Izaya 55 - MUKANDA USANDU WA ZAMBI 1975

¹ Mweswawo uli ni pwilé! Eze ku meya. Yoze keshi mbongo, tweya ulande ukalie! Tweya ulande vinyu ni yamwa ni mbongo ka, ni ndando ka.

² Kuchi te wakumwanga mbongo je ha chize hi mbolo ko? Kuchi te wakutokesa milimo ye ha chize kuchayukishile mbunge? Panjika kanawa kuli yami, ukalie yuma yipema, ukawahilile ni maji.

³ Neha twitwi lie, wize kuli yami. Panjika, mbunge ye yikatwame ni mwono. Mungukolesa ni yena usendo wa mutolo, utu wami wa zango ukolo kuli David.

⁴ Namupwishile chela ku mavungu; kasongo ni kapitau ka minyachi.

⁵ Muwiza kutambika mavungu kwanyingikine, ni mavungu kakunyingikine makazomboka kuli yena, ha mukunda wa Yehova Zambi ye, mwe Musandu wa Izalele, mumu hanakwehe uhenya.

⁶ Fupenu Yehova shimbu munuhasa kumuwana, mutambikenu shimbu achili hakamwihi.

⁷ Chingulungulu akambile ndako jenyi, mukwa uhenge akambile manyonga jenyi. Eze kuli Yehova hanga amuvwile keke; eze kuli Zambi yetu mba mamwaha ukonekeno wa kulumbama.

⁸ Mumu Yehova kanambe ngwenyi, Manyonga jami kapwile manyonga jenu, ni ndako jami kujapwile ndako jenu.

⁹ Mumu chizechene ngwe malilu kanasuha helu lia hashi, chocho ndako jami jakusuha helu lia ndako jenu, ni manyonga jami kakusuha helu lia manyonga jenu.

¹⁰ Chizechene ngwe vula ni neve yakukatuka mwilu, kuyayileko nawa alioze yakutuchika hashi hanga hasokese ni kwima, kuhana mbuto kuli mukwa kukuwa ni mbolo kuli mukwa kulia,

¹¹ chocho liji liami lize Kakutuhuka mu kanwa liami mulipwa; kulichi kuhiluka kuli yami mokomoko, alioze mulikalinga chuma chize ngunapale, mulikawaha mu milimo yize nalitumine.

¹² Mumu munukatuhuka ni uwahililo, manutetekelamo ni sambukila. Chipwe mulundu ni mindundena kumeso jenu muyikaputuka mwaso, ni mitondo yeswe ya mu yambu muyikasakwila koshi.

¹³ Mitondo ya kupresu muyikasoka kusalakana mingonga, ni miluta muyikasoka kusalakana mikalale. Mba chino muchipwa kuli Yehova ngwe Chiwulwiso; chilayi cha mutolo kuchichi kapatuka.