Izaya 56 - MUKANDA USANDU WA ZAMBI 1975

¹ Yehova kanambe ngwenyi, Funga chize chinalite, linga ululi, mumu ulamwino wami muwiza nikawashi, ululi wami muusoloka.

² Kawaha mutu yoze malinga chino, ni mwana mutu yoze malalaminyako, yoze mafunga Sambata ni kulijilula ka; kakutunga nawa kwoko lienyi kuchina mulilinga chipi.

³ Kandaka yoze hanalifutula ni Yehova kanda amba ngwenyi, Yehova manguhandununa ni atu jenyi. Unuku kanda amba ngwenyi, Nguli mutondo umu.

⁴ Mumu Yehova kanambe ngwenyi, Kuli aunuku waze akufunga masambata jami, waze akufupa yuma yize yakunguwahila yami nikulalaminya ku usendo wami,

⁵ mungwaaha mwe mu zuwo liami muchima lia yishimi yami, Chiwulwiso ni jina kuhiana ana a malunga ni a mapwo. Mungwaaha jina lia mutolo lize kulichi kajimuka.

⁶ Ni tundaka waze akulifutula ni Yehova akamulingile, ni kuzanga jina lia Yehova, akapwe tuvumbi twenyi, waze eswe te akufunga Sambata ni kulijilula, ka, ni kulalaminya ku usendo wami,

⁷ wano mungwaneha ku mulundu wami lisandu, ni kwaaha uwahililo mu zuwo liami lia kulembela. Milambu yo ya kulumba ni yitapo yo mungutambula ha chilumbilo chami; mumu zuwo liami malitongola ngwo, Zuwo lia kulembela lia mavungu eswe.

⁸ Mwene Yehova mukwa kukonga A-Izalele aze haambila kanambe ngwenyi, Mungukunga kuli iye akwo nawa helu lia waze hanaakongo.

⁹ Enu tushitu eswe a mu yambu, tweyenu nukalie, enu tushitu eswe a mu musenge.

¹⁰ Tulayi twenyi eswe tupuputa. Eswe keshi mana; eswe kapwa tuwa tumama, kahashile kupwoza. Akwa kulota, akwa kupomba, kakuzanga kufungunuka mu tulo.

¹¹ Tuwa kali ni solo lia kulia, keshi kukuta. Tufunga nawa keshi yinyingi; eswe hanatalikisa mutu mu jila yenyi, mutu mu jila yenyi, mutu mweswe ku kufumbuka chenyi, e eswe lume.

¹² Kakwamba ngwo, Tuyenu tukafupe vinyu, tukalikuchise ni kunwa chisasu; ni hamene mulipwa ngwe musono nawa, kuwaha chahiana.