambika ni Yehova makanukumbulula. Munuteta mba iye mamba ngwenyi, Yami uno. Nyi munuchiza kuli hakachi kenu, ni kwinyika munwe, ni kuhanjika ungulungulu;

¹⁰ nyi munukalizukula kuli akwa zala, ni kuyukisa akwa lamba, henaho pangu lienu mulikavumbuka mu milima, ni milima yenu muyipwa ngwe tangwa ha muchima.

¹¹ Ni Yehova makanusongwela matangwa eswe, ni kunuyukisa ni yuma yipema, ni kutakamisa yifwaha yenu. Kumunukapwa ngwe chala cha kutuchika, ngwe fuji lia meya lize kulichi kuma.

¹² Mazuwo jenu aze apuzukile a ku shakulu makaatunga nawa, munukatungisa nawa fundamentu ja yisemuko yinji. Kumakanutongola ngwo, Akwa kutungisa yipanga yapulika, kanda akwa kutungisa nawa matapalo a kutwama atu.

¹³ Nyi munuchiza yiliato yenu ku Sambata, ni kulitwamina kulinga upale wenu ha tangwa liami lisandu, ni kuvuluka Sambata tangwa lia kuwahilila, ni tangwa lisandu lia Yehova mulipwa lilemu; nyi munulilemesa, kunwayile mu majila ja yenwene, nyi kunuchi kufupa kuliwahisa yenwene hanji kuhanjika yuma yamokomoko;

¹⁴ mba munukawahilila muli Yehova, ni yami mungukanwendesa ha milundu ya hashi. Mungukanulisa ni chihinga cha tatenu Yakomba, mumu kanwa lia Yehova hilinambe.