Izaya 54 - MUKANDA USANDU WA ZAMBI 1975

¹ Imba, ena mumba kwasemene! Putuka mwaso ni kulikwiza, ena kwafumbajalile! Mumu ana ja mukwa kuyindama mahiana ana ja mukwa ulo. Chocho kanambe Yehova.

² Tohesa chihela cha mbalaka ye, zazulula mahina ja mazuwo je. Kanda ukokoloka; suhisa mihipu ye, kolesa mbambo je.

³ Mumu mutanda ku chindume ni ku chimeso, ni ana je mazuka mavungu ni kuzalisa yihunda yize kuyishi atu.

⁴ Kanda wivwa woma, kuchi kwivwa sonyi; kanda utatajala, kechi kukukolesa sonyi. Mumu mukavulama sonyi ja wana-mapwo we, ni luchoko wa utwamishi we kuchi kamwiwuluka nawa.

⁵ Mumu Tangi ye iye lunga lie, jina lienyi Yehova-wa-Tujita. Musandu wa Izalele iye Mukwa-Kukukula, kakumutongola ngwo, Zambi ya hashi heswe.

⁶ Mumu Yehova hanakusanyika ngwe pwo lia ulo yoze hamwehuka, kanevu kupiha mu Spiritu yenyi; ngwe umwe pwo lia ulo kanuke ha kumumbila. Chocho kanambe Zambi ye.

⁷ Ha kashimbu kakepekepe nakwehukile, alioze mungukakukonga ni keke yinji.

⁸ Ha kashimbu kakepekepe nakuswekelele meso jami ni ufwatulo umwe wa kuhungumuna, alioze ni zango lia mutolo mungukakuvwila keke. Chocho kanambe Yehova, Mukwa-Kukukula.

⁹ Mumu kuli yami chuma chino chinapu ngwe matangwa a Noe. Nalishingile ngwami, Meya ja Noe kechi keza nawa kufuka hashi. Chocho nawa hinalishinga ngwami, Chichi katenuka ni yena, chichi kakukanda nawa.

¹⁰ Milundu muyihasa kujimuka, ni mindundena muyitutuluka, alioze utu wa zango liami kuuchi kakukatuka, ni usendo wami wa sambukila kuuchi katutuluka. Chocho kanambe Yehova, mukwa kukuvwila keke.

¹¹ Ena mukwa lamba, wa kupinda ni kangonga, kushi ni mukwa kukuwumbijeka, mungukolesa mawe je ni ulombo weka ni weka. Mungusa fundamentu je ni safwira.

¹² Mungupwisa tuposhi twe a agata, ni mapito je a carbunkulu, ni chipanga che cheswe cha mawe a ndando yilemu.

¹³ Ana je eswe a malunga maalongesa kuli Yehova, ni ana je eswe mapwa ni uhwimino wunji.

¹⁴ Mukajikijila mu ululi, mukatwama kusuku ni upinjiso, mumu kuchi kwivwa woma; mukatwama kusuku ni mwongo mumu kuuchi kakukundama.

¹⁵ Nyi umwe mavundula ndombo, kuyichi kakatuka kuli yami. Mweswe mavundula ndombo ni yena makalimbuka ha mukunda wa yena.

¹⁶ Hinatanga fuli yoze wakuheha makala, akafule chikungo ha chikuma chacho. Hinatanga nawa chenyeke akanongese.

¹⁷ Nichimwe chikungo muchikawaha nyi hachifula kulimika ni yena. Kumukakumika limi lieswe lize lia kulimika ni yena ha kusopa. Yehova kanambe ngwenyi, Chenacho chihinga cha tuvumbi twa Yehova, chocho nakwasambisa.