Izaya 57 - MUKANDA USANDU WA ZAMBI 1975

¹ Mukwa ululi kakukuwa, alioze niumwe kanachise mbunge. Akwa kulemesa Zambi kakwachiza, alioze niumwe kuchamulumbunukine. Mumu mukwa ululi kakumuchiza ku kuji-ni-tomo,

² kakunjila ku uhwimino. Akwa kwenda ni ululi kakuhwima ha mihela yo.

³ Alioze kundamenu enu, ana ja nganga wa pwo; enu nwasemukine kuli chitanji ni chikoi.

⁴ Neya unahehe? Kuli iya unapakwila kanwa lie nikwawila mwau, ni kutuhwisa limi lie? Ngwami, Nuli ana ja Utanguko, nwasemukine mu kwonga.

⁵ Nwakusasaminya ni usolo hakachi ka carvalho, mushi lia mutondo weswe wa wisu; enu nwakushiha ana jenu mu yikulo, mu yivwenge ya mawe.

⁶ Hakachi ka mawe asenena mu mungulunga mwatwama chihinga chenu. O ene anapu chihanda chenu, kuli ayo nwakuzujila mulambu wa kunwa; kuli ayo nwakuneha mulambu wa wunga. Yenayo muyihasa kungutomesa mbunge?

⁷ Hiwasa muhela we ha mulundu unene usuku, kwenako wayile kulambula yitapo.

⁸ Kunyima lia pito kwe ku chikuli hiwamika chinyingi che; mumu ha kungwehuka hiwafukula muhela we, hiwakandukilaho, hiwautohesa. Hiwalitesa no ha ndando ya yena mwene, hiwazanga muhela wo, kwenako wachimwene.

⁹ Wayile ku Moleke ni maji, Wokesele yitumbo ye ya lupembo mupema. Watumine mikeji je kusuku, watumine ndo ku Shiole.

¹⁰ Wevwile yikatalo mumu ha kusuha cha jila ye, hindu kwambile ngwe, Chize mungutalatala chakuhi. Wawanyine mwono waha wa kulitakamisa nawo, chocho kwalezumukine.

¹¹ Iya wamuvwilile woma ni mwongo, kashika wahanjikile mahuza, kwangwiwulukile, kwangunyongene chipwe kamuwika? Nahola kwami ha shimbu linene, kashika kwanguvwilile nawa woma.

¹² Mungwambulula ululi we ni yitanga ye alioze kuyichi kukukwasa.

¹³ Nyi mulitetwoka, tuponya twe eswe wapita akupulule! Fuji muyiambata, mwiku muuatwala. Alioze yoze maswamina muli yami mazuka chifuchi; mahinga mulundu wami usandu.

¹⁴ Mba kumamba ngwo, Tungenu, tungenu, lulikenu ye jila, Chizenu yikwiko yeswe mu jila ya atu jami.

¹⁵ Mumu mwe Chitunda mukwa kunangama, mukwa kutunga kuma kwa mutolo, jina lienyi Musandu, kanambe ngwenyi, Kunatwama kuma kwanangama, kusandu. Natwama nawa ni mukwa spiritu ya kuhia ni kulikehesa, hanga ngukahuzulule Spiritu ya mukwa kulikehesa ni kuhuzulula mbunge ya mukwa kuhia.

¹⁶ Mumu chichi kalitachika miaka yeswe, chipwe kutenuka, chichi katenuka matangwa eswe. Kuli yami kwakatuka spiritu ni yami mwene natangile mwiku wa mwono.

¹⁷ Mumu ha uhenge wa chipululu chenyi natenukine, namulambile, nafukile meso jami ni utenu, hindu wayile nikukokoloka mu jila ya mbunge yenyi mwene.

¹⁸ Hinamona ndako jenyi, alioze mungumuwuka. Mungumusongwela ni kumwononona ni kulembejeka, kuli iye ni kuli waze akumulilila.

¹⁹ Yehova kanambe ngwenyi, Uhwimino, uhwimino kuli waze ali kusuku ni waze ali hakamwihi. Mungumuwuka.

²⁰ Alioze yingulungulu kanapu ngwe kalunga-lwiji ha kupinda chenyi; kahashile kuhwima, meya jenyi kakuvunduka ni mavu ni majilo.

²¹ Zambi yami kanambe ngwenyi, Uhwimino wakuhi kuli yingulungulu.